Reinier “The Dutch Knight” de Ridder បានធ្វើឲ្យគ្រួសាររបស់គេសប្បាយចិត្តយ៉ាងខ្លាំង។ ពេលនេះ គេបំបែកកំណត់ត្រាឈ្នះខ្សែក្រវាត់ ONE World Champion ពីរខ្សែ។
បុរសមកពីហូឡង់ យកឈ្នះ Aung La “The Burmese Python” N Sang ដោយពិន្ទុជាឯកច្ឆន្ទក្នុងការប្រកួត គុនចម្រុះ និងគ្រងខ្សែ ក្រវាត់មួយខ្សែទៀតគឺ ONE Light Heavyweight World Title នៅព្រឹត្តិការណ៍ “ONE on TNT IV” ដែលផ្សាយចេញពីកីឡដ្ឋាន Singapore Indoor Stadium នាព្រឹកថ្ងៃព្រហស្បតិ៍ទី ២៩ ខែ មេសា នេះ។
ក្រោយដណ្ដើមបានខ្សែក្រវាត់ទម្ងន់ middleweight ពីវីបុរសមីយ៉ាន់ម៉ា De Ridder បានចាប់ផ្ដើមចូលចាប់គូប្រជែងនៅទឹកដំបូង និងផ្ដួលគូប្រកួតទៅក្តាររេញ។ Aung La N Sang ព្យាយាមងើបឈរវិញ ប៉ុន្តែ កីឡាករហូឡង់ សុំាទៅនឹងតាក់ទិករបស់កីឡាករមកពីក្លិប Sanford MMA ទៅហើយ។
Aung La N Sang ព្យាយាមតស៊ូយ៉ាងខ្លាំង ហើយ “The Dutch Knight” បានគ្រប់គ្រងនៅពីលើយ៉ាងយូរមុនការគ្រប់គ្រងពីក្រោយខ្នងវិញ។ យ៉ាងណាក្ដី De Ridder ព្យាយាមដើម្បីឃ្លេក និង ប្រើកណ្ដាប់ដៃនៅទឹកដំបូងនេះដែរ ប៉ុន្តែ ម្ចាស់ខ្សែក្រវាត់ការពារកបានល្អ។
De Ridder ប្ដូរតាក់ទិក, ឡើងសំពងពីលើ, និង ស្វែងរកការឃ្លេដៃវិញម្ដង។ ប៉ុន្តែ “The Burmese Python” ព្យាយាមគេចពីការប្រកួតក្នុងជំហរដេកប្រែទៅប្រើកណ្ដាប់ដៃ និង ការទាត់វិញលើគូប្រកួតវិញ។
Aung La N Sang ខំព្យាយាមបន្តនៅទឹកទី២ ប៉ុន្តែ គូប្រជែងបានប្រើដៃស្ដាំគាបជាប់ដដែល។ De Ridder រុញគូប្រកួតឲ្យទៅក្បែរេញដដែល និងធ្វើការផ្លាស់ប្ដូរការប្រកួតបន្តបន្ទាប់ ហើយប៊ិះនឹងឃ្លេកបានសម្រេចទៀតផង។
បុរសមកពីហូឡង់នៅតែមានប្រៀបលើកីឡាករមីយ៉ាន់ម៉ា ហើយអាចអុកជង្គង់ចំមុខម្ចាស់ខ្សែក្រវាត់ជាញយៗផងដែរ។ “The Dutch Knight” នៅតែព្យាយាមឃ្លេកលើ Aung La N Sang ខណៈដែលគូប្រជែងរបស់ខ្លួនគេចបាន។ ចំណែកទឹកទី ៣ និង ទី៤ ក៏កូនសិស្សមកពីក្លិប Combat Brothers មានប្រៀបដែរ។
នៅទឹកចុងក្រោយ Aung La N Sang ខិតខំស្ដារដើមឡើងវិញ ព្រោះដឹងថា ៤ទឹកកន្លងទៅចាញ់ប្រៀបទៅហើយ។ គេចាប់ផ្ដើមចូលប្រកួតយ៉ាងគឃ្លើន។ ប៉ុន្តែ De Ridder ដាក់ផែនការចាប់បោកទៅក្ដាររេញ និងទប់ Aung La N Sang រហូតដល់ចប់ទឹក ទោះរកកណ្ដាប់ដៃមួយចំនួនក្ដី។
នាឱកាសនោះ “The Burmese Python” មានឱកាសវ៉ៃពីយ៉ាងច្រើនដៃលើ De Ridder ។ យ៉ាងណាក្ដី De Ridder គ្រប់គ្រងការប្រកួតបានល្អរយៈពេល ២០ នាទីរួចទៅហើយ។ពេលបញ្ចប់ការប្រកួត “The Dutch Knight” ដែលមានវ័យ ៣០ ឆ្នាំបានដឹងក្នុងចិត្តរួចទៅហើយដែលអាចគ្រងខ្សែក្រវាត់ទី២យ៉ាងរំភើបរបស់ខ្លួន។
“The Dutch Knight” ទទួលបានពិន្ទុពីចៅក្រមទាំងបី និងដណ្ដើមបានខ្សែក្រវាត់ ONE Middleweight និង ONE Light Heavyweight World Titles ពី Aung La N Sang តែម្នាក់គត់។
ជ័យជម្នះនេះនាំឲ្យរូបគេបង្កើតកំណត់ត្រាល្អឥតខ្ចោះឈ្នះ ១៤-០ ។ De Ridder ជាម្ចាស់ខ្សែក្រវាត់ពីរតែម្នាក់គត់ក្នុងប្រវត្តិសាស្ត្រដែលមិនចាញ់សោះ។ គេកំពុងហៅងជើងខ្លាំង Brandon “The Truth” Vera ដើម្បីប៉ះគ្នា និងបង្កើតឱកាសយកខ្សែក្រវាត់ទី៣។