អតីតជើងឯកពិភពលោក ONE Lightweight ជើងខ្លាំងហ្វីលីពីន Eduard “Landslide” Folayang នឹងជួបអ្នកជំនាញក្បាច់ក្រោមដែលជាវីរបុរសរបស់ប្រទេសជប៉ុន Shinya “Tobikan Judan” Aoki ជាលើកទី៣នាពេលដ៏ខ្លីខាងមុខនេះ។ សម្រាប់ការប្រកួតនេះរូបគេបានដាក់គោលដៅធំ បន្ទាប់ពីបានប្រឡូកចូលក្នុងអាជីពគុនចម្រុះរយៈពេលជិត២០ឆ្នាំហើយ។
នៅព្រឹកថ្ងៃព្រហស្បតិ៍ ទី២៩ ខែមេសា ខាងមុខនេះ Folayang ដាក់គោលដៅវិលទៅរកកៅអីដណ្តើមខ្សែក្រវាត់ពិភពលោកជាថ្មី នៅពេលត្រូវប្រកួតជាថ្មីជាមួយជើងខ្លាំងលំដាប់លេខ៤របស់ជប៉ុន Aoki នៅព្រឹត្តិការណ៍ប្រកួត “ONE on TNT IV“។
តាមពិតទៅ ជើងខ្លាំងទាំងពីរត្រូវបានផ្គូផ្គងឲ្យជួបដៃគូផ្សេងគ្នាទេពីដំបូង ប៉ុន្តែខ្លាចាស់ជប៉ុន Yoshihiro “Sexyama” Akiyama និងកីឡាករ “Super” Sage Northcutt បានដកខ្លួន ដូច្នេះអ្នកទាំងពីរត្រូវជួបគ្នាជាលើកទី៣។
Folayang បាននិយាយថា ៖«ខ្ញុំមិនរំពឹងថា យើងបានជួបគ្នាលើកទី៣ទេ ហើយក៏មិននឹកគិតថា បានជួបគ្នាលឿនបែបនេះដែរ។ Aoki ជាកីឡាករឆ្នើមដែលខ្ញុំទទួលស្គាល់ពីភាពខ្លាំងរបស់គាត់ ដូច្នេះខ្ញុំសង្ឃឹមថា ការជួបគ្នាលើកទី៣នេះនឹងកក្រើកខ្លាំង តែក៏មិនចង់ឲ្យការប្រកួតចប់លឿនដែរ»។
«នៅពេលពួកគេនិយាយថា Akiyama បានដកខ្លួន ហើយដាក់ Aoki ជំនួសវិញ ពិតណាស់ ខ្ញុំរីករាយ។ យើងស្គាល់គ្នាច្បាស់។ ការប្រកួតនេះពិតជាសំខាន់ណាស់សម្រាប់អាជីពរបស់ខ្ញុំ ពីព្រោះ Aoki ពិតជាល្បីល្បាញខ្លាំង។ ប្រសិនបើខ្ញុំអាចយកឈ្នះគាត់នោះ វាមិនត្រឹមតែឲ្យខ្ញុំឈ្នះក្នុងការប្រកួតលើកទី៣ទេ ប៉ុន្តែវានឹងរុញច្រានខ្ញុំឲ្យបោះជំហានទៅក្តាប់យកឱកាសប្រកួតដណ្តើមខ្សែក្រវាត់ពិភពលោកទៀតផង»។
នៅពេលកំពុងរីករាយនឹងការអភិវឌ្ឍខ្លួន កីឡាកររហស្សនាម “Landslide”បានបង្ខំខ្លួនឲ្យបង្កើនការហ្វឹកហាត់ទ្វេដងដើម្បីត្រៀមជួប Aoki។
Folayang និយាយថា ៖«តាមពិតទៅ ការប្រែប្រួលមានការលំបាកខ្លះ។ តាំងពីដំបូងមក យើងបានប្រឹងប្រែងដើម្បីប្រកួតជាមួយ Akiyama ប៉ុន្តែបន្ទាប់មកមានការផ្លាស់ប្តូរ។ យើងយល់ច្បាស់ណាស់ថា ជំនាញរបស់ Aoki ខុសប្លែកពី Akiyama»។
«សម្រាប់ Akiyama យើងបានត្រៀមចំពោះអ្វីដែលជាជំនាញរបស់គាត់គឺយូដូ។ នោះហើយដែលយើងត្រូវការផ្លាស់ប្តូរច្រើននៅពេល Aoki ដែលមានជំនាញក្បាច់ក្រោមដ៏ល្អឥតខ្ចោះ។ ខ្ញុំអាចនិយាយបានថា យើងផ្លាស់ប្តូរផែនការប្រកួតស្ទើរទាំងស្រុង»។
អ្វីដែលជារឿងល្អសម្រាប់គាត់នោះគឺធ្លាប់ប្រកួតជាមួយ Aoki ពីរដងទៅ។ ការជួបគ្នាលើកទី១នៅខែវិច្ឆិកា ឆ្នាំ២០១៦ដែលពេលនោះកីឡាករហ្វីលីពីនឈ្នះដោយពិន្ទុ ដើម្បីដណ្តើមបានខ្សែក្រវាត់ពិភពលោកមកគ្រប់គ្រង។
បន្ទាប់មក អ្នកទាំងពីរបានជួបគ្នាលើកទី២នៅខែមីនា ឆ្នាំ២០១៩ដែលពេលនោះ Aoki ចេញមុខប្រកួតដណ្តើមខ្សែក្រវាត់របស់ខ្លួនទៅវិញ ហើយកីឡាករជប៉ុនបានប្រើពេលតែមួយទឹកប៉ុណ្ណោះដើម្បីឃ្លេឲ្យកីឡាករហ្វីលីពីនចុះចាញ់ក្នុងទឹកទី១។
ស្ថិតក្នុងវ័យ៣៧ឆ្នាំ Folayang បាននិយាយថា ការប្រកួតលើកទី៣នេះនឹងយកបទពិសោធដែលចាញ់ក្នុងការប្រកួតលើកទី២ដើម្បីស្វែងរកជ័យជម្នះ។
ជើងខ្លាំងហ្វីលីពីនបានរំលឹកថា ៖«មុនពេលប្រកួត ខ្ញំបានឃើញគាត់ប្រកួតឈ្នះ Ev Ting ប៉ុន្តែពេលនោះខ្ញុំមានទំនុកចិត្តថា អាចការពារខ្សែក្រវាត់បាន»។
«ការប្រកួតនោះ និយាយជារួម ខ្ញុំគ្រប់គ្រងលើ Shinya បានល្អ ប៉ុន្តែខ្វះចន្លោះរបស់ខ្ញុំធ្វើឲ្យគាត់មានឱកាស ហើយប្រើជំនាញក្រោមរបស់គាត់បញ្ឈប់ខ្ញុំភ្លាម។ ពេលនោះ ខ្ញុំទាត់បានល្អ ហើយកណ្តាប់ដៃក៏ល្អដែលរបៀបវ៉ៃឈររបស់ខ្ញុំគឺមានប្រៀប ដូច្នេះលើកទី៣នេះ ខ្ញុំដឹងពីអ្វីដែលត្រូវប្រុងប្រយ័ត្ន និងអ្វីដែលត្រូវវ៉ៃលុក»។
ការជួបគ្នាពីរលើកកន្លងមក អ្នកទាំងពីរហាក់គ្មានអ្វីលាក់បាំងទៀតទេ។ សម្រាប់លើកនេះ Folayang នឹងព្យាយាមគេចចេញពីការប្រើជំនាញក្រោម។
កីឡាករហ្វីលីពីនបាននិយាយថា ៖«យើងបានកំពុងត្រៀមខ្លួនសម្រាប់អ្វីដែល Shinya រៀបផែនការប្រកួត ប៉ុន្តែខ្ញុំជឿជាក់ថា ដៃគូម្នាក់នេះនឹងព្យាយាមប្រើជំនាញក្រោមជាក់ជាមិនខានឡើយ»។
«យើងកំពុងបង្កើនជំនាញដើម្បីទប់ទល់នឹងជំនាញក្រោមរបស់គាត់ ហើយយើងក៏កំពុងបង្កើននូវអ្វីដែលយើងត្រូវប្រើក្នុងការប្រកួតនោះ។ យើងក៏កំពុងគិតពីជំនាញឈរដែល Shinya ត្រូវប្រើជាមួយយើង។ វាអាចទៅរួច ប្រសិនបើការប្រកួតចប់ទឹកទី១ ត្រូវធ្វើឲ្យច្បាស់ថា មិនមានកំហុស ឬខ្វះចន្លោះ។ នោះជាលទ្ធផលដែលនឹងទទួលបានតាមផែនការទៅហើយ ប៉ុន្តែពិតណាស់ យើងក៏ព្យាយាមបត់បែនតាមស្ថានភាពខុសគ្នាដែរ ពីព្រោះកីឡាអ្វីក៏អាចកើតឡើងបានដែរ»។
នាព្រឹកថ្ងៃព្រហស្បតិ៍នេះ Folayang នឹងឡើងសង្វៀនដោយមានផែនការជាក់លាក់ក្នុងចិត្ត។ កីឡាករហ្វីលីពីនដឹងថា ជ័យជម្នះលើ Aoki នឹងក្លាយជាកំណត់ត្រាពិសេសមួយដើម្បីបញ្ឈប់ដៃគូល្បីល្បាញម្នាក់នេះ និងរុញច្រានរូបគាត់ឈានឆ្ពោះទៅកៀកនឹងការប្រកួតខ្សែក្រវាត់ពិភពលោក ONE Lightweight។
Folayang បញ្ជាក់ថា ៖«ការប្រកួតពិតជាមានន័យណាស់។ ប្រសិនបើឈ្នះលើជើងខ្លាំងវីរបុរសគុនចម្រុះជប៉ុននេះ វានឹងជាសមិទ្ធផលដ៏ធំធេងសម្រាប់អាជីពប្រដាល់របស់ខ្ញុំ។ ក្រៅពីនេះ Shinya នឹងនៅតែឈរលំដាប់លេខ៥ ហើយនឹងបិទមាត់អ្នករិះគន់ ដូច្នេះខ្ញុំសង្ឃឹមថា យកការប្រកួតនេះដើម្បីបោះជំហានទៅប្រកួតដណ្តើមខ្សែក្រវាត់ពិភពលោកជាថ្មី»៕
