កាលពីប៉ុន្មានថ្ងៃមុនមានការចែករំលែកព្រោងព្រាតនូវព័ត៌មានគួរឲ្យអាណិតមួយ ពាក់ព័ន្ធនឹងករណីដែលស្រ្តីជាកម្មកររោងចក្រ មានជីវភាពខ្វះខាតម្នាក់ បានទ្រាំរហូតដល់ថ្ងៃឈឺពោះ ហើយចៃដន្យត្រូវសម្រាលកូននៅនឹងមុខបន្ទប់ជួលក្នុងតំបន់ធ្វើចត្តាឡឺស័ក។
យ៉ាងណាដោយមើលឃើញពីទុក្ខលំបាក ប្រធានក្លឹបបាល់ទាត់វិសាខាលោកជំទាវ កែ សួនសុភី មិនបង្អង់យូរនោះទេ ក៏បានប្រញាប់ចាត់តាំងក្រុមការងារឲ្យចុះទៅពិនិត្យជាក់ស្ដែង ហើយនាំយកនូវថវិកាមួយចំនួន ដើម្បីដោះស្រាយការចំណាយសម្រាកព្យាបាលផង និងដើម្បីដោះស្រាយជីវភាពប្រចាំថ្ងៃផង។
រាប់ចូលជាសកម្មភាពដែលលោកជំទាវបានចូលរួមជួយផ្ទួនៗគ្នា ដោយកាលពីប៉ុន្មានថ្ងៃមុន លោកជំទាវ កែ សួនសុភី ក៏បានជួយឧបត្ថម្ភនូវថវិកាដល់ស្រ្តីជិតគ្រប់ខែ ដែលត្រូវម្ចាស់ផ្ទះជួលបង្ខំឲ្យរើចេញ ដោយសារពុំមានប្រាក់បង់បង្រ្គប់ផងដែរ។ នេះបើតាមការបញ្ជាក់ពីប្រធានអ្នកគាំទ្រក្លឹប វិសាខា ឯកឧត្តម លី ឡាយ បានសរសេរបង្ហោះនៅលើគណនីហ្វេសប៊ុក។
ពាក់ព័ន្ធនឹងរឿងរ៉ាវខាងលើ ក្រុមបាល់ទាត់ដែលតែងតែចូលរួមការងារសង្គមគឺ Cambodian Fan Club All Stars ហៅកាត់ CFA ក៏បានប្រមូលគ្នាធ្វើការបរិច្ចាគប្រាក់បន្តិចបន្តួចតាមរយៈគណនី ABA និងអំពាវនាវឲ្យបងប្អូនអ្នកគាំទ្រកីឡាបន្តចូលរួមជួយបន្ថែមទៀត ដោយអាចចែករំលែកជាសម្ភារៈផ្ទាល់ក៏បាន ឬអាចជួយជាថវិកាតាមរយៈគណនី ABA លេខ 001 731 042 ឬតាមរយៈទូរសព្ទលេខ 096 219 54 84 និង 096 79 88 340៕