ពានរង្វាន់កីឡាករល្អជាងគេនៅអឺរ៉ុបរបស់ UEFA ឆ្នាំនេះ បានទៅលើខ្សែបម្រើ Luka Modric ដែលបានជួយក្រុម Real Madrid លើកពាន Champions League ៣ឆ្នាំជាប់គ្នា និងនាំជម្រើសជាតិក្រូអាតឡើងដល់ផ្ដាច់ព្រ័ត្រ World Cup ។
ដោយឡែកសម្រាប់កីឡាករកំពូលផ្សេងៗទៀតដូចជា Cristiano Ronaldo ទទួលបានចំណាត់ថ្នាក់លេខ២ប៉ុណ្ណោះ បើទោះជាបានជួយ Real Madrid លើកពានដែរ និងជាប់ឈ្មោះជាអ្នករកគ្រាប់បាល់បានច្រើនជាងគេក៏ដោយ។
បើងាកទៅមើលចំណាត់ខ្សែប្រយុទ្ធម្នាក់ទៀតវិញ គឺតារាឆ្នើម Lionel Messi កាន់តែនៅឆ្ងាយពីកំពូលតារាងហើយ ពោលគឺរូបគេជាប់លេខ៥ឯណោះ ដោយនៅក្រោយ Mohamed Salah លេខ៣ និងលេខ៤នោះ គឺ Antoine Griezmann របស់ក្រុម AT Madrid ដែលជួយក្រុមនេះលើកពាន Europa League និងលើកពាន World Cup 2018 ។
សូមបញ្ជាក់ថា Modric ទទួលបានការបោះឆ្នោត ៣១៣ពិន្ទុ ពីគ្រូបង្វឹក៦០នាក់ និងអ្នកកាសែត៥៥នាក់នៅតំបន់អឺរ៉ុប។
សម្រាប់ Ronaldo មាន២២៣ពិន្ទុ អ្នកទី៣ Mohamed Salah មាន១៣៤ពិន្ទុ Antoine Griezmann មាន៧២ពិន្ទុ និង Lionel Messi មាន៥៥ពិន្ទុ៕ ប្រភព៖ DailyMail