មានរឿងជាច្រើនក្នុងវិស័យបាល់ទាត់យើងនេះ បានកើតឡើងជាបន្តបន្ទាប់ ទាំងដែលខ្លះក៏វាជាអ្វីដែលអ្នកគាំទ្រចង់បាន ហើយខ្លះទៀតក៏ជារឿងដ៏ភ្ញាក់ផ្អើល ដែលអ្នកគាំទ្រសឹងតែមិនចង់ជឿ។
ក្នុងនោះក៏មានចំណែកនូវការសម្រេចចិត្តរបស់លោក Florentino Perez ជាច្រើនលើកច្រើនសារ នៅកំឡុងការចាយពេលជាប្រធានក្លឹប Real Madrid រយៈពេល ១៧ ឆ្នាំ។ តទៅនេះទំព័រ CTS Sports ធ្វើការសង្ខេប ៤ លើកដែលប៉ាៗវ័យ ៧៤ ឆ្នាំ បានធ្វើឲ្យអ្នកគាំទ្រដាក់ផ្ងារ ជុំវិញការសម្រេចចិត្តរបស់លោក៖
៤) ការចុះហត្ថលេខាយក Luis Figo
ដូចអ្នកបានដឹងស្រាប់ហើយ Barcelona និង Real Madrid គឺជាក្លឹបគូប្រជែងនឹងគ្នាតាំងពីដើមរៀងមក។ បែបនេះការផ្ទេរចេញចូលរវាងកីឡាករក្លឹបទាំងពីរ គឺជារឿងដែលមិនងាយនឹងកើតឡើង ជាពិសេសគឺឈ្មោះកីឡាករកំពូលៗតែម្តង។
យ៉ាងណានៅឆ្នាំ ២០០០ ពិភពបាល់ទាត់នៅប្រទេសអេស្ប៉ាញ បានមានការរង្គោះរង្គើកំឡុងពេលបោះឆ្នោតជ្រើសរើសប្រធានក្លឹបថ្មីនៅក្លឹប Real Madrid។ ពេលនោះលោក Florentino Perez បានបង្ហើបពីផែនការណ៍របស់លោក ថាប្រសិនណាលោកជាប់ឆ្នោតនោះលោកនឹងចុះហត្ថលេខាយក Figo ពីក្លឹប Barcelona ឲ្យបាន។
ដូចការគ្រោងទុក Perez ពិតជាបានជាប់ឆ្នោតក្លាយជាប្រធានក្លឹបមែន ហើយលោកក៏ធ្វើតាមសន្យាដោយចំណាយប្រាក់ ៦០ លានអឺរ៉ូ ទិញយកកីឡាករព័រទុយហ្គាល់ចេញពីក្លឹបគូសត្រូវ។
៣) ការចាកចេញរបស់អ្នកចាត់ការលោក Vicente del Bosque
កំឡុងការដឹកនាំចន្លោះឆ្នាំ ១៩៩៩ ដល់ ២០០៣ លោក Del Bosque បានជួយឲ្យ Real Madrid ឈ្នហពានរង្វាន់ Champions League ១ លើក និង La Liga ២ លើក។ ទន្ទឹមនឹងជោគជ័យនេះ សាមីខ្លួនក៏មានចិត្តចង់បន្តកុងត្រាថ្មីដែរ តែមិនដឹងមូលហេតុអ្វីលោក Florentino Perez ដែលជាប្រធានក្លឹបបែរជាមិនអនុញ្ញាត។
ផ្ទុយទៅវិញ Perez បែរជាផ្តល់មុខតំណែងថ្មី ដោយចង់ឲ្យ Del Bsque មកធ្វើជានាយកបច្ចេកទេសរបស់ក្លឹប ជំនួសពីតំណែងអ្នកចាត់ការ តែគ្រូអេស្ប៉ាញយល់ឃើញថា វាជាការប្រមាថ ហើយក៏បដិសេធសំណើភ្លាមៗ។
ជាមួយការបើកផ្លូវឲ្យ Del Bosque ចាកចេញពីក្លឹប ក៏នាំឲ្យកើតមានភាពចម្រូងចម្រាសជាមួយនឹងកីឡាករមួយចំនួន ហើយពេលនោះកីឡាករ ៣ រូបរួមមាន Fernando Hierro, Steve McManaman និង Fernando Morientesបានប្រកាសដាច់អហង្ការថាពួកគេមិនគាំទ្រ និងបានសម្រេចចិត្តចាកចេញដោយមិនញញើតឡើយ។
២) ការលក់ Cristiano Ronaldo
Ronaldo បានផ្ទេរមកចូលរួមនៅក្លឹប Real Madrid កាលពីរដូវក្តៅឆ្នាំ ២០០៩ ហើយរយៈពេលជាង ១០ ឆ្នាំ គេបានជួយក្លឹបអេស្ប៉ាញឈ្នះពានរង្វាន់ជាច្រើន។ នៅការបង្ហាញខ្លួន ៤៣៨ ប្រកួត CR7 រកបាន ៤៥០ គ្រាប់និង Assist ១៣២ លើក។
ប៉ុន្តែមកទល់ខែកក្កដា ឆ្នាំ ២០១៨ ក្រោយរយៈពេល ៣ ខែនៃការឈ្នះពាន Champions League ក្លឹប Real Madrid ដែលដឹកនាំដោយលោក Perez បែរជាបង្កើតរឿងភ្ញាក់ផ្អើលមួយ ធ្វើឲ្យអ្នកគាំទ្រមានការខឹងសម្បាជាខ្លាំង នោះគឺការលក់ កីឡាករព័រទុយហ្គាល់ឲ្យទៅក្លឹប Juventus នៅតម្លៃ ១១៧ លានអឺរ៉ូ។
គេជឿថា ដោយសារ Perez មិនអាចបំពេញនូវតម្រូវការមួយចំនួនរបស់ Ronaldo តែយ៉ាងណាក្លឹបក៏មិនគួរលក់ CR7 ចេញដែរ ព្រោះគេរាប់បានជាវីរបុរសមួយរូបប្រចាំប្រវត្តិសាស្ត្រក្លឹបទៅហើយ។ ការបោះបង់ខ្សែប្រយុទ្ធកំពូលរូបនេះឲ្យទៅក្លឹបអ៊ីតាលី លោក Perez ហាក់ធ្វើឡើង ដោយគ្មានការសោកស្ដាយអ្វីទាល់តែសោះ។
១) ការបង្កើតពានថ្មី ESL
វាជារឿងដែលគួរឲ្យចាប់អារម្មណ៍បំផុតនៅរយៈពេលចុងក្រោយ ដែលលោក Florentino Perez ដើរតួជាប្រធានគ្រប់គ្រងពានរង្វាន់ថ្មី European Super League ឬហៅកាត់ ESL។
ដំបូងឡើយ Perez ប្រមូលបានក្លឹបចំនួន ១២ មកចូលរួម តែក្រោយរយៈពេល ២ ថ្ងៃ ក្លឹបចំនួន ៦ នៅអង់គ្លេសក៏ប្រកាសដកខ្លួនវិញ តែ Perez មិនបោះបង់នោះទេ ដោយលោកនៅបន្តឈរលើគោលជំហរចង់បង្កើតពានថ្មីនេះឲ្យលេចចេញជារូបរាងដដែល។ វាប្រៀបបាននឹងសង្គ្រាមមួយក្នុងពិភពបាល់ទាត់ ដែលជាការតតាំងគ្នារវាង UEFA និង ESL។
ពាក្យសម្តីមួយឃ្លាដែល Perez តែងតែនិយាយ៖ “មានតែការបង្កើតពានថ្មី Super League នេះទេ ដែលជាដំណោះស្រាយល្អបំផុតក្នុងការជួយសង្គ្រោះវិស័យបាល់ទាត់ឲ្យត្រលប់មកវិញ មិនដូច្នោះទេបាល់ទាត់នឹងត្រូវបាត់បង់នៅឆ្នាំ ២០២៤”៕
- ហាមយកអត្ថបទរបស់ CTS Sports ទៅចុះផ្សាយបន្ត!