ការជ្រើសរើសលេខអាវសម្រាប់កីឡាករក៏ជារឿងសំខាន់មួយដែរ ដោយជាទូទៅលេខដែលគេឲ្យតម្លៃនិងទទួលស្គាល់ច្រើនបំផុត មានដូចជាលេខ ១ ៧ ៩ ១០ និង ១១ ជាដើម។
យ៉ាងណាមកមើលកីឡាករល្បីល្បាញ ៥ រូបនេះវិញ បែរជាប្រើប្រាស់លេខអាវដ៏ចម្លែក ហើយខ្លះហួសពីខ្ទង់ ២០ ទៅទៀត។ ប៉ុន្តែបើស៊ីជម្រៅឲ្យច្បាស់ទៅ លេខអាវនីមួយៗរបស់ពួកគេសុទ្ធតែមានអត្ថន័យនៅពីក្រោយនោះ ហើយជារឿងដែលមនុស្សជាច្រើនពុំធ្លាប់បានដឹង៖
៥) Robinho ពាក់អាវលេខ ៧០ នៅក្លឹប AC Milan
នៅរដូវក្តៅ ឆ្នាំ ២០១០ ក្លឹប Man City បានប្រកាសលក់ចេញកីឡាករ Robinho ឲ្យទៅក្លឹប AC Milan នៅតម្លៃ ២១ លានអឺរ៉ូ។
ដើមឡើយកីឡាករប្រេស៊ីលចង់ប្រើប្រាស់អាវលេខ ១០ ដែលជាអត្តសញ្ញាណរបស់ខ្លួនកាលនៅក្លឹប Real Madrid និង Man City តែលេខនោះជាន់ជាមួយវីរបុរសលោក Clarence Seedorf ខណៈលេខ ៧ ដែលជាអត្តសញ្ញាណរបស់ Robinho កាលនៅ Santos ក៏ជាន់ជាមួយ Alexander Pato ថែមទៀត។
បែបនេះទើប Robinho សម្រេចគុណលេខទាំងពីរចូលគ្នា ហើយជ្រើសយកអាវលេខ ៧០ មកប្រើប្រាស់តែម្តង។ ជាងនេះសម្រាប់លេខ ៧០ ក៏ស្ថិតនៅលើអាវចុងក្រោយរបស់ Robinho កាលនៅក្លឹប Istanbul មុនប្រកាសចូលនិវត្តផងដែរ។
៤) Bixente Lizarazu ពាក់អាវលេខ ៦៩ នៅក្លឹប Bayern Munich
ខ្សែការពារសញ្ជាតិបារាំង បានផ្ទេរចេញពីក្លឹប Athletic មកចូលរួមនៅ Bayern កាលពីឆ្នាំ ១៩៩៧ ហើយនៅរដូវកាលដំបូងលោកប្រើប្រាស់អាវលេខ ១១។ ប៉ុន្តែសម្រាប់ការផ្ទេរមកក្លឹបអាល្លឺម៉ង់លើកទី ២ នៅឆ្នាំ ២០០៥ Lizarazu ស្រាប់តែប្តូរមកប្រើប្រាស់អាវលេខ ៦៩។
មូលហេតុដែលជ្រើសរើសយកអាវលេខ ៦៩ នោះក៏ដោយសារលេខដែលលោកចង់បាន ជាន់គ្នាជាមួយវីរបុរសប្រេស៊ីល Lucio ហើយសម្រាប់លេខ ៦៩ ដើម្បីជាលេខជួនគ្នានឹងឆ្នាំកំណើត ១៩៦៩ កម្ពស់ ១,៦៩ ម៉ែត្រ ហើយទម្ងន់ក៏ ៦៩ គីឡូក្រាមនៅកាលនោះ។
៣) Gianluigi Buffon ពាក់អាវលេខ ៧៧ នៅ Juventus
អ្នកចាំទី Buffon បានមកចូលរួមនៅ Juventus ក្នុងឆ្នាំ ២០០១ ជាមួយតម្លៃផ្ទេរដល់ទៅ ៥២ លានអឺរ៉ូ។ កីឡាករអ៊ីតាលីបានផ្ទេរមកក្លឹបសេះបង្កង់ ២ លើក ដោយលើកទីពីរនេះកាលពីឆ្នាំ ២០១៩ ហើយលោកបានប្រើប្រាស់អាវលេខ ៧៧ ដោយធ្លាប់ប្រើកាលនៅក្លឹប Parma។
តាមពិតទៅបើមានឱកាសយកអាវលេខ ១ ក៏ Buffon នឹងប្រើប្រាស់ដែរ តែដោយសារជាន់គ្នាជាមួយអ្នកចាំទីដៃទីមួយគឺ Wojciech Szczesny។ រីឯអត្ថន័យនៅពីក្រោយលេខ ៧៧ នោះគឺជាឆ្នាំកំណើតរបស់លោក គឺ ១៩៧៧។
២) Ronaldinho ពាក់អាវលេខ ៨០ នៅក្លឹប AC Milan
Ronaldinho បានជោគជ័យខ្លាំងកំឡុងការចាយពេលនៅក្លឹប Barcelona និងក្រោយការផ្ទេរមកក្លឹប AC Milan។ នៅរដូវកាលដំបូងជាមួយក្លឹបយក្សអ៊ីតាលី កីឡាករប្រេស៊ីលបានប្រើប្រាស់អាវលេខ ៨០ បន្ទាប់ពីអាវលេខ ១០ ដែលជាអត្តសញ្ញាណរបស់ខ្លួន ជាប់នៅនឹងអាវរបស់វីរបុរសលោក Clarence Seedorf ទៅហើយ។
ចំពោះអត្ថន័យនៅពីក្រោយលេខ ៨០ សម្រាប់ Ronaldinho ក៏ដូចជា Buffon អ៊ីចឹងដែរ នោះគឺផ្សារភ្ជាប់ទៅនឹងឆ្នាំកំណើត គឺ ១៩៨០។
១) Trent Alexander-Arnold ពាក់អាវលេខ ៦៦ ក្លឹប Liverpool
នៅការបង្ហាញខ្លួន ១៧៣ ប្រកួត Arnold បានជួយឲ្យ Liverpool ឡើងដល់វគ្គផ្ដាច់ព្រ័ត្រ UCL ២ លើក ហើយឈ្នះជើងឯក ១ លើក រីឯនៅ Premier League ក៏បានលើកពាន ១ លើកផងដែរ។
ជាមួយគុណភាពដ៏ប៉ិនប្រសព្វរបស់កីឡាករអង់គ្លេស ក៏នាំឲ្យគេកាន់តែចាប់អារម្មណ៍ទៅលើអាវលេខ ៦៦ របស់ Arnold នាមជាខ្សែការពារស្លាបស្តាំកំពូលមួយរូបក្នុងលោក។
នៅពីក្រោយអត្ថន័យអាវលេខ ៦៦ របស់ Arnold ពុំមានការបញ្ជាក់ពីមូលហេតុច្បាស់លាស់នោះទេ តែគេជឿថា ដោយសារនៅពេលដែល Arnold មកចូលរួមនៅសាលាហ្វឹកហាត់បាល់ទាត់ Melwood របស់ Liverpool គឺនៅពេលគេមានអាយុ ៦ ឆ្នាំ ហើយពេលមកចូលរួមនៅឈុតធំពេលគេមានអាយុ ១៦ ឆ្នាំ បែបហ្នឹងទើបសម្រេចយកលេខ ៦ ពីរដងមកដាក់លើអាវ៕
ហាមយកអត្ថបទរបស់ CTS Sports ទៅចុះផ្សាយបន្ត!