ប្រធានគ្រប់គ្រងពានរង្វាន់ថ្មី European Super League ហៅកាត់ ESL គឺលោក Florentino Perez បាននិយាយថា បើមើលតាមស្ថានការណ៍បច្ចុប្បន្នបណ្តាក្លឹបទាំងអស់នឹងគ្មានលទ្ធភាពអាចនាំយក Kylian Mbappe ឬ Erling Haaland ដែលជាកីឡាករស្ថិតនៅតម្លៃច្រើនជាង ១៥០ លានផោនបានឡើយ។
ជាការពិតវិបត្តិសេដ្ឋកិច្ចក្នុងពេលរាតត្បាតជំងឺ COVID-19 ធ្វើឲ្យក្លឹបបាល់ទាត់ទាំងអស់ មានការចំណាយច្រើនជាងទទួលបានចំណូល ហើយក្លឹបខ្លះក៏ជាប់បំណុលខ្ទង់ពាន់លានដុល្លារ។
យ៉ាងណាសម្រាប់លោក Perez បានជឿជាក់ថាប្រសិនក្លឹបដែលទទួលបានសំណើ ព្រមដើរតាមផែនការណ៍របស់លោក នោះបញ្ហាប្រាកដជានឹងដោះស្រាយចេញ ហើយការនាំយកកីឡាករកំពូលទាំង ២ លើក៏អាចធ្វើទៅបានដែរ។
ប្រធានក្លឹប Real Madrid និយាយ៖ “នៅស្ថានភាពសព្វថ្ងៃនេះ នឹងគ្មានការផ្ទេរធំនៅរដូវក្តៅកើតឡើងឡើយ ដោយពេលណាលំហូរលុយពីក្លឹបអ្នកមានមិនធ្លាប់មកក្លឹបតូចទេនោះ គ្រប់គ្នាក៏នឹងជួបបញ្ហា ហើយវាមិនអាចទៅរួចទេក្នុងការចុះហត្ថលេខាយក Mbappe និង Haaland ដោយមិនមែនសម្រាប់តែ Real Madrid ឡើយ និយាយទៅលុះត្រាតែយើងមាន Super League”៕
ប្រភព៖ Goal