នៅវេលាម៉ោង ០២:០០ នាទីរំលងអាធ្រាត្រ ឈានចូលថ្ងៃទី ២៨ និង ២៩ មេសា ក្រុមទាំង ៤ នៅ Champions League នឹងបើកការប្រកួតជើងទី ១ វគ្គពាក់កណ្ដាលផ្ដាច់ព្រ័ត្រ។ ក្នុងនោះ គឺជាជំនួប Real Madrid ទល់ Chelsea និង PSG ទល់ Man City។
ជឿថាមកទល់ពេលនេះ ក៏នៅតែមានអ្នកគាំទ្រជាច្រើនធ្វើការជជែកវែកញែកដោយទស្សន៍ទាយទុកជាមុន នូវឈ្មោះក្រុមដែលខ្លួនគិតថានឹងអាចឡើងទៅកាន់បន្ទាប់។ ដោយឡែកនៅក្នុងអត្ថបទនេះ CTS Sports នឹងបង្ហាញការយល់ឃើញរបស់អតីតកីឡាករកំពូល ៣ រូប មាន ២ រូបនៅ Premier League និង ១ រូបនៅ La Liga។
ទី ១ គឺលោក Michael Owen ដែលធ្លាប់ជាកីឡាករបម្រើអាជីពឲ្យក្លឹប Liverpool និង Real Madrid។ យ៉ាងណាសម្រាប់ការឆ្ពោះទៅវគ្គផ្ដាច់ព្រ័ត្រ បុរសសញ្ជាតិអង់គ្លេសពុំបានជ្រើសយកឈ្មោះក្លឹបអេស្ប៉ាញនោះទេ ផ្ទុយទៅវិញគិតថាជាក្លឹបអង់គ្លេសទាំងអស់។ លោកទាយថា Chelsea នឹងយកឈ្នះ Real Madrid ហើយ Man City នឹងយកឈ្នះ PSG។
ទី ២ គឺលោក Rio Ferdinand ដែលធ្លាប់ជាកីឡាករកាន់ឆ្នាំនៅ Manchester United បានបង្ហាញការយល់ឃើញផ្ទុយស្រលះពីខាងលើ ដោយលោកគិតថាក្រុមអង់គ្លេសទាំងពីរនឹងត្រូវហាលអាវ ហើយក្រុមបារាំង PSG នឹងត្រូវឡើងទៅជួបក្រុមអេស្ប៉ាញ Real Madrid នៅវគ្គផ្ដាច់ព្រ័ត្រឆ្នាំ ២០២១។
ការប៉ះសម្តីរបស់អ្នកទាំងពីរនៅលើប៉ុស្តិ៍ BT Sport ក៏នាំឲ្យកើតមានការភ្នាល់ ថាបើនរណាទស្សន៍ទាយត្រូវ នោះនឹងទទួលបានស្រាក្រហមដែលមានតម្លៃថ្លៃមួយដប។
ទី ៣ គឺលោក Rivaldo ដែលជាអតីតកីឡាករនៅក្លឹប Barcelona សម័យកាលឆ្នាំ ១៩៩៧ ដល់ ២០០២ បានទស្សន៍ទាយនៅជំនួបរវាង Real Madrid និង Chelsea បែបនេះថា៖ “ខ្ញុំមើលឃើញថា Real Madrid គឺជាក្រុមដែលនឹងឡើងទៅកាន់វគ្គផ្ដាច់ព្រ័ត្រ ព្រោះពួកគេមានបទពិសោធន៍ជោកជាំនៅវគ្គបែបនេះរួចមកហើយ និយាយទៅអាចថាជាក្រុមជំនាញទៀតផងនៅរយៈពេលមួយទសវត្សចុងក្រោយ”។
លោកបន្ថែមទៀតថា៖ “Chelsea ក៏ជាក្រុមរឹងមាំមួយដែរ តែគ្រាន់ថា Madrid ពួកគេមានបទពិសោធន៍ជោកជាំជាង ហើយអាចដឹងច្បាស់ថាតើត្រូវធ្វើបែបណាដើម្បីឡើងទៅកាន់វគ្គផ្ដាច់ព្រ័ត្រ”។ បែបនេះចម្លើយរបស់ Rivaldo គឺជ្រើសរើសយកក្លឹប Real Madrid ខណៈជំនួប PSG-Man City លោកពុំបានបញ្ជាក់នោះឡើយ។
ចុងក្រោយយើងបង្ហាញឲ្យអ្នករាល់គ្នាបានដឹងពីពេលវេលាចុងក្រោយ ដែលក្រុមទាំង ៤ បានឈ្នះពាន Champions League៖
Real Madrid ឆ្នាំ ២០១៨ យកឈ្នះ Liverpool ៣-១
Chelsea ឆ្នាំ ២០១២ យកឈ្នះ Bayern Munich ដោយបាល់ប៉េណាល់ទីថែមម៉ោង ៤-៣
PSG និង Man City មិនធ្លាប់ឈ្នះពាន Champions League នោះឡើយ តែ PSG ធ្លាប់ឡើងដល់វគ្គផ្ដាច់ព្រ័ត្រនៅឆ្នាំ ២០២០ ដោយចាញ់ Bayern Munich ១-០ ហើយ Man
City ធ្លាប់ឡើងខ្ពស់បង្អស់ត្រឹមវគ្គ ៤ ក្រុមចុងក្រោយ កាលនោះនៅឆ្នាំ២០១៦ ចាញ់ Real Madrid ១-០៕