ឮអនាគតរបស់ David de Gea ជាមួយក្លឹប Man Utd នៅរដូវកាលក្រោយ ហាក់មិនស្ថិតស្ថេរនោះទេ ពោលគឺអាចនឹងចាកចេញ ប្រសិនណាក្លឹបរកឃើញទ្រនំណាមួយដែលអាចផ្តល់តម្លៃផ្ទេរដ៏សមរម្យ។
យ៉ាងណាតាម Football Insider ក៏បានឲ្យដឹងថា ក្លឹបម្ចាស់ដី Old Trafford កំពុងសម្លឹងដូចគ្នាអំពីអ្នកថ្មីដែលអាចមកជំនួសដៃរបស់ De Gea ហើយក្នុងចំណោមបេក្ខភាពធំៗជាច្រើន United ក៏មើលឃើញកីឡាកររបស់ Aston Villa នោះគឺ Emiliano Martinez។ អតីតកីឡាករ Arsenal រូបនេះ គេជោគជ័យខ្លាំងកំឡុងពេលជួយឲ្យកាំភ្លើងធំឈ្នះពាន FA Cup កាលពីឆ្នាំ ២០២០ មុនផ្ទេរមក Villa។
បុរសសញ្ជាតិអាហ្សង់ទីនជាមួយ Villa ក៏គេនៅបន្តធ្វើបានល្អដែរ ហើយតាមរយៈ ៣០ ប្រកួត របូត ៣៣ គ្រាប់។ ស្ថិតិនេះបើធៀបនឹង De Gea របស់ United គឺ ៣១ ប្រកួត របូត ៣៧ គ្រាប់។
យើងនឹងរង់ចាំមើលថាតើ United អាចចរចាយក Martinez ចេញពី Villa បានឬអត់ ព្រោះកុងត្រារបស់គេត្រូវផុតនៅឆ្នាំ ២០២៤ ឯណោះ ហើយតម្លៃចរចាប្រហែលខ្ទង់ ២៥ លានអឺរ៉ូ៕
ប្រភព៖ BeSoccer