នៅវេលាម៉ោង ០២:០០ នាទីរំលងអាធ្រាត្រ ឈានចូលព្រឹកថ្ងៃសោរ៍ ទី ១៧ មេសា ក្រុមស្ករគ្រាប់ Everton នឹងបើកកីឡដ្ឋាន Goodison Park ស្វាគមន៍ក្រុមមាន់ខ្នាយមាស Tottenham Hotspur ដែលជាប្រកួតជុំទី ៣១ សម្រាប់ម្ចាស់ផ្ទះ និង ៣២ សម្រាប់ក្រុមភ្ញៀវ។
ការប្រកួតយប់នេះ តាមការព្យាករណ៍គឺបង្ហាញថា Everton នឹងស្មើ ១-១ ទល់ Spurs នោះក៏ដោយសារក្រុមទាំងពីរមានប្រព័ន្ធលេងនៅពេលចុងក្រោយប្រហែលគ្នា ហើយសំខាន់យប់នេះក៏មិនពេញជើងដូចគ្នាថែមទៀត។
សមាសភាពកីឡាកររបស់ Everton គឺអវត្តមានខ្សែប្រយុទ្ធសំខាន់ Dominic Calvert-Lewin ហើយ Spurs គឺបាត់បង់ខ្សែការពារឆ្នើមពីររូបមាន Ben Davies និង Matt Doherty។ នាំឲ្យជម្រើស ១១ រូបរវាងក្រុមទាំងពីរអាចមានដូចខាងក្រោម៖
Everton : Pickford; Holgate, Godfrey, Keane; Coleman, Allan, Davies, Sigurdsson, Digne; Richarlison, Rodriguez
Tottenham Hotspur: Lloris; Aurier, Alderweireld, Rodon, Reguilon; Hojbjerg, Sissoko; Lucas, Ndombele, Son; Kane
បញ្ជាក់ថា នេះជាការប៉ះគ្នាលើកទី ១៨១ រវាងក្រុមទាំងពីរ ដោយស្ថិតិរួម Spurs ឈ្នះ ៦៨ ស្មើ ៥៦ និងចាញ់ ៥៧ លើក។ លើកចុងក្រោយជួបគ្នានៅ FA Cup ក្រុម Everton យកឈ្នះ ៥-៤ ទៅលើ Spurs ខណៈនៅ PL ជើងទី ១ រដូវកាលនេះ Spurs ចាញ់ ១-០៕
ប្រភព៖ Sportsmole