ការប្រកួតនៅព្រឹកថ្ងៃពុធនេះ បានសម្រេចរកឃើញហើយនូវឈ្មោះក្រុមចំនួន ២ ដែលត្រូវឡើងទៅកាន់វគ្គពាក់កណ្តាលផ្តាច់ព្រ័ត្រ នោះគឺ PSG ដែលបានយកឈ្នះ Bayern Munich ៣-៣ (ឈ្នះគ្រាប់បាល់ក្រៅដី) ហើយ Chelsea ឈ្នះ Porto ២-១។
យ៉ាងណាជឿថាប្រិយមិត្តប្រាកដជាឆ្ងល់ ថាតើនៅវគ្គបន្ទាប់នេះ គេនឹងមានការចាប់ឆ្នោតក្រុមត្រូវប៉ះគ្នាទៀតឬបែបណា? ចម្លើយយ៉ាងខ្លី នោះគឺ គ្មានការចាប់ឆ្នោតអ្វីទៀតនោះទេ ព្រោះការផ្គូផ្គងបានសម្រេចកាលពីព្រឹត្តិការណ៍ចាប់ឆ្នោតវគ្គ ៨ ក្រុមនាពាក់កណ្តាលខែមិនារួចមកហើយ។
ជាលទ្ធផលសម្រាប់ Chelsea នឹងត្រូវជួបរវាងក្រុម Real Madrid ឬ Liverpool ដោយរង់ចាំអុតមើលលទ្ធផលប្រកួតរបស់ពួកគេនៅព្រឹកថ្ងៃព្រហស្បតិ៍នេះ ដោយជើងទី ១ Real ស៊ី Liverpool ៣-១។ គិតតាមភាគរយជាក់ស្តែងគឺ Chelsea អាចនឹងជួប Real Madrid នៅវគ្គបន្ទាប់។
ដោយឡែក PSG ដែលបានទម្លាក់ក្រុមការពារជើងឯក គឺនឹងត្រូវជួបរវាងក្រុម Man City ឬ Dortmund ដោយចាំអុតមើលលទ្ធផលនៅជើងទី ២ នេះដូចគ្នា ខណៈជើងទី ១ City បានយកឈ្នះ ២-១ ទៅលើ Dortmund។ តាមការព្យាករណ៍ជាក់ស្តែងគឺ PSG អាចនឹងជួប Man City នៅវគ្គបន្ទាប់។
បែបនេះមានន័យថា PSG អាចនឹងប៉ះ Man City ហើយ Chelsea អាចនឹងប៉ះ Real Madrid នៅវគ្គពាក់កណ្តាលផ្តាច់ព្រ័ត្រ Champions League រដូវកាល ២០២០/២១៕