ក្រុមការពារជើងឯក Bayern Munich មិនអាចយកឈ្នះ ២-០ ទៅលើក្រុមបារាំង Paris Saint-Germain បាននោះឡើយនៅការប្រកួតជើងទី ២ នេះ ពោលគឺទទួលបានត្រឹមលទ្ធផល ១-០ នាំឲ្យពួកគេខកខានឱកាសឡើងទៅកាន់វគ្គបន្ទាប់ ពាក់កណ្ដាលផ្ដាច់ព្រ័ត្រ Champions League។
យ៉ាងណាបើយើងនិយាយនៅការប្រកួតជើងទី ២ នេះសុទ្ធសាធ ឃើញថា Bayern មានឱកាសច្រើន តែបញ្ចប់ទីបានត្រឹមមួយគ្រាប់ ដែលធ្វើបានដោយកីឡាករ Choupo-Moting នៅនាទី ៤០។ ដោយឡែកបើមកមើល PSG គឺដូចជាស៊យ ជាពិសេស Neymar ស៊ុតត្រូវបង្គោលទី ២ លើក ហើយរបូតឱកាសធំពេល Di Maria កាត់បាល់ផុតដៃអ្នកចាំទី ដែលកីឡាករប្រេស៊ីលប៊ិះតែអាចរកបាន Hat-Trick បើមានសំណាងបន្តិច។ ចំណែក Mbappe វិញ ទទួលបានឱកាសបីទៅបួនសារដែរ តែត្រូវបានអាជ្ញាកណ្ដាលលើកទង់ជាបាល់ Offside ពោលគឺប្រកួតមួយនេះ PSG ហាក់ដូចជាចាញ់ប្រៀប Bayern បើនិយាយអំពីសំណាង។
សរុបគ្រាប់បាល់ក្រោយបញ្ចប់ការប្រកួតជើងទី ២ គឺ ៣-៣ តែ PSG មានគ្រាប់បាល់ក្រៅដីចំនួន ៣ គ្រាប់ ខណៈ Bayern មានត្រឹម ១ គ្រាប់ បែបនេះនាំឲ្យក្រុមបារាំងអាចឡើងទៅកាន់វគ្គបន្ទាប់ ហើយ Bayern ត្រូវហាលអាវត្រឹមវគ្គ ៨ ក្រុមនេះ៕
ទស្សនាវីដេអូខាងក្រោម៖