យើងមិនច្បាស់នោះទេថាតើ Erling Haaland គេនឹងសម្រេចចិត្តផ្ទេរទៅចូលរួមនៅក្លឹបណាមួយ រវាងក្លឹបកំពូលជាច្រើនមានដូចជា Man City, Man Utd, Real Madrid, Barcelona ឬ Liverpool។ ប៉ុន្តែវាហាក់កំពុងមមាញឹកខ្លាំងសម្រាប់លោក Mino Raiola ព្រោះដើម្បីច្បាស់ថា តើក្លឹបណាមួយអាចមានលទ្ធភាពចំណាយលើថ្លៃពលកម្មដែលកីឡាករចង់បាន។
តាមរបាយការណ៍ចុងក្រោយពី The Mirror បានចុះផ្សាយថា ក្រៅពីតម្លៃខ្លួន ១៥៤ លានផោនដែល Dortmund កំណត់មកហើយនោះ ទៀតសោតលោក Raiola ក៏កំពុងរត់ការលើថ្លៃពលកម្មដ៏កប់ពពកមួយផ្សេងទៀតផងដែរ។ នោះគឺថ្លៃពលកម្មប្រមាណ ១ លានផោន/សប្តាហ៍ ដែលខ្ពស់ជាង Lionel Messi និង Cristiano Ronaldo ទៅទៀត។
សព្វថ្ងៃ Messi ជាកីឡាករស៊ីថ្លៃបំផុតលើលោក ដោយទទួលបាន ៥០០ ០០០ ផោន/សប្ដាហ៍ពីក្លឹប Barcelona ក្រោយកាត់កងថ្លៃបង់ពន្ធរួចរាល់។ បែបនេះបើ Haaland អាចស៊ីថ្លៃដល់ ១ លានផោន នោះគឺជារឿងដ៏អស្ចារ្យថ្មីមួយទៀតហើយក្នុងពិភពបាល់ទាត់។
គួររំឭកថា Haaland នៅរដូវកាលនេះ រកបាន ៣៩ គ្រាប់ក្នុងការបង្ហាញខ្លួន ៤១ ប្រកួតឲ្យក្លឹបនិងជម្រើសជាតិ ក្រោយពីរដូវកាលមុន ៣៨ ប្រកួត រកបាន ៣៨ គ្រាប់រាប់ទាំងនៅក្លឹបចាស់ Red Bull Salzburg៕
ប្រភព៖ Mirror