នៅចុងតង់ទី ២ នៃជំនួប El Clasico កាលពីយប់មិញ មានការប៉ះទង្គិចគ្នានៅប្រអប់គ្រោះថ្នាក់ រវាងកីឡាករ Martin Braithwaite និង Ferland Mendy ដោយផ្ទុះពាក្យចម្រូងចម្រាសថាហេតុអ្វីអាជ្ញាកណ្តាលមិនផ្តល់បាល់ ១១ ម៉ែត្រឲ្យឬ បើកការត្រួតពិនិត្យប្រព័ន្ធ VAR។
យ៉ាងណាអាជ្ញាកណ្តាលក៏បានចេញមកបកស្រាយហើយ ដោយលោក Juan Andujar Oliver បានប្រាប់ Radio Marca បែបនេះថា៖ “អាជ្ញាកណ្តាលគឺសម្រេចចិត្តត្រឹមត្រូវ ដោយពិតណាស់មានការទាញពី Mendy ពិតមែន តែកម្រិតនៃការទាញនោះមិនទាន់គ្រប់គ្រាន់នឹងអាចផ្តល់បាល់ប៉េណាល់ទីនោះឡើយ”។
ប៉ុន្តែខាងភាគី Barcelona នៅតែមិនអស់ចិត្ត ហើយទាំងលោក Ronald Koeman ក៏បាននិយាយប្រាប់អ្នកសារព័ត៌មានក្រោយចប់ការប្រកួតដែរថា៖ “វាសមតែជាបាល់ប៉េណាល់ទី”។
បញ្ជាក់ថា គិតត្រឹមជុំទី ៣០ Real Madrid បានរំកិលឡើងមកឈរលេខ ១ បណ្ដោះអាសន្ន ដោយមាន ៦៦ ពិន្ទុ តែប្រសិនណា Atletico Madrid អាចតាមស្មើឬយកឈ្នះ Real Betis នៅយប់នេះ នោះចំណាត់ថ្នាក់នឹងមានការប្រែប្រួលវិញ៕
ប្រភព៖ Marca