បើតាមប្រភពពីភ្នាក់ងាររបស់ Yaya Toure បានបញ្ជាក់ថា កីឡាកររូបនេះបានពិនិត្យសុខភាពជោគជ័យហើយនៅក្លឹបមួយនៅទីក្រុងឡុងប្រទេសអង់គ្លេស ដែលលេងនៅលីគកំពូល។
ខ្សែបម្រើខាងលើ បានអស់កុងត្រាជាមួយក្រុម Manchester City ហើយចាកចេញពីក្រុមតែម្ដង បន្ទាប់ពីមានបញ្ហាជាមួយអ្នកចាត់ការ Pep ។ ក្រោយពីចាកចេញទៅនេះដែរ ពួកគេទាំងពីរនាក់ក៏តែងតែដៀមដាមគ្នាជាញឹកញាប់ផងដែរ ចំពោះការងារធ្វើជាមួយគ្នានៅក្លឹបមេឃខៀវ។ យ៉ាងណាមិញ ក្រោយពីចាកចេញទៅនេះដែរ កីឡាករវ័យ៣៥ឆ្នាំនេះនៅមិនទាន់រកឃើញក្លឹបលេងឡើយ។
បើតាមលោក Dimitry Seluk ដែលជាភ្នាក់ងារទីផ្សាររបស់ Yaya បានបញ្ជាក់ថាម្សិលមិញនេះ រូបគេបានទៅពិនិត្យសុខភាពរួចរាល់ហើយនៅក្លឹបមួយក្នុងទីក្រុងឡុង។ ចំពោះក្លឹបនេះដែរ គេមិនបានបង្ហាញឈ្មោះឡើយ ដោយគ្រាន់តែបញ្ជាក់ថាមិនមែន Crystal Palace ឬ West Ham ឡើយ៕ប្រភព៖ dailymail