នៅការប្រកួតជើងទី ១ Champions League វគ្គ ៨ ក្រុម យើងរកឃើញ ២ ក្រុមហើយដែលមានទឹកមាត់លេប នោះគឺ Real Madrid និង Manchester City។
សម្រាប់ Real Madrid បានយកឈ្នះទៅលើ Liverpool ក្នុងកីឡដ្ឋាន Afredo di Stefano ដោយលទ្ធផល ៣-១ ស្របពេលដែល Man City បានយកឈ្នះទៅលើ Borussia Dortmund ដោយលទ្ធផល ២-១ នៅកីឡដ្ឋាន Etihad។
ជឿថាប្រិយមិត្តមួយចំនួនមិនទាន់ជាយល់ច្បាស់នោះទេ អំពីការប្រកួតជម្រុះបែបនេះ ដោយចង់ដឹងថាតើគិតទាំងគ្រាប់បាល់ក្នុង/ក្រៅដី រវាងក្រុម Liverpool និង Dortmund ដែលចាញ់នៅជើងទី ១ ពួកគេត្រូវការលទ្ធផលបែបណាដើម្បីឆ្ពោះទៅកាន់វគ្គបន្ទាប់?
ជាការពិតសម្រាប់ Liverpool ដែលចាញ់ ៣-១ នៅដីអេស្ប៉ាញ នៅជើងទី ២ សប្តាហ៍ក្រោយនេះ គឺត្រូវការលទ្ធផលឈ្នះ ២-០ ដើម្បីធានាបាន ១០០ ភាគរយនឹងឆ្ពោះទៅកាន់វគ្គបន្ទាប់។ យើងរាប់ទៅឃើញលទ្ធផលស្មើ ៣-៣ ប៉ុន្តែគេគិតគ្រាប់បាល់ក្រៅដីគឺហង្សរកបាន ១ គ្រាប់ពេលនៅទឹកដីរបស់ Real អ៊ីចឹងហង្សនឹងឡើងទៅវគ្គបន្ទាប់។ ប៉ុន្តែបើក្នុងករណី Liverpool ស៊ី ៣-១ ដូចគ្នានោះ គឺគ្រាប់បាល់នឹងស្មើ ៤-៤ ហើយទាំងគ្រាប់បាល់ក្រៅដីក៏ស្មើគ្នា អ៊ីចឹងនឹងបន្ថែមម៉ោង ១៥ នាទីពីរដង ឬឈានដល់បាល់ប៉េណាល់ទី។
ចំណែកឯ Borussia Dortmund ដែលចាញ់ ២-១ នៅដីអង់គ្លេស នៅជើងទី ២ សប្ដាហ៍ក្រោយ គឺពួកគេត្រូវការលទ្ធផល ១-០ ទៅលើ Man City នោះក៏អាចធានាបាននៅកៅអីទៅកាន់វគ្គបន្ទាប់ដែរ ត្បិតបើលទ្ធផលសរុបពីរជើង ២-២ តែ Dortmund ចំណេញគ្រាប់បាល់ក្រៅដី ១ គ្រាប់។ ផ្ទុយទៅវិញនៅករណីដែលលទ្ធផលចេញមក Dortmund ស៊ីវិញ ២-១ នោះនឹងត្រូវបន្ថែមម៉ោង ១៥ នាទីពីរដង ឬអាចឈានដល់បាល់ប៉េណាល់ទីអ៊ីចឹងដែរ៕