កាលពីថ្ងៃទី ២៨ មិនា ឆ្នាំ ២០២១ អ្នកវាយក្បាច់គុណចម្រុះ Francis Ngannou បានធ្វើឲ្យពិភពលោកមានការសាទរជាខ្លាំង បន្ទាប់ពីយកឈ្នះទៅលើ Stipe Miocic ដោយលទ្ធផល K.O នៅតឹកទី ២ហើយបានក្លាយជាម្ចាស់ខ្សែក្រវាត់ទម្ងន់ធ្ងន់ UFC Heavyweight Championship ជាលើកដំបូងក្នុងអាជីព។
មុនឆ្លងកាត់ទទួលបានជោគជ័យដូចសព្វថ្ងៃនេះ អត្តពលិកសញ្ជាតិកាមេរ៉ូនធ្លាប់ហែលកាត់ការលំបាករាប់ភ្លេច ដោយមានតាំងពីការទៅធ្វើការនៅកន្លែងជីកខ្សាច់តាំងពីអាយុ ១០ ឆ្នាំ និងធ្លាប់ជាមនុស្សគ្មានលុយមួយសេន្ត ហើយប៊ិះតែអស់ជីវិតនៅពេលលួចឆ្លងដែនទៀតផង។
ក្នុងវីដេអូនេះ ទំព័រ CTS Sports នឹងបង្ហាញអំពីប្រវត្តិដ៏កម្សត់កម្ររបស់ Ngannou មុនគេអាចកែប្រែជោគវាសនា ឲ្យក្លាយជាបុគ្គលជោគជ័យនិងអាចបំពេញក្តីស្រមៃរបស់ខ្លួន។
១) ដើមកំណើតនិងការចាប់ផ្ដើមនៃជីវិត
Francis Ngannou កើតនៅថ្ងៃទី ៥ កញ្ញា ឆ្នាំ ១៩៨៦ ក្នុងភូមិតូចមួយនៃប្រទេសកាមេរ៉ូន។ គេកើតក្នុងទ្រនំគ្រួសារក្រខ្សត់ ដែលធ្លាប់មានឪពុកប្រើប្រាស់អំពើហិង្សាមកលើខ្លួននិងម្ដាយ មុនសម្រេចលែងលះគ្នានៅពេល Ngannou មានអាយុ ៦ ឆ្នាំ។
ដោយសារជីវភាពខ្វះខាតខ្លាំង Ngannou បានសម្រេចចិត្តចាកចេញពីគ្រួសារតាំងពីនៅក្មេងខ្ចី ហើយផ្ទេរទៅរស់នៅជាមួយមីងនៅអាយុ ១០ ឆ្នាំក្នុងតំបន់មួយផ្សេងទៀត។ ពេលនោះ Ngannou ចាប់ផ្តើមចេះរៀនរកលុយ ដោយប្រើកម្លាំងប្តូរយកបាយ តាមរយៈការបម្រើការនៅកន្លែងជីកយកខ្សាច់និងរ៉ែ ដែលជាទូទៅការងារនេះជាការងារធ្ងន់ ប្រឈមគ្រោះថ្នាក់ខ្លាំងណាស់សម្រាប់កុមារ។
ប៉ុន្តែដោយសារជីវភាពខ្វះខាត និងចេះមានចិត្តគិតពីម្តាយតាំងពីនៅក្មេងវ័យ Ngannou ក៏បានខិតខំធ្វើការគ្មានថ្ងៃសម្រាក ដោយសុំគេធ្វើថែមម៉ោងទាំងថ្ងៃចុងសប្ដាហ៍ និងថ្ងៃបុណ្យ ដើម្បីតែបានថវិកាបន្តិចបន្តួចទៅជួយផ្គត់ផ្គង់ដល់ម្តាយដែលជាស្រ្តីមេម៉ាយ និងមួយផ្នែកតូចទុកផ្គត់ផ្គង់ខ្លួនឯងសម្រាប់ការសិក្សា។ នៅពេលនោះប្រព័ន្ធសិក្សាក្នុងប្រទេសកាមេរ៉ូនមិនទាន់ធំទូលាយខ្លាំងឡើយ ហើយ Ngannou ត្រូវថ្មើរជើងរយៈពេល ២ ម៉ោងដើម្បីទៅដល់សាលា។ យ៉ាងណាដោយសារទាល់ខ្លាំងពេក គេត្រូវបង្ខំចិត្តបោះបង់ការសិក្សា ត្រឹមអាយុ ១៧ ឆ្នាំ។
នៅកិច្ចសម្ភាសន៍មួយ Nganou ធ្លាប់បាននិយាយ៖ “ជីវិតខ្ញុំកាលនៅកុមារភាពមិនសប្បាយដូចក្មេងឯទៀតនោះទេ ដោយខ្ញុំពិតជាឲ្យតម្លៃជីវិតក្មេងឯទៀតខ្លាំងណាស់ ដោយគេមានមិត្តភ័ក្ដិ មានរបស់របរលេងជាច្រើន តែខ្ញុំវិញគឺគ្មានអ្វីទាំងអស់ ដែលវាប្រៀបបាននឹងបាត់បង់ផ្នែកមួយនៃជីវិតអ៊ីចឹង”។
២) ការធ្វើចំណាកស្រុក
ដោយសារខ្វះខាតខ្លាំង ហើយលុយដែលទទួលបានពីការជីកខ្សាច់ មិនគ្រប់គ្រាន់ក្នុងការចាយវាយ និងថ្លៃចំណាយព្យាបាលជំងឺផ្សេងៗ Ngannou ក៏សម្រេចចិត្តស្វែងរកជីវិតថ្មី ហើយជឿថាបើបន្តរស់នៅកាមេរ៉ូន ជីវិតរបស់គេនឹងមិនអាចល្អប្រសើរបានឡើយ។
ក្តីស្រមៃក្នុងចិត្តរបស់គេ គឺធ្វើយ៉ាងណាផ្ទេរទៅរស់នៅសហរដ្ឋអាមេរិកឲ្យបាន ដើម្បីចង់ក្លាយជាអ្នកវាយក្បាច់គុណចម្រុះដ៏អស្ចារ្យមួយ។ នៅដំណាក់កាលដំបូងមុននឹងទៅដល់សហរដ្ឋអាមេរិកបាន គេត្រូវឆ្លងកាត់ប្រទេសនីហ្សេរីយ៉ា ព្រោះប្រទេសនោះមានព្រំដែនបើកចំហជាមួយនឹងកាមេរ៉ូន ប៉ុន្តែពេលទៅដល់នីហ្សេរីយ៉ា Ngannou ត្រូវបានមន្រ្តីព្រំដែនហៅមកដកហូតរបស់ទាំងអស់ អស់ពីខ្លួនមិនថាតែលុយកាក់បន្តិចបន្តួចដែលមានជាប់ខ្លួន និងរបស់សំខាន់មួយចំនួន។
គេគ្មានអ្វីទៀតនោះទេ គឺអស់ពីខ្លួនហើយ ប៉ុន្តែក្តីស្រមៃរបស់គេនៅតែមិនបោះបង់ ដោយគេបន្តថ្មើរជើងឆ្លងកាត់វាលខ្សាច់សាហារ៉ា ដើម្បីឆ្ពោះទៅកាន់ប្រទេសអាល់ហ្សេរី។ នៅពេលមួយនោះគេស្រេកទឹកខ្លាំងណាស់ ដោយខ្សោះទឹកអស់ពីខ្លួនហើយ បែបនេះគេក៏សម្រេចទៅត្រងទឹកពីអណ្តូងមួយ ដែលមានសភាពកខ្វក់ខ្លាំងបំផុត ព្រោះមានសត្វជាច្រើនងាប់នៅក្នុងនោះ។
Ngannou ធ្លាប់បាននិយាយពីរឿងនេះថា៖ “ខ្ញុំផឹកទឹកហ្នឹងហើយ អាចនឹងឈឺស្លាប់ តែបើខ្ញុំមិនផឹក ក៏ខ្ញុំប្រឈមនឹងស្លាប់ដែរ បែបហ្នឹងខ្ញុំមានតែប្រថុយផឹកវាហើយ”។
គោលដៅបន្ទាប់គឺគេត្រូវបម្លាស់ទីទៅប្រទេសម៉ារ៉ុក មុននឹងទៅប្រទេសអេស្ប៉ាញ។ ក្នុងកំឡុងពេលនោះគេត្រូវលាក់ខ្លួនក្នុងព្រៃ ដើម្បីគេចខ្លួនពីមន្ត្រីអន្តោប្រវេសន្ត ហើយដើររើសអាហារតាមធុងសំរាមគ្រាន់បានមកចម្អែតក្រពះ។ យ៉ាងណាមន្ត្រីអន្តោប្រវេសន្តធ្លាប់ចាប់គេបាន ៦ ដង ហើយតាមច្បាប់កាលនោះក្រោយពេលចាប់បាន គឺត្រូវដឹកជនដែលលួចឆ្លងដែនទៅទម្លាក់ចោលនៅវាលខ្សាច់ក្នុងប្រទេសអាល់ហ្សេរី។ ប៉ុន្តែគេមិនបោះបង់ឡើយ គេនៅតែបន្តដើរតាមក្តីស្រមៃ ហើយឆ្លងកាត់វាលខ្សាច់នោះម្ដងហើយម្ដងទៀត ទម្រាំតែអាចគេចខ្លួនមកដល់ប្រទេសអេស្ប៉ាញ។
៣) ពន្លឺនៃក្តីស្រមៃបានបំភ្លឺឡើងក្នុងប្រទេសបារាំង
ក្រោយទៅដល់ប្រទេសអេស្ប៉ាញ Ngannou បានទៅសុំទូកគេជិះ ដោយលាក់ខ្លួនក្នុងទូកដឹកក្រដាសអាលុយមីញ៉ូម ដើម្បីអាចឆ្លងផុតភ្នែកមន្ត្រីអន្តោប្រវេសន្តមកដល់ប្រទេសបារាំង។ ប៉ុន្តែមិនស្រួលដូចការគិតនោះទេ មកដល់ទីនេះភ្លាម គេត្រូវបានឃុំខ្លួនក្នុងគុកអស់រយៈពេល ២ ខែ ហើយក្រោយចេញពីគុក គេបានទៅដេកតាមចិញ្ចើមផ្លូវ និងកន្លែងចំណតរថយន្ត ទម្រាំបានមានឱកាសមកទទួលការហ្វឹកហាត់ពីលោកគ្រូដែលមានចិត្តធម៌និងសមត្ថភាពមួយរូប នៅវិស័យក្បាច់គុណចម្រុះ MMA។
៤) ភាពជោគជ័យចាប់ផ្ដើមកើតមានឡើង
ក្រោយឆ្លងកាត់ការលំបាកជាច្រើន ទីបំផុតនៅខែវិច្ឆិកា ឆ្នាំ ២០១៣ Ngannou បានមានឱកាសឡើងសង្វៀនជាលើកដំបូង ហើយទទួលបានជ័យជម្នះ។ ឆ្លងកាត់ ១៩ ប្រកួតក្នុងអាជីព គេឈ្នះ ១៦ និងចាញ់ ៣ ហើយធ្លាប់ផ្តួលគូប្រកួតឲ្យសន្លប់ដៅ ១២ លើក និងជាប់ឈ្មោះជាអ្នកប្រើកណ្ដាប់ដៃមហាទម្ងន់នៅសង្វៀន UFC។
កាលពីថ្ងៃទី ២៨ មិនា ឆ្នាំ ២០២១ ក្នុងទីក្រុង Las Vegas បុរសវ័យ ៣៤ ឆ្នាំ បានយកឈ្នះ Stipe Miocic នៅកម្មវិធី UFC 260 និងក្លាយជាម្ចាស់ក្រវាត់ទម្ងន់ធ្ងន់ UFC Heavy Weight Championship។
ពីបុរសដែលរើសអាហារតាមធុងសំរាមហូប និងផឹកទឹកដែលសល់ពីសាកសពសត្វ ចុងក្រោយ Ngannou បានក្លាយជាបុគ្គលជោគជ័យមួយ ដែលកំពុងក្ដោបក្ដាប់ទ្រព្យសម្បត្តិច្រើនជាង ៥ លានដុល្លារ ហើយគេក៏បានផ្លាស់ប្ដូរជីវិតម្ដាយ ដោយនាំគាត់មកសោយសុខនៅទីក្រុង Las Vegas។
៥) ការមិនភ្លេចស្រុកកំណើត
Ngannou បាននិយាយថាគេ មិនទម្លាប់នឹងរស់នៅលើគំនរទ្រព្យ ជីវិតហ៊ឺហាជាមួយសណ្ឋាគារលំដាប់ផ្កាយ ៥ អ្វីនោះទេ ដោយគេនឹងវិលត្រលប់ទៅស្រុកកំណើត ដើម្បីជួយជនដែលខ្វះខាតនិងក្មេងៗដែលគ្មានទីពឹងដូចជាអតីតកាលរបស់គេវិញ។
គេបានបង្កើត មូលនិធិ Francis Ngannou ដើម្បីបើកកន្លែងហ្វឹកហាត់មួយនៅស្រុកកំណើត ក្នុងប្រទេសកាមេរ៉ូន លើគោលដៅជួយក្មេងៗដែលខ្វះខាត និងចង់ដើរតាមក្តីស្រមៃក្លាយជាអ្នកវាយក្បាច់គុណចម្រុះ។
សរុបមកដំណើរផ្សងព្រេងរបស់ Ngannou គឺបានបង្ហាញឲ្យយើងឃើញច្បាស់ៗថា “អ្វីដែលអ្នកចង់បានបំផុតក្នុងជីវិត មិនថាលំបាកប៉ុណ្ណា ឲ្យតែអ្នកដាក់បេះដូងនិងចិត្តលើកន្លែងដែលត្រូវទៅ នោះចុងក្រោយភាពជោគជ័យប្រាកដជានឹងកើតមានក្នុងជីវិតរបស់អ្នក”៕
ហាមយកអត្ថបទរបស់ CTS Sports ទៅចុះផ្សាយបន្ត!