Angel di Maria បានចេញមុខមកនិយាយសារជាថ្មី ជុំវិញអនាគតរបស់ Lionel Messi ដែលស្ថិតក្នុងមន្ទិលសង្ស័យ ដោយគេបាននិយាយពាក្យកោតសរសើរជាច្រើន នាំឲ្យមានការជឿជាក់ថា M10 ក៏នៅតែមានភាគរយអាចផ្ទេរមកក្លឹបបារាំង។
ខ្សែប្រយុទ្ធស្លាបរបស់ PSG បាននិយាយប្រាប់ BeIN Sports ថ្មីៗនេះថា៖ “ក្នុងអាជីពរបស់ខ្ញុំ រឿងដែលខ្ញុំធ្លាប់បានជួប គឺខ្ញុំគិតថា Leo ជាមនុស្សក្រៅភព ហើយការដែលមានគេជាមិត្តរួមក្រុមគឺជារឿងដ៏អស្ចារ្យបំផុត”។
លោកបន្តថា៖ “តែគាត់ជាកីឡាករ Barcelona ពេលនេះ គាត់នៅជាប់កុងត្រា តែរឿងបន្ទាប់យើងនឹងរង់ចាំមើល ដោយខ្ញុំតែងតែនិយាយរឿងជាច្រើនអំពីគាត់ គ្រាន់ថាការសម្រេចចិត្តរបស់គាត់ គឺឲ្យតែជាក្តីរីករាយសម្រាប់គាត់និងគ្រួសារគឺល្អបំផុតហើយ”។
រំឭកថា M10 ត្រូវផុតកុងត្រាជាមួយ Barca នៅចុងខែមិថុនា ឆ្នាំ ២០២១ ហើយដំណឹងបន្តកុងត្រាថ្មីរបស់ Messi នឹងសម្រេចចេញជាសាធារណៈយូរបំផុតត្រឹមខែឧសភាខាងមុខ៕
ប្រភព៖ AF