ការប្រកួត UEFA Champions League វគ្គ ៨ ក្រុមចុងក្រោយ នឹងឈានចូលមកដល់ទៀតហើយនៅពាក់កណ្ដាលសប្ដាហ៍នេះ ដោយនៅយប់រំលងអាធ្រាត្រថ្ងៃទី ៧ នឹងមានការប្រកួតរវាង Real Madrid-Liverpool ហើយ Man City-Dortmund និងរំលងដល់ថ្ងៃទី ៨ គឺជំនួប Bayern-PSG និង Porto-Chelsea ដែលនឹងមានផ្សាយផ្ទាល់លើទំព័រ CTS Sports។
ជឿថាប្រិយមិត្តមួយចំនួនបានដឹងខ្លះៗរួចមកហើយ អំពីព័ត៌មាននៃសមាសភាពកីឡាករដែលអាចនឹងខកខានចូលរួមការប្រកួត តួយ៉ាងដូចជា Real ត្រូវអវត្តមានខ្សែការពារសំខាន់ Sergio Ramos ខណៈដែល Bayern អវត្តមានម៉ាស៊ីនបញ្ចប់ទី Robert Lewandowski។
ក្នុងអត្ថបទនេះ យើងនឹងធ្វើការវិភាគដោយបង្ហាញនូវស្ថិតិ ការព្យាករណ៍ និងព័ត៌មានមួយចំនួនដែលអ្នកគួរដឹងអំពីគូនីមួយៗ៖
១) Real Madrid ប៉ះ Liverpool
ដូចអ្នកបានដឹងស្រាប់ហើយ ក្រុមអេស្ប៉ាញនឹងត្រូវអវត្តមានខ្សែការពារសំខាន់ Ramos ហើយនៅតំបន់ប្រយុទ្ធក៏មិនទាន់ប្រាកដនោះដែរថា Eden Hazard អាចត្រៀមខ្លួនទាន់ពេលឬអត់?
នៅវគ្គ Knockout ក្រុមហង្សក្រហម Liverpool ធ្លាប់ផ្តល់មេរៀនដ៏គួរឲ្យចងចាំមួយសម្រាប់ Real កាលពីរដូវកាល ២០០៨/០៩ ដោយនោះគឺយកឈ្នះទាំងពីរជើង ៥-០ ដែលវាអាចរាប់ថាជាការចាញ់ច្រើនគ្រាប់បំផុតនៅការប្រកួតពីរជើង វគ្គ Knockout ក្នុងប្រវត្តិសាស្ត្ររបស់ Real Madrid។ ដោយឡែកលើកចុងក្រោយដែលក្រុមទាំងពីរជួបគ្នានៅ UCL គឺនៅវគ្គផ្ដាច់ព្រ័ត្រឆ្នាំ ២០១៨ ដែលកាលនោះ Liverpool ចាញ់ ៣-១ គ្រាត្រូវខកខានការឈរជើងរបស់ Salah តាំងពីដើមតង់។
លទ្ធផលព្យាករណ៍នៅរដូវកាលនេះវិញ តាម FiveThirtyEight បានបង្ហាញថា Liverpool សង្ឃឹមខ្ពស់ជាងដល់ទៅ ៥៤ ភាគរយក្នុងឆ្ពោះទៅកាន់វគ្គបន្ទាប់ ខណៈ Real Madrid មានត្រឹម ៤៦ ភាគរយ។
២) Man City ប៉ះ Dortmund
នៅ Champions League ជួបគ្នា ២ លើក Man City មិនទាន់ស្គាល់ពាក្យថាឈ្នះ Dortmund នោះទេ ដោយត្រឹមបន្សល់ការចងចាំស្មើ ១ ចាញ់ ១ កាលពីរដូវកាល ២០១២/១៣ នៅវគ្គចែកពូល។
យ៉ាងណាសម្រាប់ City ប្រវត្តិធ្លាប់ជួបក្រុមអាល្លឺម៉ង់ ១១ ប្រកួតចុងក្រោយនៅ UCL គឺពួកគេឈ្នះ ១០ ប្រកួតទៅហើយ រីឯ Dortmund ការឡើងមកកាន់វគ្គ Quater-Final គឺពួកគេខកខានតាំងពីរដូវកាល ២០១៦/១៧ មកម្ល៉េះ ដោយលើកចុងក្រោយចាញ់ Monaco ៦-៣។
បើមើលតាមស្ថិតិការលេងក្នុងលីគនារយៈពេលចុងក្រោយ យើងឃើញហើយថា City មានប្រៀបជាង ខណៈដែលសមាសភាពកីឡាករដែលត្រូវចូលរួមប្រកួតនៅពេលខាងមុខ ក៏ពេញជើងល្អទៀត អ៊ីចឹងភាគរយក្នុងការឆ្ពោះទៅកាន់វគ្គបន្ទាប់របស់ Dortmund គឺប្រាកដជាមានទាប។
តាមការព្យាករណ៍ពីប្រភពខាងលើដដែល គឺ City សង្ឃឹម ៨២ ភាគរយ ខណៈ Dortmund សង្ឃឹមទាបណាស់ ដោយត្រឹម ១៨ ភាគរយប៉ុណ្ណោះ។
៣) Bayern ប៉ះ PSG
នេះគឺជាគូសងសឹក រវាងក្រុមការពារជើងឯក និងក្រុមជើងឯករងកាលពីឆ្នាំចាស់។ សារនេះជាការជួបគ្នាលើកទី ១០ ហើយរវាងក្រុមអាល្លឺម៉ង់ Bayern Munich និងក្រុមបារាំង PSG ដោយកន្លងមក Bayern ឈ្នះ ៤ ហើយ PSG ឈ្នះ ៥។
បញ្ជាក់ថា Bayern Munich បានក្លាយជាក្រុមមិនទាន់ស្គាល់ពាក្យថា ចាញ់ ១៩ ប្រកួតជាប់ៗគ្នានៅរយៈពេលចុងក្រោយ Champions League ដោយឈ្នះ ១៨ ស្មើ ១ ហើយពួកគេអាចនឹងក្លាយជាក្រុមទីពីរក្នុងលោក ដែលអាចបន្តដល់ប្រកួតទី ២០ ដោយកំណត់ត្រាក្រុមទី ១ គឺ Man Utd ធ្វើបាន ២៥ ប្រកួតចន្លោះឆ្នាំ ២០០៧ ដល់ ២០០៩។
យ៉ាងណាអ្វីដែលជាក្តីបារម្ភសម្រាប់ Bayern នៅវគ្គនេះ គឺការដែលអវត្តមានខ្សែប្រយុទ្ធសំខាន់ Robert Lewandowski ខណៈខាង PSG គឺគេពេញជើងល្អណាស់ តាំងពីតំបន់ខាងក្រោមដល់លើ។
ប៉ុន្តែបើមើលតាមការលេងនៅចុងសប្តាហ៍នេះ ឃើញថា PSG ហាក់ធ្វើមិនបានល្អទាល់តែសោះ ដោយចាញ់ Lille ១-០ ស្របពេលដែល Bayern នៅតែអាចយកឈ្នះ Leipzig។ តាមការព្យាករណ៍ Bayern នៅតែមានប្រៀបជាង ដោយសង្ឃឹម ៦៧ ភាគរយ ខណៈ PSG សង្ឃឹម ៣៣ ភាគរយ។
៤) Chelsea ប៉ះ Porto
បើមើលតែឈ្មោះ អ្នកប្រាកដជាគិតហើយ ថាជាក្រុមគីឡូធ្ងន់ ប៉ះគីឡូមធ្យម តែបើមើលតាមស្ថិតិ គឺ Chelsea នៅតែមានភាគរយខ្ពស់ជាងពិតមែន។ បើលើករឿងចាញ់ West Brom ៥-២ កាលពីចុងសប្តាហ៍ មកនិយាយគឺមិនអាចយកមកស៊ីសងគ្នាបានទេ ព្រោះ Chelsea ត្រូវលេង ១០ ទល់ ១១ រយៈពេលជាង ៦០ នាទីពេញ។
បង្វែរទៅមើលស្ថិតិនៅ UCL ផ្ទាល់ យើងឃើញថា Porto ៨ ប្រកួតប៉ះ Chelsea គឺចាញ់ដល់ទៅ ៥ ហើយធ្លាប់ឈ្នះ ២ និងស្មើ ១។ ស្របពេលដែល Chelsea វិញ ការលេងប៉ះក្រុមនៅព័រទុយហ្គាល់គឺមាន ៧៥ ភាគរយដែលពួកគេឈ្នះ។
ជាមួយសមត្ថភាពដឹកនាំរបស់លោក Thomas Tuchel គឺគេនៅតែជឿថា លោកនឹងអាចកែប្រែស្ថានការណ៍ត្រលប់មកវិញបាន នៅការប្រកួត UCL នាពេលខាងមុខ។ តាមការព្យាករណ៍ Chelsea សង្ឃឹម ៨០ ភាគរយ ខណៈ Porto មានតែ ២០ ភាគរយប៉ុណ្ណោះ។ ចុះការយល់ឃើញរបស់អ្នករាល់គ្នាវិញ តើ ៤ គូខាងលើ គិតថាក្រុមណាខ្លះដែលអាចឡើងទៅវគ្គបន្ទាប់?
ប្រភព៖ FiveThirtyEight