ជើងខ្លាំងគុនចម្រុះហ្វីលីពីន Danny Kingad បានវិភាគជំនួបដណ្តើមខ្សែក្រវាត់គុនចម្រុះពិភពលោក ONE Flyweight រវាងម្ចាស់ខ្សែក្រវាត់ Adriano “Mikinho” Moraes និងអ្នកដណ្តើម Demetrious “Mighty Mouse” Johnson នៅព្រឹត្តិការណ៍ “ONE on TNT I” ថ្ងៃពុធ ទី៧ ខែមេសា។
សម្រាប់កីឡាករទាំងពីរនាក់សុទ្ធតែដៃគូចាស់របស់ “The King”ដែលធ្លាប់ប្រកួតជាមួយរូបគេ ហើយស្គាល់ច្បាស់ពីសមត្ថភាពរបស់កីឡាករទាំងពីរនាក់នេះ។ សម្រាប់ជំនួបនេះនឹងផ្សាយផ្ទាល់ទៅកាន់ម៉ោងមាសនៅសហរដ្ឋអាមេរិកដែលត្រូវបានកីឡាករហ្វីលីពីនគិតថា នឹងល្អមើលខ្លាំង។
កីឡាករនិយាយថា ៖«មែនទែនទៅ ជំនួបនេះពិបាកស្មានណាស់។ យើងពិតជាពិបាកនិយាយទុកមុខថា នរណានឹងឈ្នះ។ ធ្លាប់ប្រកួតជាមួយពួកគាត់ ដូច្នេះខ្ញុំស្គាល់ពួកគាត់ ហើយអាចនិយាយបានថា ពួកគាត់ពិតជាកីឡាករខ្លាំងដូចគ្នា»។
Kingad ទទួលបានបទពិសោធច្រើននៅពេលប្រកួតជាមួយ Johnson។ កីឡាករអាយុ២៥ឆ្នាំបានប្រកួតជាមួយ “Mighty Mouse” នៅវគ្គផ្តាច់ព្រ័ត្រខ្សែក្រវាត់ ONE Flyweight World Grand Prix ដែលរូបគេចាញ់កីឡាករអាមេរិកដោយពិន្ទុប៉ុណ្ណោះ បន្ទាប់ពីតស៊ូគ្នា៥ទឹក។
Kingad និយាយថា ៖«គាត់ជាជើងខ្លាំងគ្រប់សម័យកាល (GOAT)។ គាត់ពិតជាមានបច្ចេកទេសល្អ ហើយគាត់លឿនណាស់។ វាពិតជាពិបាកខ្លាំងដើម្បីលេងក្បាច់ក្រោមជជាមួយគាត់»។
ជាមួយគ្នា កីឡាករហ្វីលីពីនក៏បានប្រកួតជាមួយ Moraes ដើម្បីដណ្តើមខ្សែក្រវាត់ពិភពលោក ONE Flyweight កាលពីឆ្នាំ២០១៧ដែលពេលនោះរូបគេទើបមានអាយុ២២ឆ្នាំប៉ុណ្ណោះ។
សម្រាប់ការប្រកួតនោះ Kingad មិនបានតស៊ូជាមួយតារាប្រេស៊ីលយូរទេ ដោយត្រូវបានម្ចាស់ខ្សែក្រវាត់ប្រើក្បាច់រឹត-កឲ្យចុះចាញ់ក្នុងទឹកទី១ ប៉ុន្តែគាត់ជឿថា នៅពេលនោះមិនដូចពេលនេះទេ។
«នៅពេលខ្ញុំប្រកួតជាមួយ Moraes គឺយូរដែរហើយ ហើយឥឡូវនេះគាត់ខុសប្លែកពីមុនច្រើន»។ កីឡាករមកពីក្លឹប Team Lakay បាននិយាយ។
«ខ្ញុំគិតថា ខ្ញុំមានពេលខ្លី។ ពេលនោះមិនបានត្រៀមខ្លួនល្អសម្រាប់ទប់ទល់នឹងក្បាច់ក្រោមរបស់គាត់ទេ។ អីចឹងហើយបានជាការប្រកួតនោះបញ្ចប់លឿន»។
Kingad ជឿថា Moraes រីកចម្រើនខ្លាំងដែរចាប់តាំងពីពួកគេប្រកួតគ្នា។ លើសពីនេះទៀត គាត់គិតថា កីឡាករប្រេស៊ីលមានអាវុធសំខាន់ដែលអាចបង្អាក់ Johnson បាន នោះគឺក្បាច់វ៉ៃពីចម្ងាយដែលអាចរារាំងដល់ការសម្រុកចូលអោប។
Kingad និយាយថា ៖«គិតថា គាត់មានប្រៀបវ៉ៃពីចម្ងាយ ដោយសារគាត់ដៃជើងវែង។ គាត់ជាជើងឯក អីចឹងគ្មានហេតុផលណាដែលគាត់មិនល្អទេ»។
«គាត់ជាជើងឯកពិភពលោកម្នាក់ ដូច្នេះបើគាត់មិនខ្លាំង មិនមែនក្លាយជាជើងឯកទេ។ រឿងមួយគួរឲ្យកត់សំគាល់បំផុតអំពីគាត់គែក្បាច់ក្រោម។ គាត់អាចកំដរ Johnson បាន»។
ពិតណាស់ ការប្រកួតជាមួយ Johnson ពិតជាខុសគ្នាឆ្ងាយសម្រាប់គាត់។ កីឡាករហ្វីលីពីនបាននិយាយពីលក្ខណៈពិសេសរវាង “Mighty Mouse” និង “Mikinho”។
Kingad ថា ៖«ភាពខុសគ្នារវាងអ្នកទាំងពីរល្បឿន ហើយខ្ញុំអាចនិយាយបានថា Johnson លឿនជាង ទាំងកាយសម្បទា និងស្មារតី»។
«នោះជាអ្វីដែលគាត់មានលក្ខណៈពិសេសខ្លាំង។ គាត់តែងតែដើរឆ្ពោះទៅរកដៃគូ។ គាត់គិតលឿន ចលនាផ្លាស់ទីលឿន ហើយដឹងពីអ្វីដែលគាត់ត្រូវធ្វើ និងដឹងពីអ្វីដែលដៃគូត្រូវធ្វើ»។
នៅពេលសួរឲ្យគាត់ធ្វើការព្យាករ កីឡាករហ្វីលីពីនមិនបានទុកចិត្តទៅលើ Moraes ដែលបញ្ឈប់គាត់ក្នុងទឹកទី១ទេ ប៉ុន្តែទុកចិត្តលើ Johnson ដែលយកឈ្នះគាត់ដោយពិន្ទុ។
Kingad បញ្ជាក់ថា «ដូចខ្ញុំនិយាយអីចឹង គូនេះពិបានស្មានណាស់។ តែឲ្យជ្រើសរើស ខ្ញុំយក DJ ឈ្នះដោយពិន្ទុ»៕