លោក Jose Mourinho បានបញ្ជាក់ជាថ្មី ប្រាប់ទៅអ្នកគាំទ្រថាលោកពិតជាស្រលាញ់ក្លឹប Manchester United ពិតមែន មិនមែនគ្រាន់តែធ្វើការដើម្បីប្រាក់ខែនោះឡើយ។
អ្នកចាត់ការខាងលើរងការរិះគន់ច្រើន ពីសំណាក់អ្នកគាំទ្រ ក្រោយពីក្រុមមិនទទួលបានផលល្អនាការប្រកួតរដូវកាលថ្មី២ប្រកួតកន្លងមក ឈ្នះ១និងចាញ់១។ យ៉ាងណាមិញ លោក Jose នៅតែរក្សាចិត្តនិងស្នើដល់អ្នកគាំទ្រទាំងអស់បន្ដគាំទ្រក្លឹបតទៀត ព្រោះនេះគ្រាន់តែជាការចាប់ផ្ដើមរដូវកាលថ្មីប៉ុណ្ណោះ នៅមានរឿងច្រើនទៀតដែលត្រូវធ្វើ។
អ្នកចាត់ការល្បីឈ្មោះខាងលើបាននិយាយថា៖ “អ្នកគាំទ្រនឹងនៅតែគាំទ្រជានិច្ចសម្រាប់បិសាចក្រហម។ មិនមែនសម្រាប់ខ្ញុំឡើយ ប៉ុន្តែវាជាការគាំទ្រសម្រាប់ក្រុមទាំងមូល។ ក្នុងអាជីពរបស់ខ្ញុំ ខ្ញុំមិនដែលអាត្មានិយមឡើយ ខ្ញុំតែងតែគិតប្រយោជន៍រួម គិតដល់ក្លឹប នោះជាអ្វីដែលខ្ញុំតែងតែធ្វើរហូតមក។ ខ្ញុំជឿជាក់ថាអ្នកគាំទ្រនឹងនៅបន្ដគាំទ្រ លើកទឹកចិត្តកីឡាករក្នុងការប្រកួតទល់ក្រុម Spurs នៅរាត្រីនេះ”។
សូមបញ្ជាក់ថាក្រុមបិសាចក្រហម Manchester United នឹងបើកកីឡដ្ឋាន Old Trafford របស់ខ្លួន ស្វាគមន៍ក្រុមភ្ញៀវ Spurs នៅម៉ោង២រំលងអាធ្រាត្រនេះ ក្នុងសប្ដាហ៍ទី៣នៃលីគកំពូលអង់គ្លេស៕ប្រភព៖ Telegraph