តារាឆ្នើម Lionel Messi នឹងសម្រេចពីអនាគតរបស់ខ្លួនជាមួយក្លឹប Barcelona យូរបំផុតត្រឹមខែឧសភាខាងមុខ ហើយពេលចុងក្រោយនេះមានរបាយការណ៍មកថា លោកទាមទារលក្ខខណ្ឌចម្បង ២ ពីភាគីក្លឹប Barcelona។
ប្រសិនភាគីក្លឹបព្រម នោះការបន្តកុងត្រាថ្មី ក៏លោកនឹងយល់ព្រមដូចគ្នា ហើយមានន័យថា M10 នឹងបន្តឈរជើងជាមួយ Barcelona ដល់អាចនឹងចូលនិវត្តពីអាជីពបាល់ទាត់ក៏ថាបាន។
លក្ខខណ្ឌទី ១ គឺ Messi ទាមទារឲ្យ Barcelona លៃលកការនាំយកកីឡាករកំពូលថ្មីចូលក្រុម ដោយក្នុងនោះមានគោលដៅធំ ៣ ដែលអាចចុះហត្ថលេខាក្នុងលក្ខខណ្ឌឥតតម្លៃខ្លួន រួមមាន Sergio Aguero, Eric Garcia និង Memphis Depay ហើយ Aguero គឺជាកីឡាករដែល M10 ចង់ឲ្យ Barca នាំយកបំផុត។
លក្ខខណ្ឌទី ២ គឺពង្រឹងកិច្ចប្រាស្រ័យទាក់ទងរវាងអ្នកចាត់ការ និងថ្នាក់លើនៃក្លឹបបន្ថែមទៀត។ ដោយគេជឿថា ទំនាក់ទំនងរវាង Messi និង Koeman គឺល្អជាងជំនាន់ជាមួយ Setien និង Enrique ទៅទៀត តែលោកចង់បន្តដល់ថ្នាក់លើដូចជាលោក Ramon Planes និង Joan Laporta ឲ្យមានការនិយាយបើកចំហជាមួយលោកដែរ ដើម្បីធានាពីភាពសុខស្រួលផ្លូវចិត្តនៅក្លឹបកាតាឡាន់បន្តទៅទៀត។
រំឭកថារដូវកាល ២០២០/២១ បើទោះបីមានរឿងរកាំរកូសមួយចំនួន តែកីឡាករអាហ្សង់ទីននៅតែអាចបង្ហាញទម្រង់លេងល្អ ជាក់ស្តែងនៅ ២៦ ប្រកួត La Liga លោករកបាន ២៣ គ្រាប់៕
ប្រភព៖ Metro