ខ្សែប្រយុទ្ធ Harry Kane បានអះអាងថារហូតមកដល់ពេលនេះ រូបគេមិនទាន់ច្បាស់ពីអនាគតថានឹងត្រូវលេងបន្ដនៅ Spurs ឬផ្លាស់ទៅរកក្លឹបថ្មីលេងនៅឡើយទេ។
Kane វ័យ២៧ឆ្នាំជាកីឡាករឆ្នើមម្នាក់ និងតែងតែជួយក្រុម Spurs រកគ្រាប់បាល់ជានិច្ច។ តែដោយសារលទ្ធផលមិនល្អនៅប៉ុន្មានឆ្នាំចុងក្រោយមកនេះ ទើបធ្វើឱ្យមានក្លឹបជាច្រើនចង់បានរូបគេ។ ដោយរំពឹងថាសាមីខ្លួនក៏ចង់ចេញដែរ ព្រោះបើទោះជានៅក្រុម Spurs បន្ដទៀតក៏ទំនងជាមិនអាចលើកពានរង្វាន់អ្វីបានដែរ។
ចំពោះរឿងអនាគតនេះ ខ្សែប្រយុទ្ធជម្រើសជាតិអង់គ្លេសបានអះអាងថាខ្លួនមិនទាន់ដឹងច្បាស់ថាយ៉ាងណាទេ។ ដោយទំនងជានឹងដឹងលទ្ធផលថានឹងចេញឬយ៉ាងណា នៅពេលចប់រដូវកាលនេះ ឬចប់ព្រឹត្តិការណ៍ Euro ខាងមុខនេះសិន។ បញ្ជាក់ថា Kane ចូលលេងឱ្យក្រុម Spurs តាំងពីអាយុ១១ឆ្នាំមក ពោលគឺចេញពីថ្នាលយុវជនតែម្ដង។ កន្លងមកនេះ រូបគេលេងបាន៣២៧ប្រកួត និងរកបាន២១៥គ្រាប់៕
ប្រភព៖ Goal