Oscar De La Hoya បានខកខានឡើងសង្វៀនតាំងពីខែធ្នូ ឆ្នាំ ២០០៨ ក្រោយបរាជ័យនៅប្រកួតចុងក្រោយទល់ Manny Pacquiao ហើយនោះគឺមុនរយៈពេល ៤ ខែនៃការប្រកាសចូលនិវត្តរបស់លោក។
យ៉ាងណាថ្មីៗនេះបុរសសញ្ជាតិអាមេរិកបានប្រកាសតម្រុយវិជ្ជមាន នៃការវិលចូលសង្វៀនសារជាថ្មីវិញហើយ ដោយនោះគឺចង់ជួបសត្រូវចាស់ Floyd Mayweather។ ពួកគេធ្លាប់ប៉ះគ្នាម្តងនៅឆ្នាំ ២០០៧ ជាលទ្ធផល Floyd យកឈ្នះ De La Hoya ដោយលទ្ធផលកាត់សេចក្តី។
ជាមួយការចង់វិលត្រលប់មកសារនេះ បុរសវ័យ ៤៨ ឆ្នាំបាននិយាយប្រាប់ DAZN ថា៖ “ខ្ញុំបានហ្វឹកហាត់រយៈពេលយូរមកហើយ ដោយខ្ញុំចង់ឡើងវ៉ៃម្តងទៀតនៅថ្ងៃណាមួយ មិនដឹងថាវាល្អឬអត់នោះទេ”។
លោកបន្ត៖ “ខ្ញុំបានភ្លេចហើយថាខ្ញុំល្អកម្រិតណា ពោលគឺខ្ញុំចង់ឃើញពីគុណភាពនៃខ្លួនប្រាណរបស់ខ្ញុំម្តងទៀត ដោយយើងដឹងហើយថាការប្រកួតទល់ Mayweather គឺជាប្រកួតដ៏អស្ចារ្យបំផុត”៕
ប្រភព៖ Marca