មានក្រុមជាច្រើននៅតំបន់អឺរ៉ុប ដែលចាប់អារម្មណ៍លើការនាំយក Erling Haaland ដោយមិនថាតែ Barcelona, Real Madrid, Chelsea, Man Utd ក៏ដូចជា Liverpool ជាដើម។ យ៉ាងណានៅពេលចុងក្រោយនេះ ក្លឹប Borussia Dortmund បានដាក់តម្លៃរបស់គេចេញមកហើយ។
ត្បិតបើកុងត្រារបស់កីឡាករន័រវេសត្រូវផុតនៅឆ្នាំ ២០២៤ តែក្លឹបយល់ឃើញថា ប្រហែលជាចងជើងគេឲ្យបន្តនៅហួសពីរដូវកាលនេះលែងបានហើយ ព្រោះមានក្លឹបធំៗជាច្រើនកំពុងគរជើងគ្នាចង់បានគេជាខ្លាំង។
បែបនេះ Dortmund មានតែរកផ្លូវលក់យកលុយចំណេញកប់ក្តោងតែម្តង ដោយបានកំណត់តម្លៃខ្លួន Haaland ដល់តៅ ១៨០ លានអឺរ៉ូ អាចស្មើនឹង Kylian Mbappe ឬឈ្មោះជាកីឡាករថ្លៃបំផុតលំដាប់ទី ២ បន្ទាប់ពី Neymar។ នេះបើតាម ESPN បានចុះផ្សាយ។
ទន្ទឹមពេលដែលក្លឹបទាំងអស់កំពុងជួបវិបត្តិហិរញ្ញវត្ថុព្រមគ្នានោះ ក៏ជឿថាបើក្លឹបណាចង់បាន Haaland ប្រាកដជាត្រូវលក់ចេញកីឡាករជាច្រើនដើម្បីប៉ះប៉ូវ ជាពិសេសគឺ Barcelona ដែលកំពុងជាប់បំណុលខ្ទង់ពាន់លានដុល្លារ៕
ប្រភព៖ Marca