ចាប់តាំងពីថ្ងៃដែល Juventus ធ្លាក់ចេញពីក្របខ័ណ្ឌ Champions League ដោយសារថ្វីជើងរបស់ Porto និងជួនពេលដែលមានការប្រកួតប្រជែងខ្លាំងពីសំណាក់ក្រុម Inter Milan នៅ Serie A ក៏នាំឲ្យកើតមានចចាមអារ៉ាមឥតឈប់ ថា Cristiano Ronaldo នឹងរកផ្លូវចាកចេញពីក្លឹបសេះបង្កង់ ហើយអាចវិលត្រលប់ទៅក្លឹបចាស់ Real Madrid។
អ្នកចាំតែនិយាយគឺស្រួល តែអ្នកធ្វើ ទើបវាពិបាក ហើយបើសួរថា តើ Real Madrid ចង់បានកីឡាករល្អដូចជា Ronaldo ឬអត់ ចម្លើយនោះគឺប្រាកដជាចង់បាន ប៉ុន្តែមុនធ្វើការសម្រេចពួកគេក៏ត្រូវគិតដល់គុណវិបត្តិមួយចំនួនដែលអាចនឹងកើតឡើងផងដែរ។
ក្នុងអត្ថបទនេះទំព័រ CTS Sports សូមធ្វើការបង្ហាញពីចំណុចល្អ ៤ យ៉ាង និងចំណុចអាក្រក់ ៤ យ៉ាង ជុំវិញការចុះហត្ថលេខាយក Ronaldo ត្រលប់មកក្លឹបចាស់ Real Madrid៖
ចំណុចល្អទី ១: អាចធានាបាននៅការរកគ្រាប់បាល់
ទោះឈានចូលវ័យ ៣៦ ឆ្នាំហើយក្តី តែសមត្ថភាពនៃការបញ្ចប់ទីរបស់កីឡាករព័រទុយហ្គាល់នៅតែឃើញថាល្អ ជាក់ស្ដែងស្ថិតិជាមួយ Juventus រដូវកាលនេះ ៣៤ ប្រកួត លោករកបាន ៣០ គ្រាប់ឯណោះ។ បែបនេះជាមួយ Real ដែលជាក្រុមវាយសម្រុកខ្លាំងទៀត យ៉ាងហោចណាស់ក៏ធានាបាន ២៥ គ្រាប់/រដូវកាលយ៉ាងធូរ។
២) ឆន្ទៈក្នុងការឈ្នះដែលគ្មាននរណាបញ្ឈប់បាន
គ្រប់គ្នាដឹងច្បាស់ហើយថា Ronaldo គឺជាមនុស្សដែលពោរពេញដោយឆន្ទៈស្រេកឃ្លាននៅការទទួលជ័យជម្នះ ហើយជានិច្ចកាលមិត្តរួមទ្រនំតែមួយរបស់លោក រមែងទទួលបានការបំផុសទឹកចិត្តខ្ពស់ ក្នុងការសម្រេចពានរង្វាន់នានា។
៣) Zidane ដឹងច្បាស់ពីការប្រើប្រាស់ Ronaldo
Zidane ធ្លាប់បានដឹកនាំ CR7 ច្រើនឆ្នាំគួរសមដែរ ហើយក៏អាចថាបុរសសញ្ជាតិបារាំងម្នាក់នេះ អាចដឹងច្បាស់ជាងនរណាទាំងអស់ពីការប្រើប្រាស់ Ronaldo នៅលើទីលាន។ បែបនេះវាមិនពិបាកនោះទេក្នុងការដែលអ្នកទាំងពីរសម្របខ្លួនទៅមក ពោលគឺខុសគ្នាបើធៀបនឹងការដែល Real ត្រូវយកអ្នកថ្មីសុទ្ធសាធដូចជា Haaland ឬ Mbappe។
៤) ជួយជំរុញផ្នែកទីផ្សារ
វត្តមានរបស់ Ronaldo នៅទីណា កំណើនទីផ្សាររបស់ក្លឹបនឹងមានការកើនឡើងនៅទីនោះ។ មិនថាតែការលក់អាវ ការទាក់ទាញក្រុមហ៊ុនជាម្ចាស់ឧបត្ថម្ភ ក៏អាចទទួលបានសញ្ញាវិជ្ជមានខ្ពស់ជាងមុនផងដែរ។ ជាងនេះក្នុងពេលដែលវិបត្តិសេដ្ឋកិច្ច ដោយសារជំងឺ COVID-19 កំពុងញាំញីផង នាំឲ្យវត្តមានរបស់ CR7 គឺជារឿងសំខាន់សម្រាប់ Real មិនថាតែលើទីលាន និងក្រៅទីលាន លើផ្នែកទីផ្សារនេះផ្ទាល់។
ចំណុចអាក្រក់ទី ១: ជាការវិនិយោគរយៈពេលខ្លី
ឈានចូលវ័យ ៣៦ ឆ្នាំទៅហើយ ការដែលយក Ronaldo មកនោះ ក្លឹប Real Madrid ក៏ត្រូវតែហ៊ានទទួលយកទុកជាមុនថា នឹងមិនរកបានផលចំណេញណាមួយពីការលក់គេចេញនៅថ្ងៃខាងមុខឡើយ។ ជារួមទៅគឺខុសគ្នាពីការចុះហត្ថលេខាយកយុវជនឆ្នើម ដែលស្ថិតនៅវ័យស្រករជាង ២០ ដែល Real អាចនឹងទទួលផលចំណេញពីការលក់ចេញនៅរយៈពេល ២-៣ ឆ្នាំក្រោយ បើពួកគេកាន់តែឡើងជើងខ្លាំង។
២) ការវិលត្រលប់នូវអាកប្បកិរិយាមិនល្អ
គ្រប់គ្នាត្រូវតែទទួលស្គាល់អំពីចរិតនិងអាកប្បកិរិយារបស់ Ronaldo ជាពិសេសគឺមិត្តរួមក្រុមថ្មីដូចជា Hazard ឬ Courtois ដែលមិនធ្លាប់ទទួលរងនូវបទពិសោធន៍ជាមុន។ ជាញឹកញយក្នុងការប្រកួត CR7 មិនខ្លាចរអានោះទេ ក្នុងការបង្ហាញនូវអារម្មណ៍ខឹងសម្បា ឬទើសទាល់ទៅលើមិត្តរួមក្រុម នៅពេលដែលក្រុមទទួលបានលទ្ធផលមិនល្អ។ បែបនេះក្នុងបន្ទប់ផ្លាស់សំលៀកបំពាក់ប្រាកដជានឹងកើតមានបញ្ហាផ្ទៃក្នុងខ្លះៗហើយ។
៣) ការខកខាននាំយកតារាឆ្នើមដទៃទៀត
Haaland និង Mbappe គឺជាគោលដៅដែល Real Madrid ចង់បានដូចគ្នា ហើយយូរបំផុតពួកគេត្រូវធ្វើការសម្រេចត្រឹមរដូវក្តៅមុខ។ បែបនេះប្រសិននាំយក Ronaldo មកហើយ នោះគឺគ្មានផ្លូវដែល Real នឹងយក Mbappe មកទៀតនោះទេ ហើយសាមីខ្លួន Mbappeផ្ទាល់ក៏គេមិនចង់មកដែរ ព្រោះមិនចង់ក្លាយជាស្រមោលរបស់ Ronaldo ដូចដែលកំពុងមានឋានៈត្រឹមជាស្រមោលរបស់ Neymar នៅក្លឹបបារាំង PSGសព្វថ្ងៃ។
៤) ថ្លៃពលកម្មកប់ពពក
បច្ចុប្បន្ននៅ Juventus តារាឆ្នើមព័រទុយហ្គាល់ស៊ីថ្លៃពលកម្ម ៣១ លានអឺរ៉ូ/ឆ្នាំ ដែលទំហំនេះថ្លៃជាងតម្លៃផ្ទេរចេញរបស់លោកទៅទៀត។ បែបនេះ Real ពិតជាពិបាកនឹងផ្តល់ឲ្យខ្លាំងណាស់ ព្រោះសព្វថ្ងៃកំពុងជួបវិបត្តិហិរញ្ញវត្ថុ ហើយត្រូវតកុងត្រាថ្មីឲ្យ Ramos ដែលជាកីឡាករស៊ីថ្លៃបំផុតលំដាប់ទី ៣ ថែមទៀត។
ស្តាប់ទៅហេតុផលនៃគុណវិបត្តិទាំងអស់ពិតជាស្មុគស្មាញ ហើយប្រសិនណា Real សម្រេចមិនយក Ronaldo មកវិញនោះ ក៏មានន័យថា រជ្ជកាលរបស់ Ronaldo/Messi ទំនងជាត្រូវបញ្ចប់ត្រឹមឆ្នាំ ២០២១ នេះហើយ៕