ខ្សែបម្រើ Toni Kroos បានចាកចេញពីជំរំហ្វឹកហាត់របស់ក្រុមជម្រើសជាតិអាល្លឺម៉ង់ហើយ ក្រោយពីលោកបានរងរបួសសាច់ដុំអំឡុងពេលហ្វឹកហាត់។
ក្រុមជម្រើសជាតិអាល្លឺម៉ង់បានប្រមូលផ្ដុំដើម្បីហ្វឹកហាត់ហើយ ត្រៀមប្រកួតជម្រុះ World Cup 2022 ។ ដោយលើកនេះ ពួកគេនឹងត្រូវលេង៣ប្រកួតឯណោះ ដោយប៉ះជាមួយអ៊ីស្លង់ រ៉ូម៉ានី និងម៉ាសេដូនីខាងជើង។ យ៉ាងណាមិញ បើតាមសម្ដីរបស់លោក Joachim Low គ្រូបង្វឹកក្រុមអាល្លឺម៉ង់បានអះអាងថាលើកនេះ លោកនឹងត្រូវលេងដោយគ្មានវត្តមានខ្សែបម្រើឆ្នើម Kroos ឡើយ។
Kroos ត្រូវបានរកឃើញថាមានបញ្ហាសាច់ដុំ មិនអាចហ្វឹកហាត់ជាមួយក្រុមបានទេ។ ដូច្នេះរូបគេបានចាកចេញពីក្រុមជម្រើសជាតិអាល្លឺម៉ង់ ដើម្បីត្រលប់ទៅអេស្ប៉ាញវិញហើយ។ សាមីខ្លួនបានអះអាងដែរថាវាជារឿងមិនសប្បាយចិត្តនោះទេ នៅពេលមិនអាចជួយជម្រើសជាតិបាន៕ប្រភព Goal
