Unai Emery អ្នកចាត់ការក្រុម Arsenal មានទំនុកចិត្តថាខ្សែប្រយុទ្ធ Pierre-Emerick Aubameyang នឹងស្វែងរកគ្រាប់បាល់បានមិនខាន ក្នុងការប្រកួតបន្ដបន្ទាប់ខាងមុខនេះ។
Aubameyang ខកខានឱកាសពិសេស២ដង ក្នុងការប្រកួតទល់ក្រុម Chelsea សប្ដាហ៍មុននេះ។ ការខកខានឱកាសនេះដែរ បានធ្វើឱ្យអ្នកគាំទ្រជាច្រើនរិះគន់ចំពោះខ្សែប្រយុទ្ធខាងលើ ថាមិនសមជាតំណែងទី១សម្រាប់ក្រុមឡើយ។ បើទោះជាយ៉ាងនេះក្ដី លោក Emery នៅតែជឿជាក់លើកូនក្រុមរបស់ខ្លួនជានិច្ច ថានឹងមានឱកាសរកគ្រាប់បាល់មិនខាន។
“Aubameyang ត្រូវការជំនឿចិត្ត និងការជឿជាក់ពីយើង។ បើគាត់មានទំនុកចិត្ត នោះគាត់នឹងរកគ្រាប់បាល់បានច្រើនមិនខាន។ ខ្ញុំស្គាល់ខ្សែប្រយុទ្ធច្រើនមកហើយ ហើយពួកគេគឺដូចតែគ្នាទេ ត្រូវការកម្លាំងចិត្តពីអ្នកគាំទ្រ ដើម្បីស្វែងរកគ្រាប់បាល់”។ សម្ដីរបស់លោក Emery ។
ក្រុម Arsenal នឹងត្រូវលេងទល់ក្រុម West Ham នៅម៉ោង៩យប់នេះ ដែលជាប្រកួតទី៣នៃលីគកំពូលអង់គ្លេស។ នេះជាការប្រកួតសំខាន់ណាស់របស់ Arsenal ដែលត្រូវការពិន្ទុជាចាំបាច់ ព្រោះ២ប្រកួតកន្លងមក ចាញ់ទាំងពីរប្រកួត៕ប្រភព៖ DailyMail