មិនថាអ្នកគាំទ្រចាស់ថ្មី បើនិយាយដល់ឈ្មោះអ្នកប្រដាល់ ៣ រូបរួមមាន Muhammad Ali, Mike Tyson និង Floyd Mayweather ជឿថាប្រាកដជាមានអ្នកស្គាល់ច្រើន ហើយអ្នកទាំងនោះក៏បានគ្រោងនៅកំណត់ត្រា និងស្ថិតិជ័យជម្នះធំៗរាប់ភ្លេច។
បើនិយាយដល់ជ្រុងមួយពាក់ព័ន្ធនឹងការដាល់គូប្រកួតឲ្យសន្លប់ដោយប្រើពេលខ្លីបំផុត ក្នុងចំណោមអ្នកទាំង ៣ គឺ Tyson ធ្វើបានល្អជាងគេ ខណៈអ្នកទាំងពីរឯទៀតគឺធ្លាប់ប្រើពេលលឿនបំផុតលើសពី ១ នាទី។
ខាងក្រោមយើងបង្ហាញ ៥ លើកដែលស្តេចប្រដាល់ Mike Tyson ប្រើពេលខ្លីបំផុតលើសង្វៀន ដើម្បីផ្តួលគូប្រកួតឲ្យសន្លប់ ឬការដែលទទួលបានលទ្ធផល KO៖
៥) ការប្រកួតទល់ Clifford Etienne
នៅថ្ងៃទី ២២ កុម្ភៈ ឆ្នាំ២០០៣ នៅឯសង្វៀនក្នុងទឹកដីសហរដ្ឋអាមេរិក កាលនោះ Tyson មានអាយុ ៣៦ ឆ្នាំ ហើយទើបតែទទួលរងបរាជ័យក្រោមថ្វីដៃ Lewnox Lewis។ លុះឆ្លងមកដល់ការប្រកួតទល់ Clifford អ្នកប្រដាល់ជាប់រហ័សនាម “Iron Mike” បានវាយមិនដកដៃ រហូតដល់វិនាទី ៤៩ លោកបានប្រើកណ្តាប់ដៃខាងស្តាំ ដាល់ឲ្យគូប្រជែងដួលភ្លាមៗ ហើយអាជ្ញាកណ្ដាលក៏សម្រេចបញ្ចប់ការប្រកួត។
៤) ការប្រកួតទល់ Michael Johnson
នេះជាការប្រកួតលក្ខណៈអាជីពលើកទី ៨ សម្រាប់ Tyson ហើយវាបានកើតឡើងនៅសង្វៀនក្នុងទីក្រុង Atalanta ទឹកដីសហរដ្ឋអាមេរិក ឆ្នាំ ១៩៨៥ ដោយជាការប៉ះគ្នាទល់អ្នកប្រដាល់ Michael Johnson។
ត្រឹមតែជាង ២០ វិនាទីដំបូង Tyson បានដាល់ចូលគោលដៅជាច្រើនលើកច្រើនសារ ហើយធ្វើឲ្យ Johnson ដួលម្តងរួចទៅហើយ លុះក្រោកមកសារជាថ្មីរំលងមកដល់វិនាទីទី ៣៩ គេក៏ត្រូវមួយដៃចូលមុខបន្ថែមទៀត នាំឲ្យដួលសន្លប់ភ្លាមៗពេលនោះ។
៣) ការប្រកួតទល់ Ricardo Spain
នៅឆ្នាំដដែលនោះ មុនការប្រកួតទល់ Johnson ក្នុងការប្រកួតលើកទី ៧ Tyson ក៏ធ្លាប់បានផ្តួលគូប្រកួតមួយរូបផ្សេងទៀតឲ្យសន្លប់ផងដែរ ហើយនោះគឺជាជើងខ្លាំង Ricardo Spain ដែល Tyson ប្រើពេលត្រឹម ៣៩ វិនាទី។
ក្រោយអាជ្ញាកណ្ដាលគោះកណ្តឹងឲ្យចាប់ផ្តើមភ្លាម Tyson បានដាល់ចុះឡើងយ៉ាងរហ័ស ខណៈដែល Ricardo បានត្រឹមទប់។ ប៉ុន្តែគេមិនអាចទ្រទ្រង់បានយូរនោះទេ ព្រោះកណ្ដាប់ដៃដ៏ខ្លាំងរបស់ Tyson ចេះតែបន្ថែមចូលគោលដៅ ហើយក្រោយដួលពីរលើកផ្ទួនគ្នាអាជ្ញាកណ្ដាលក៏សម្រេចបញ្ចប់ការប្រកួត។
២) ការប្រកួតទល់ Robert Colay
រំលងបាន ៤ ខែចូលមកទល់ខែតុលា នៅឆ្នាំដែល Tyson ឡើងដៃដដែលនោះ គេក៏បានផ្តួល Robert Colay ឲ្យសន្លប់ផងដែរ។ ត្បិតបើកម្ពស់របស់ Tyson រាងទាបជាង Colay បន្តិចក្តី ប៉ុន្តែគេបានប្រើបច្ចេកទេសជ្រលោរក្រោមឆ្វេងស្តាំ រហូតបានដាល់ចូលគោលដៅមួយទំហឹងដៃឆ្វេង នាំឲ្យគូប្រជែងដួលហើយលែងបន្តទៅមុខទៀតរួច។ កាលនោះ Tyson ប្រើពេលខ្លីជាងកំណត់ត្រាមុនរយៈពេល ២ វិនាទី។
១) ការប្រកួតទល់ Marvis Frazier
នេះហើយគឺជាកំណត់ត្រាផ្តួលគូប្រកួតយកឈ្នះដោយលទ្ធផល KO ប្រើពេលខ្លីបំផុតរបស់ Tyson ដោយបានកើតឡើងនៅខែកក្កដា ឆ្នាំ ១៩៨៦ ក្នុងទីក្រុង New York សហរដ្ឋអាមេរិក។ កាលនោះគឺជាប្រកួតទី ២៥ ក្នុងអាជីព ហើយប៉ះ Marvis Frazier ស្តេចប្រដាល់ Mike Tyson ប្រើពេលត្រឹម ៣០ វិនាទីប៉ុណ្ណោះ។
មុនពេលសន្លប់ Frazier បានត្រូវ Tyson ដាល់ចូលជាច្រើនដៃ ហើយដល់ថ្នាក់ទន់ជង្គង់ នាំឲ្យអាជ្ញាកណ្ដាលធ្វើការរាប់ដល់ ១០ លុះលែងមានការឆ្លើយតបក៏សម្រេចប្រកាសឲ្យ Tyson ទទួលជ័យជម្នះ។
យ៉ាងណាកំណត់ត្រាទាំង ៥ របស់ Tyson ក៏មិនទាន់អាចយកឈ្នះកំណត់ត្រាពិភពលោក នាមអ្នកប្រដាល់ដែលអាចផ្តួលគូប្រកួតឲ្យសន្លប់ប្រើពេលខ្លីបំផុតនោះដែរ ខណៈដែលកំណត់ត្រាដ៏អស្ចារ្យនេះគ្រោងដោយអ្នកប្រដាល់ Mike Collins ធ្លាប់ធ្វើបានដោយប្រើពេល ៤ វិនាទី គ្រាយកឈ្នះទៅលើ Pat Brownson នៅឆ្នាំ ១៩៤៧ ជាការកត់ត្រានិងទទួលស្គាល់ពី Guinnes World Records៕
ប្រភព៖ Bolavip