តាមរបាយការណ៍ពី Football Insider បានចុះផ្សាយថា ខ្សែប្រយុទ្ធ Timo Werner បានត្រៀមខ្លួនរួចរាល់ហើយក្នុងការចាកចេញពីក្លឹប Chelsea ក្រោយពីចុះហត្ថលេខាផ្ទេរចេញពី RB Leipzig កាលពីរដូវក្តៅឆ្នាំទៅ។
ឆ្លងកាត់រយៈពេលជាងកន្លះឆ្នាំមកនេះ គេឃើញថាកីឡាករវ័យ ២៥ ឆ្នាំហាក់ធ្វើមិនបានល្អទាល់តែសោះ ពោលចាប់តាំងពីជំនាន់លោក Frank Lampard ដោយនៅ ២៧ ប្រកួត គេរកបានត្រឹម ៥ គ្រាប់ វាខុសពីរដូវកាលមុនកាលនៅអាល្លឺម៉ង់រកបានដល់ទៅ ២៨ គ្រាប់ឲ្យក្រុមចាស់។
ពេលចុងក្រោយនេះគេទំនងជាលែងទទួលបានការជឿជាក់ពីអ្នកចាត់ការលោក Thomas Tuchel ថែមទៀត ដោយជានិច្ចកាលរមែងត្រូវបានប្តូរចេញសឹងគ្រប់ការប្រកួត ហើយប្រកួតខ្លះពុំបានជាប់ជម្រើសដំបូង។
បញ្ជាក់ថា កុងត្រារបស់គេជាមួយម្ចាស់ដី Stamford Bridge ត្រូវផុតនៅចុងខែមិថុនា ឆ្នាំ ២០២៥ ឯណោះ ហើយបើចាកចេញនៅពេលខាងមុខអាចជាមានតម្លៃផ្ទេរប្រមាណ ៧០ លានអឺរ៉ូ ពោលគឺចុះទាបជាងមុន ១០ លានអឺរ៉ូធៀបនឹងហាងឆេងធ្លាប់ឡើងដល់ ៨០ លានអឺរ៉ូរយៈពេលមុន៕ ប្រភព៖ Goal