ក្រៅពីវិស័យកីឡាបាល់ទាត់ និងប្រដាល់ នៅក្នុងប្រទេសកម្ពុជាយើងសព្វថ្ងៃ បាល់ទះក៏ជាប្រភេទកីឡាមួយផ្សេងទៀតដែលទទួលបានការចាប់អារម្មណ៍ខ្ពស់ផងដែរ។ ជារឿយៗទំព័រ CTS Sports ក៏បានចុះផ្សាយនូវជ្រុងព័ត៌មានដ៏គួរឲ្យចាប់អារម្មណ៍ជាច្រើន ហើយជ្រុងខ្លះជាការឆ្លើយតបទៅនឹងសំណួររបស់អ្នកគាំទ្រ។
ដោយឡែកនៅក្នុងអត្ថបទនេះ យើងសូមនាំអារម្មណ៍អ្នករាល់គ្នាឲ្យបានស្គាល់នូវកីឡាការនីបាល់ទះលំដាប់កំពូល និងមានសម្រស់ស្រស់ស្អាត ៥ រូប ដែលមាន Follower លើបណ្តាញសង្គម Instagram ច្រើនជាងគេបង្អស់ ហើយមាន ៣ រូបជាកីឡាការនីស្ថិតនៅតំបន់អាស៊ាន៖
៥) Nootsara Tomkom
ជាកីឡាការនីសញ្ជាតិថៃ ដែលមានវ័យ ៣៥ ឆ្នាំ ហើយបច្ចុប្បន្នកំពុងបម្រើអាជីពឲ្យក្លឹប Diamond Food ជាក្លឹបឈរនៅចំណាត់ថ្នាក់ទី ៣ ក្នុងក្របខ័ណ្ឌបាល់ទះផ្នែកនារីប្រចាំប្រទេសថៃ។
ស្រ្តីកម្ពស់ ១,៦៩ ម៉ែត្រ លេងនៅតួនាទីជា អ្នកប៉ាសេ (Setter) ក៏ធ្លាប់បានចូលរួមជួយជម្រើសជាតិរយៈពេល ១៩ ឆ្នាំ ចាប់ពីឆ្នាំ ២០០១ ដល់ ២០២០ ហើយឈ្នះមេដាយមាសចំនួន ១៣ គ្រឿង។ ជាមួយនឹងភាពល្បីល្បាញច្រើនឆ្នាំមកនេះ ក៏នាំឲ្យ Nootsara ទទួលបាន Follower លើ Instagram ដល់ទៅ ៩០៤ ០០០ នាក់ ឈរលេខរៀងទី ២ នាមកីឡាការនីនៅប្រទេសថៃមាន Follower ច្រើនបំផុត។
៤) Jaqueline Carvalho
កីឡាការនីវ័យ ៣៧ ឆ្នាំ សញ្ជាតិប្រេស៊ីល លេងនៅតួនាទីជា អ្នកវ៉ៃ ៣ ម៉ែត្រ សព្វថ្ងៃកំពុងបម្រើអាជីពឲ្យក្លឹប Osasco Audax ក្នុងប្រទេសប្រេស៊ីល ហើយជាមួយក្រុមជម្រើសជាតិនាងបានបញ្ចប់អាជីពនៅឆ្នាំ ២០១៨។ ជោគជ័យធំៗនៅជម្រើសជាតិប្រេស៊ីលនាងធ្លាប់បានឈ្នះមេដាយមាស ៩ គ្រឿង ដោយមាន ២ គ្រឿងធំៗក្នុងព្រឹត្តិការណ៍កីឡាអូឡាំពិកឆ្នាំ ២០១២ និង ២០១៨។
ស្រ្តីសម្បុរស្រអែម កម្ពស់ខ្ពស់ ១,៨៦ ម៉ែត្រ មិនចាញ់តារាម៉ូដែលរូបនេះ ក៏ជាបុគ្គលល្បីល្បាញលើបណ្តាញសង្គមមួយរូបផងដែរ ដោយក្រៅពីឈ្មោះជាកីឡាការនីបាល់ទះ Carvalho ក៏ជា Digital Influencer មួយរូប ដែលនាំឲ្យនាងឡើង Follower មកទល់ ១ លាននាក់នាពេលបច្ចុប្បន្ន។
៣) Pleumjit Thinkaow
ជាកីឡាការនីបាល់ទះថៃដែលមាន Follower ខ្ពស់ដាច់គេប្រចាំផ្ទៃប្រទេស ហើយសព្វថ្ងៃកំពុងបម្រើអាជីពឲ្យក្លឹប Supreme Chonburi ជាក្រុមកំពុងឈរលេខ ១ នៅក្របខ័ណ្ឌបាល់ទះផ្នែកនារី។
អ្នកលោតបាំង ដែលមានកម្ពស់ ១,៨០ ម៉ែត្ររូបនេះ ក៏ធ្លាប់បានជួយជម្រើសជាតិថៃឈ្នះមេដាយមាស ១៤ គ្រឿងផងដែរ ក្នុងកំឡុងពេលបម្រើអាជីពរយៈពេល ១៩ ឆ្នាំ ហើយទើបតែប្រកាសដកឈ្មោះចេញកាលពីឆ្នាំ ២០២០។ នៅលើបណ្តាញសង្គម Instagram នាងមាន Follower ១ លាននាក់ ហើយតាមរយៈរូបភាពជាច្រើនរបស់នាង ធ្វើឲ្យគេសង្ស័យថា Thinkaow អាចជាមនុស្សដែលស្រលាញ់ភេទដូចគ្នា។
២) Sabina Altynbekova
ជាកីឡាការនីបាល់ទះវ័យ ២៤ ឆ្នាំ ដែលមានសម្រស់ស្រស់ស្អាតបំផុតក្នុងបញ្ជីឈ្មោះទាំង ៥ រូបនេះ តែនាងមាន Follower ឈរនៅលេខរៀងទី ២ ត្រឹម ១,១ លាននាក់តែប៉ុណ្ណោះ។
កីឡាការនីដែលមានសញ្ជាតិកាហ្សាក់ស្ថាន បានចូលរួមជាមួយក្រុមជម្រើសជាតិនៅឆ្នាំ ២០១៤ នៅកម្មវិធី Asian Women’s Championship ហើយតាំងពីពេលនោះមកនាងបានធ្វើឲ្យមានការចាប់អារម្មណ៍ខ្លាំង ដោយសារតែទេពកោសល្យ គួបផ្សំនឹងសម្រស់របស់នាងផ្ទុះភាពល្បីល្បាញលើប្រព័ន្ធអ៊ីនធឺណិត។
១) Alyssa Valdez
នេះគឺជាកីឡាការនីបាល់ទះដែលមាន Follower ច្រើនដាច់គេបង្អស់ ដោយគិតត្រឹមសប្តាហ៍ទី ២ ខែមិនា នាងមាន Follower ១,៣ លាននាក់។ ជាកីឡាការនីសញ្ជាតិហ្វីលីពីន មានអាយុ ២៧ ឆ្នាំ និងកំពុងបម្រើអាជីពឲ្យក្លឹប Creamline Cool Smashers នៅតួនាទីជា អ្នកវ៉ៃ ៣ ម៉ែត្រ។
ជាមួយក្រុមជម្រើសជាតិដែលឈរឈ្មោះតាំងពីឆ្នាំ២០០៨ នាងហាក់មិនទទួលបានជោគជ័យធំធេងនោះទេ ដោយធ្លាប់ឈ្នះមេដាយសម្រិត ១ គ្រឿងគត់កាលពីឆ្នាំ ២០១៩ នៅព្រឹត្តិការណ៍ ASEAN Grand Prix។ ប៉ុន្តែការលេងឲ្យក្លឹប កីឡាការនីដែលពោរពេញដោយទេពកោសល្យរូបនេះ ធ្លាប់បានឆ្លងកាត់ដល់ក្រៅប្រទេសថែមទៀតផងតាំងពីការលេងឲ្យក្លឹបនៅប្រទេសថៃ 3BB Nakornnont និងក្លឹបនៅតៃវ៉ាន់ Attack Line Volleyball ជាដើម៕
ប្រភព៖ Women Volleybox
