នៅថ្ងៃទី ៧ មិនា ឆ្នាំ ២០២១ ការបោះឆ្នោតជ្រើសរើសប្រធានក្លឹបថ្មីរបស់ Barcelona ក៏បានបញ្ចប់ទៅជាស្ថាពរ ហើយជាលទ្ធផលយើងឃើញថាលោក Joan Laporta បានក្លាយជាអ្នកឈ្នះឆ្នោត ទទួលបានសំឡេង ៥៤,២៨ ភាគរយ នៃសំឡេងឆ្នោតអ្នកចូលរួមសរុប ៥៥ ៦១១ នាក់។
ជឿថាមានអ្នកគាំទ្រវិស័យកីឡាបាល់ទាត់មួយចំនួន ជាពិសេសអ្នកគាំទ្រកាន់ឆ្នាំរបស់ Barcelona ប្រាកដជាធ្លាប់ស្គាល់ខ្លះៗរួចមកហើយពីលោក Laporta ហើយអ្នកគាំទ្រខ្លះទៀតក៏រាប់ថា ជាដំណឹងថ្មីស្រឡាងជាមួយបុរសវ័យ ៥៨ ឆ្នាំរូបនេះ។ កុំរង់ចាំយូរ ទំព័រ CTS Sports ធ្វើការបង្ហាញពីចំណុចរសើប ៤ ដែលអ្នកគួរតែដឹងពីលោក Joan Laporta៖
៤) ជីវប្រវត្តិនិងមុខតំណែង
លោកមានឈ្មោះពេញ Joan Laporta Estruch កើតនៅថ្ងៃទី ២៩ មិថុនា ឆ្នាំ ១៩៦២ ក្នុងទីក្រុង Barcelona ប្រទេសអេស្ប៉ាញ។ លោកធ្លាប់ជាប្រធានក្លឹបដឹកនាំ Barcelona កាលពី ១៨ ឆ្នាំមុន ហើយក្រៅពីនោះលោកក៏មានមុខតំណែងជាមេធាវី ដែលមានក្រុមហ៊ុនផ្ទាល់ខ្លួនឈ្មោះ Laporta & Arbos ហើយធ្លាប់បានបម្រើការក្នុងឆាកនយោបាយ មានតួនាទីជាសមាជិកសភានៅក្នុងតំបន់កាតាឡូញ៉ាចន្លោះឆ្នាំ ២០១០ ដល់ ២០១២។
លោក Laporta បានរៀបអាពាហ៍ពិពាហ៍ជាមួយអ្នកស្រី Constanza Echevarria និងមានកូនប្រុស ៣ នាក់ ហើយក្នុងចំណោមនោះមានម្នាក់ឈ្មោះ Pol Laporta អាយុ ២៧ ឆ្នាំ ជាកីឡាករបាល់ទាត់ធ្លាប់បម្រើអាជីពឲ្យក្លឹបនៅប្រទេសបែលហ្សិក តែសព្វថ្ងៃជាកីឡាករទំនេរជើង។
៣) សមិទ្ធផលដែលធ្លាប់សម្រេចបានកាលដឹកនាំ Barcelona លើកទី ១
នៅថ្ងៃទី ១៦ មិថុនា ឆ្នាំ ២០០៣ លោក Joan Laporta ត្រូវបានចាត់តាំងជាប្រធានក្លឹប Barcelona ហើយនៅប៉ុន្មានឆ្នាំដំបូងនោះលោកបាននាំយកកីឡាករកំពូល ២ រូបចូលក្រុម ដោយមានដូចជាតារាឆ្នើម Ronaldinho និង Samuel Eto’o ជួនពេលដែលក្លឹបយក្សជាគូប្រជែង ២ កំពុងល្បីខ្លាំងគឺ Real Madrid បានចុះហត្ថលេខាយក David Beckham និង Arsenal យកបាន Thierry Henry។
រហូតដល់ឆ្នាំ ២០០៥ លោក Laporta បានសម្លឹងឃើញពីសមត្ថភាពរបស់ Lionel Messi ដែលគ្រានោះគេទើបតែមានអាយុ ១៨ ឆ្នាំ ហើយកំពុងហ្វឹកហាត់នៅទ្រនំថ្នាលយុវជន។ Laporta បានសម្រេចយក Messi ឲ្យមកចូលរួមនៅឈុតធំ ហើយថែមទាំងនិយាយកាលនោះថា Messi អាចក្លាយជាកីឡាករលំដាប់កំពូលនៅថ្ងៃអនាគត ព្រោះចង្វាក់លេងរបស់គេគឺមើលទៅដូច Diego Maradona ក៏ដូចជា Johan Cruyff។
ក្រៅពីជោគជ័យលើទីលាន Laporta ក៏មានចក្ខុវិស័យដឹកនាំច្បាស់លាស់ផងដែរ លើផ្នែកហិរញ្ញវត្ថុ ដែលនាំឲ្យចំណូលរបស់ក្លឹប Barcelona កើនឡើង ២៥០ ភាគរយចន្លោះពីឆ្នាំ ២០០៣ ដែលមានត្រឹម ១២៣,៤ លានអឺរ៉ូ ឡើងមកទល់ ៣០៨,៩ លានអឺរ៉ូនៅឆ្នាំ ២០០៨ ហើយវាជាលើកដំបូងដែលក្លឹបបានកើនឡើងប្រាក់ចំណូលច្រើនជាង ១០០ លានអឺរ៉ូ។
ចន្លោះពេលដែល Laportaដឹកនាំក្លឹបរយៈពេល ៧ ឆ្នាំដល់ឆ្នាំ ២០១០ Barcelona បានស្គាល់រសជាតិឈ្នះពានចំនួន ១២ លើក ដោយមានពានសំខាន់ៗ Champions League ២ លើក La Liga ៤ លើក និង Copa del Rey ១ លើក។ អ្វីដែលអស្ចារ្យនោះក៏លោកស្ថិតក្នុងសម័យកាល ដែលមានអ្នកចាត់ការលោក Pep Guardiola ដឹកនាំក្រុមឈ្នះពានចំនួន ៦ ក្នុងឆ្នាំ ២០០៩ ហើយវាជាលើកដំបូងក្នុងប្រវត្តិសាស្ត្របាល់ទាត់។
២) ការធ្លាក់តំណែងប្រធានក្លឹបនៅឆ្នាំ ២០១០
នៅថ្ងៃទី ៣០ មិថុនា ឆ្នាំ ២០១០ ក្លឹប Barcelona មានការបោះឆ្នោតជ្រើសរើសប្រធានក្លឹបសារជាថ្មី ហើយលោក Laporta ក៏បានឈរឈ្មោះដែរនៅកាលនោះ ប៉ុន្តែលទ្ធផលសំឡេងឆ្នោតគឺអតីតទីប្រឹក្សាជាន់ខ្ពស់របស់លោកផ្ទាល់គឺលោក Sandro Rosell បានជាប់ឆ្នោត ដោយទទួលបានសំឡេងគាំទ្រច្រើនជាង ៦០ ភាគរយ។
បើសួរថាតើមានបញ្ហាអ្វីទើបឈានឲ្យលោក Laporta ចាញ់ឆ្នោត វាក៏ជារឿងដ៏គួរឲ្យភ្ញាក់ផ្អើលដូចគ្នា ព្រោះមិនថាតែភាពជោគជ័យនៃពានរង្វាន់ដែលក្លឹបទទួលបាន និងជាពិសេសផ្នែកហិរញ្ញវត្ថុគឺសុទ្ធសឹងតែដំណើរការល្អព្រមគ្នា ហើយចុងក្រោយ Laporta បានត្រឹមតែស្ថិតក្នុងការចងចាំរបស់អ្នកគាំទ្រជាច្រើន។
ក្រោមការដឹកនាំរបស់ Rosell ចន្លោះពេល ៤ ឆ្នាំដល់ឆ្នាំ ២០១៤ ក្លឹប Barcelona បានឈ្នះពានរង្វាន់ចំនួន ៩ ហើយក្រោយមកទើបឡើងប្រធានក្លឹបថ្មីលោក Josep Maria Bartomeu ដែលក្លឹបឈ្នះពាន ១៣ និងទើបតែដើរចេញកាលពីថ្ងៃទី ២៧ តុលា ឆ្នាំ ២០២០ ទំនងជាដោយសារបញ្ហាវិបត្តិហិរញ្ញវត្ថុជាធំ។
១) ចក្ខុវិស័យថ្មីរបស់លោក Joan Laporta
បញ្ហាចម្បង ៣ ដែលលោក Joan Laporta នឹងចូលមកសម្របសម្រួលនាមជាប្រធានក្លឹបលើកទី ២ គឺរួមមាន វិបត្តិផ្នែកហិរញ្ញវត្ថុដែលក្លឹបកំពុងជាប់បំណុលខ្ទង់ពាន់លាន បញ្ហានៃការបន្តកុងត្រាថ្មីរបស់ Lionel Messi និងស្ថានភាពដឹកនាំរបស់លោក Ronald Koeman។
តាមរយៈការឡើងកាន់តំណែងរបស់ Laporta ធ្វើឲ្យគេជឿថា ៩៩ ភាគរយ Messi នឹងបន្តកុងត្រាថ្មី ហើយមិនបញ្ចប់ការឈរជើងនៅ Barcelona ត្រឹមចុងខែមិថុនានោះទេ។ ជាងនេះលោកនឹងប្រើប្រាស់យុទ្ធសាស្រ្តចាស់ដោយផ្តល់ឱកាសឲ្យក្រុមយុវជននៅ La Masia ឲ្យមានឱកាសមកចូលរួមនៅឈុតធំ ដូចកាលដែលលោក Promote កីឡាករ Lionel Messi និង Andres Iniesta កាលពី ១៦ ឆ្នាំមុនអ៊ីចឹងដែរ។
ចំពោះផែនការណ៍នៃការនាំយកគ្រូបង្វឹកថ្មី វាជារឿងបន្ទាប់បន្សំ ពោលគឺស៊ីសងលើស្ថានការណ៍ដឹកនាំរបស់លោក Ronald Koeman ប៉ុន្តែវាក៏មានសញ្ញាអវិជ្ជមានច្រើន ដែលថាបុរសសញ្ជាតិហូឡង់អាចនឹងគ្មានឱកាសដឹកនាំ Barcelona នៅរដូវកាលក្រោយ ហើយជំនួសមកវិញលោក Laporta នឹងផ្តល់ឱកាសឲ្យលោក Mikel Arteta ដែលជាអតីតដៃស្តាំរបស់លោក Pep Guardiola និងជាគ្រូបច្ចុប្បន្ននៅក្លឹប Arsenal៕
រក្សាសិទ្ធ ហាមយកអត្ថបទពី CTS Sports ទៅចុះផ្សាយបន្តមិនថាលើគេហទំព័រឬក្នុងវីដេអូ