ដូចអ្នកបានដឹងស្រាប់ហើយ តារាឆ្នើមលើសង្វៀន UFC គឺកីឡាករ Khabib Nurmagomedov និងតារាឆ្នើមក្នុងវិស័យបាល់ទាត់ Cristiano Ronaldo គឺជាមិត្តជិតស្និទ្ធនឹងគ្នា ហើយជានិច្ចកាលអ្នកទាំងពីររមែងលេចមុខក្នុងរូបភាពថតរួមគ្នា និងការផ្ញើសារទៅមកនៅលើបណ្តាញសង្គម។
ដោយឡែកថ្មីៗនេះ Khabib ក៏បានទម្លាយពីអារម្មណ៍ពិតមួយរបស់ Ronaldo ដែលបានព្រួយបារម្ភខ្លាំងបំផុត ជាមួយនឹងកូនប្រុសច្បងគឺ Cristiano Ronaldo Jr ដែលមានអាយុទើបតែ ១០ ឆ្នាំ។ នោះគឺពាក់ព័ន្ធនឹងឆន្ទៈនៃការខិតខំ និងភាពស្រេកឃ្លាននៃជោគជ័យ ដែលបារម្ភថា Jr អាចនឹងមិនអាចដើរតាមគន្លងឪពុក។
នៅកិច្ចសម្ភាសន៍ជាមួយប៉ុស្តិ៍ Krasava លើ YouTube អត្តពលិកសញ្ជាតិរុស្ស៊ី Khabib និយាយថា៖ “យើងបានជជែកគ្នាសឹងតែរាល់ថ្ងៃ ហើយមានថ្ងៃមួយនោះយើងធ្លាប់បាននិយាយដល់កត្តាអ្វីដែលជំរុញទឹកចិត្តរបស់យើងឲ្យទទួលបានជោគជ័យទល់សព្វថ្ងៃ ដោយ Ronaldo គាត់បានប្រាប់ខ្ញុំថាចង់ឃើញកូនរបស់គាត់ដើរតាមគន្លងជោគជ័យដូចជាគាត់”។
Khabib បន្ថែមទៀតថា៖ “ពេល Cristiano គាត់នៅតូច កាលនោះគាត់ស្រមៃត្រឹមតែចង់បានស្បែកជើងលេងបាល់មួយគូតែប៉ុណ្ណោះ តែពេលនេះវិញកូនប្រុសរបស់គាត់គឺអាចមានគ្រប់យ៉ាង ដែលវាជារឿងនាំឲ្យគាត់បារម្ភខ្លាចក្រែង Jr មិនមានឆន្ទៈស្រេកឃ្លាន និងចំណង់ចង់ទទួលបានជោគជ័យដូចជាគាត់”។
“ជាទូទៅមនុស្សយើងម្នាក់ៗលុះត្រាតែមានចំណង់ចង់មានចង់បាន ទើបអាចទទួលបានជោគជ័យឬអាចសម្រេចរឿងអ្វីមួយ តែនៅពេលដែលអ្នកមានគ្រប់យ៉ាងក្នុងដៃស្រាប់នោះ វាពិតជាពិបាកនឹងកើតមានអារម្មណ៍ជំរុញទឹកចិត្តឲ្យយើងចង់សម្រេចអ្វីមួយខ្លាំងណាស់”។
ជាមួយសារទាំងអស់នេះដែរ តាមពិតទៅគឺយើងបានឃើញ Ronaldo ព្យាយាមលុតដំកូនប្រុសរបស់ខ្លួនជាបណ្តើរៗហើយ មិនថាតែលើផ្នែកកាយសម្បទា និងការអប់រំផ្លូវចិត្ត។ កន្លងមកធ្លាប់លេចលឺថា CR7 ពុំអនុញ្ញាតសូម្បីតែការទិញនូវទូរសព្ទ iPhone ឲ្យទៅកូនប្រុស ព្រោះចង់បង្រៀនឲ្យគេយល់ថារបស់គ្រប់យ៉ាងនៅលើលោក គឺសុទ្ធតែទាមទារការខិតខំប្រឹងប្រែងទើបអាចសម្រេចយកវាមកបាន មិនមែននៅខ្ជិលច្រអូស ហើយដេករង់ចាំធ្លាក់វាពីលើមេឃមកនោះទេ។
Cristiano Jr. has got some mad skills. ⭐ pic.twitter.com/r2B9wx5f67
— Football Tweet (@Football__Tweet) June 29, 2020
សព្វថ្ងៃ Jr គឺជាយុវជនថ្នាលនៅឯក្លឹប Juventus ហើយតាមរបាយការណ៍ធ្លាប់ចុះផ្សាយកាលពីឆ្នាំ ២០១៩ គឺក្មេងប្រុសម្នាក់នេះទំនងជាមានដុងបាល់ទាត់ពីកំណើតពិតៗ ដោយត្រឹមការបង្ហាញខ្លួន ២៨ ប្រកួត គេរកបានដល់ទៅ ៥៨ គ្រាប់ ហើយក្នុងក្រុមគេតែងតែបង្ហាញអាកប្បកិរិយាភាពជាអ្នកដឹកនាំ និងដើរតួជាកីឡាករលេចធ្លោជាងសមាជិកដទៃណាទាំងអស់ មិនខុសពីឪពុករបស់គេទេ។
បង្វែរមក Khabib ឯណេះវិញ គេមានវ័យ ៣២ ឆ្នាំ បានប្រកាសចូលនិវត្តពីវិស័យ MMA ក្រោយយកឈ្នះ Justin Gaethje ដែលជាជ័យជម្នះលើកទី ២៩ ក្នុងអាជីព កាលពីខែតុលា ឆ្នាំ ២០២០។ ខ្សែជីវិតរបស់អត្តពលិករូបនេះ គឺស្រដៀងគ្នានឹង Ronaldo នៅរយៈពេលចុងក្រោយ ព្រោះគេបានកំព្រាឪពុកដូចគ្នា ហើយធ្លាប់សម្រក់ទឹកភ្នែកដោយសារតែស្តាយនឹងការបាត់បង់ឪពុក។
ជានិច្ចកាល Khabib តែងតែផ្សាភ្ជាប់ខ្លួនឯងទៅក្នុងវិស័យបាល់ទាត់ ដោយកាលពីប៉ុន្មានខែមុនទើបតែចូលរួមហ្វឹកហាត់ខ្នាតខ្លីជាមួយក្លឹបនៅឯប្រទេសរុស្ស៊ី ហើយប្រកាសក្តែងៗថានឹងចូលរួមជាមួយក្លឹបបាល់ទាត់ណាមួយដោយឥតតម្លៃខ្លួន។ ក្លឹបក្នុងក្តីស្រមៃរបស់គេគឺ Real Madrid ដោយតារាឆ្នើម UFC រូបនេះធ្លាប់បានរៀបរាប់ថា៖ “Real Madrid ជាក្រុមដែលខ្ញុំចូលចិត្ត្បំផុត ហើយប្រកួតដំបូងដែលខ្ញុំចេះទស្សនាពេញ ៩០ នាទី គឺពេល Real Madrid យកឈ្នះ Juventus នៅវគ្គផ្តាច់ព្រ័ត្រ Champions League ឆ្នាំ ១៩៩៨”។
ជាមួយនឹង Roanldo ដែលទើបតែឈានចូលវ័យ ៣៦ ឆ្នាំ ហើយរកបាន ២០ គ្រាប់នៅ ២១ ប្រកួតក្នុងក្របខ័ណ្ឌ Serie A ក៏ត្រូវបាន Khabib បង្ហាញពីការយល់ឃើញបែបនេះថា៖ “Ronaldo គាត់គឺជាអ្នកបញ្ចប់ដ៏ល្អដាច់គេក្នុងលោក ហើយខ្ញុំគិតថា គាត់អាចបន្តនៅកម្រិតដ៏ខ្ពស់មួយនេះរយៈពេល ២ ឬ ៣ រដូវកាលទៀត”៕