ក្លិបបឹងកេតបានប្រកាសចុះកុងត្រាយកខ្សែប្រយុទ្ធMarko Rajkovic ជាកីឡាករបរទេសទី៥របស់ខ្លួននៅថ្ងៃនេះ ជាមួយនឹងការបង្ហាញឈុតទី៣ពណ៌ខ្មៅ Black Editon ។
អតីតខ្សែប្រយុទ្ធក្លិប Happy Valley AA នៃលីគកំពូលហុងកុង គឺកីឡាករ Marko Rajkovic ត្រូវបានព័ត៌មានចចាមរ៉ាមក្នុងស្រុក បានចុះផ្សាយថា រូបគេបានឈានដល់កិច្ចព្រមព្រៀងចុះកុងត្រាជាមួយក្លិបបឹងកេតរួចរាល់ហើយ ខណៈដែររង់ចាំការប្រកាសជាផ្លូវការពីក្លិបតែប៉ុណ្ណោះ។ តែយ៉ាងណា! ពេលនេះគឺផ្លូវការហើយ។
ខ្សែប្រយុទ្ធ Marko Rajkovic មានវ័យ២៨ឆ្នាំ សញ្ជាតិស៊ែប កម្ពស់ ១,៩៤ម៉ែត្រ មានបទពិសោធន៍ច្រើន ធ្លាប់បង្ហាញខ្លួនក្នុងក្លិបតំបន់អឺរ៉ុប តែមិនមែនក្លិបល្បីនោះទេ។
សម្រាប់អាវទីបី ( Black Edition ) មានចាប់ផ្តើមលក់ចាប់ពីពេលនេះតទៅនៅហាងលក់សម្លៀកបំពាក់របស់ក្លិបហើយ ឯកសណ្ឋានរដូវកាលថ្មីរបស់ក្លិបបាល់ទាត់បឹងកេតដទៃទៀតទាំងក្នុងដីនិងក្រៅដី ក៏នឹងមានដាក់លក់ចាប់ពីឥលូវនេះតទៅហើយ ខណៈអាវ ( Black Edition ) មួយនេះតម្លៃ 25$ក្នុងមួយអាវ៕