ខ្សែបម្រើ Toni Kroos បានបញ្ជាក់ថាគោលដៅរបស់គេនៅថ្ងៃអនាគត គឺចង់ចូលនិវត្ដន៍នៅក្រុម Real Madrid នេះតែម្ដង មិនចង់ចាកចេញទៅណាទៀតទេ។
កីឡាករអាល្លឺម៉ង់ដែលចូលរួមជាមួយក្រុម Real Madrid តាំងពីឆ្នាំ២០១៤មកនេះ បាននិយាយថា៖ “ខ្ញុំចូលរួមជាមួយក្រុម បន្ទាប់ពីឈ្នះពានរង្វាន់ World Cup 2014 ។ ហើយប្រកួតដំបូងគឺប៉ះ Sevilla នៅ UEFA Super Cup ហើយវាជាពានដំបូងរបស់ខ្ញុំឈ្នះជាមួយ Real តែម្ដង។ ខ្ញុំតែងតែប្រឹងប្រែងអស់ពីសមត្ថភាពគ្រប់ប្រកួត ហើយប្រសិនបើខ្ញុំខូចបាល់ ខ្ញុំពិតជាអន់ចិត្តខ្លាំងណាស់។ ការបានលេងជាមួយក្លឹបនេះ ពិតជាអស្ចារ្យ ហើយខ្ញុំមិនចង់ទៅណាទៀតទេ”។
កីឡាករវ័យ៣១ឆ្នាំខាងលើបានជួយក្រុមអធិរាជស ឈ្នះពានរង្វាន់១៣មកហើយ។ ដោយពានដែលរូបគេពេញចិត្តជាងគេក្នុងការលើកនោះគឺពានរង្វាន់ UEFA Champions League នៅឆ្នាំ២០១៨។ ការពេញចិត្តនេះគឺដោយសារតែលើកពានលើកនោះ គឺរូបគេបានចូលរួមកម្មវិធីដោយមានគ្រួសារមកទាំងអស់គ្នាតែម្ដង៕
ប្រភព៖ Marca