ក្លឹបអ៊ីតាលី Spezia បានប្រកាសកាលពីថ្ងៃសុក្រកន្លងទៅថា អ្នកចាំទី Ivan Provedel គឺជាកីឡាករមួយក្នុងចំណោមបុគ្គល ២ រូបដែលបានតេស្តឃើញវិជ្ជមាន មានផ្ទុកជំងឺ COVID-19 ក្រោយពីការប្រកួតនៅ Serie A ទល់ Juventus កាលពីប៉ុន្មានថ្ងៃមុន។
បុគ្គល ១ រូបផ្សេងទៀតដែលតេស្តឃើញវិជ្ជមាន គឺជាសមាជិកបុគ្គលិកនៅឈុតធំ ហើយសព្វថ្ងៃកំពុងដាក់ឲ្យនៅដាច់ដោយឡែកពីគេ។
បញ្ជាក់ថាសម្រាប់ Juventus ឯណោះវិញ ក៏រកឃើញថាកីឡាករ Rodrigo Bentancur មានតេស្តឃើញផ្ទុកជំងឺ COVID-19 នេះផងដែរ នាំឲ្យគេត្រូវអវត្តមាននៅជំនួបសំខាន់ទល់ Lazio ដែលត្រូវលេងនៅយប់នេះ។
សព្វថ្ងៃ Juventus កំពុងឈរលេខ ៣ នៅតារាង Serie A ដោយមាន ៤៩ ពិន្ទុស្មើនឹងពិន្ទុរបស់ Atalanta ខណៈ Lazio ជាគូប្រជែងត្រូវជួបយប់នេះជាក្រុមឈរលេខ ៧ មាន ៤៣ ពិន្ទុ៕
ប្រភព៖ BeSoccer