ព្រឹត្តិការណ៍ ONE: FISTS OF FURY II នឹងចូលមកនាចុងសប្ដាហ៍នេះនៅកីឡដ្ឋាន Singapore Indoor Stadium ប្រទេសសិង្ហបុរី។ ព្រឹត្តិការណ៍នៅថ្ងៃសុក្រទី ៥ មីនា នេះនឹងបង្ហាញឲ្យឃើញនូវគូប្រកួតគុនចម្រុះខ្លាំងៗក្នុងនោះមានកីឡាករប្រយុទ្ធមួយចំនួនប្ដូរទៅចំបាប់ ហើយ អ្នកលេងទម្ងន់ flyweights ប្ដូរទៅប្រកួតទម្ងន់ heavyweights។ ទាំង ៦ គូសុទ្ធតែខ្លាំងៗលំដាប់អន្តរជាតិ។ មុនការប្រកួតចាប់ផ្ដើម សូមតាមដានរឿងរ៉ាវចំនួន ៥ ដែលមិនត្រូវខកខានពីប្រទេសសិង្ហបុរីនាថ្ងៃសុក្រនេះ។
#1កីឡាករទម្ងន់ Heavyweights កម្រិតកំពូលបង្ហាញខ្លួន
តារាគុនចម្រុះកំពូលៗទម្ងន់ heavyweight កំពុងស្រេកឃ្លានក្នុងការប្រកួតដើម្បីកើនចំណាត់ថ្នាក់ល្អនៅសង្វៀន ONE ទៀតផង។
Amir Aliakbari ដែលជាជើងឯក Greco-Roman Wrestling World Champion នឹងឈានជើងជំហានដំបូងនៅសង្វៀនលំដាប់ពិភពលោកទល់នឹងតារាកូរ៉េមិនដែលចាញ់ “Mighty Warrior” Kang Ji Won។ តារាកូរ៉េខាងត្បូង រក្សាកំណត់ត្រា ១០០% ក្នុងការផ្ដួលដៃគូឲ្យសន្លប់ ជាពិសេសគេបានផ្ដួលមិត្តរួមក្រុមរបស់ Aliakbari កីឡាករ Mehdi Barghi ទៀតផងក្នុងការបង្ហាញខ្លួនដំបូងនៅព្រឹត្តិការណ៍ ONE: UNBREAKABLE III កាលថ្ងៃទី ៥ ខែកុម្ភៈ កន្លងទៅ។
Aliakbari ជាកីឡាករមានបទពិសោធន៍ច្រើនក្នុងពិភពគុនចម្រុះដោយមានកំណត់ត្រាឈ្នះ ១០ ដងនិង ចាញ់ ១លើកក្នុងនោះផ្ដួលដៃគូឲ្យសន្លប់ចំនួន ៧ ដង។ គេសម្ដែងភាពរំភើបរីករាយក្នុងដំណើរឆ្ពោះទៅដណ្ដើមខ្សែក្រវាត់ខាងមុខ។
ជាមួយគ្នានោះ អតីតកីឡាករប្រជែងខ្សែក្រវាត់ ONE Light Heavyweight World Title, Alexandre “Bebezao” Machado បានប្ដូរទៅប្រកួតទម្ងន់ធ្ងន់ដើម្បីជួបតារារុស្សីមិនដែលចាញ់ Anatoly “Spartak” Malykhin ។
Machado បញ្ចប់គូប្រកួតចំនួន ៨ លើកក្នុងចំណោម ៩លើក ខណៈ Malykhin បានបញ្ចប់គូប្រកួត ៨លើកជាប់គ្នាមិនដែលចាញ់ (៨-០)។
គូប្រកួតទាំងនេះសុទ្ធតែចង់កក់កៅអីទៅដណ្ដើមខ្សែក្រវាត់ ONE Heavyweight World Champion ពី Brandon “The Truth” Vera នាថ្ងៃខាងមុខ បើសិនធ្វើបានល្អនៅចុងសប្ដាហ៍នេះ។
#2 គូប្រកួតទម្ងន់ Featherweights ស្រេកឃ្លានជ័យជម្នះ
គូប្រកួតទម្ងន់ featherweights ចំនួន ២គូកំពុងដាក់ផែនការប្រើកម្លាំង, ល្បឿន, និងស្នៀតប្រយុទ្ធនានាក្នុងបំណងយកឈ្មោះបោះសំឡេងនៅសង្វៀន ONE។
Ryogo “Kaitai” Takahashi បានផ្ដួលដៃគូឲ្យសន្លប់១០ដងក្នុងចំណោមជ័យជម្នះ ១៤ លើក ហើយគូប្រកួតរបស់គេ Tang Kai បានផ្ដួលដៃគូឲ្យសន្លប់ចំនួន ៩ លើកក្នុងចំណោម ១១ ពីជ័យជម្នះ ១១ លើក។
ចំណែក Yoshiki Nakahara បានបញ្ចប់ដៃគូ ៧លើកពីចម្ងាយ ខណៈ ជើងខ្លាំងចំណូលថ្មីមិនដែលចាញ់សញ្ជាតិកៀស៊ីហ្សីស្ថាន Ruslan “Snow Leopard” Emilbek Uulu ដែលឈ្នះ ១២ លើកជាប់គ្នាកន្លងមក (បញ្ចប់គូប្រកួត ៩ លើក)។ តើកីឡាករណានឹងទទួលជ័យជម្នះក្នុងការប្រកួតនេះ?
#3 តារាមានមូលដ្ឋាននៅប្រទេសថៃ
កីឡាករនូវែលហ្សេឡង់ Mark “Tyson” Fairtex Abelardo ដែលបច្ចុប្បន្នហ្វឹកហាត់នៅក្លិប Fairtex Training Center នាក្រុងផាត់តាយ៉ា ប្រទេសថៃ ខណៈ កីឡាករអាមេរិក Emilio “The Honey Badger” Urrutia ហ្វឹកហាត់នៅក្លិប Bangkok Fight Lab ដែលជាផ្ទះទី២។ ដោយរស់នៅប្រទេសថៃ កីឡាករទាំងពីរនេះមានស្ទិលប្រកួតស្រដៀងគ្នា។
Abelardo មានស្នៀតប្រយុទ្ធដ៏អង់អាច។ យ៉ាងណាក្ដី Urrutia ក៏មិនរាថយដែរ ហើយអ្នកគាំទ្រនឹងបានឃើញអ្នកប្រយុទ្ធដ៏ក្លាហានទាំងពីរប្រើស្នៀតអ្វីខ្លះ។
Urrutia បានទម្លាក់គីឡូទៅប្រកួតទម្ងន់ bantamweight ជាលើកដំបូងនៅសង្វៀន ONE។ កម្លាំងរបស់គេ គឺជាទ្រព្យមហាសាលក្នុងការប្រកួតនេះ។ យ៉ាងណាក្ដី “Tyson” នឹងខំជម្នះរាល់ឧបសគ្គ។
#4 ការបង្ហាញគុនចម្រុះដ៏ល្អមើល
ក្រោយពីជោគជ័យនៅ ONE: FISTS OF FURY កាលសប្ដាហ៍មុនក្នុងការប្រកួតគុនចម្រុះ៥គូ អ្នកគាំទ្រនឹងបានឃើញ កីឡាករជំនាញចំបាប់និងជឺជិតស៊ូ ទៅប្រើស្នៀតមួយថៃ, ប្រដាល់សកល, និងការ៉េតេ។ នាយប់ថ្ងៃសុក្រនេះ ជាការផ្គូផ្គងដ៏ល្អមួយដែលធ្វើឲ្យអ្នកគាំទ្រនៅមិនស្ងៀម ហើបគូថពីកៅអីជាមិនខាន។
#5 គូប្រកួតមួយថៃ
មាន ៥ គូប្រកួតក្នុងគុនចម្រុះ ប៉ុន្តែ មានមួយគូប្រកួតមួយថៃ។ អ្នកលេងមួយថៃ Han Zi Hao ដែលជាអតីតគូប្រជែង ONE World Title កំពុងស្រេកឃ្លានដើម្បីកើនចំណាត់ថ្នាក់ និងឡើងទៅប្រជែងខ្សែក្រវាត់ជាថ្មី។
គេមានបទពិសោធន៍ច្រើនទោះចាញ់ Nong-O Gaiyanghadao ក្នុងការដណ្ដើមខ្សែក្រវាត់ ONE bantamweight កាលពីពីរឆ្នាំកន្លងទៅក៏ដោយ។ យ៉ាងណាក្ដី កីឡាករចិនបានរៀនសូត្រច្រើន និង បានរៀបយុទ្ធសាស្ត្រមួយចំនួនធ្វើឲ្យល្អប្រសើរឡើង។
Han មានផែនការល្អពេលផ្ដួល Mohammed “Jordan Boy” Bin Mahmoud ឲ្យសន្លប់កាលខែ តុលា ឆ្នាំមុន ហើយគេស្រេកឃ្លានក្នុងដំណើរទៅសាងកេរ្តិ៍ឈ្មោះឡើងវិញ។ ប៉ុន្តែ គូប្រជែងរបស់គេពេលនេះ គឺ Adam Noi ដែលធ្វើឲ្យគេភ្ញាក់ផ្អើលពេលផ្ដួលវីរបុរស Leo Pinto កាលបង្ហាញខ្លួននៅសង្វៀន ONE Super Series លើកដំបូង។
បុរសវ័យ ២១ ឆ្នាំកូនកាត់បារាំង-អាល់ហ្សេរី ជាតារាកំពុងរះក្នុងពិភពមួយថៃ។ បើសិន គេអាចផ្ដួល Han នោះអាចកើនចំណាត់ថ្នាក់ និងអាចឈានទៅដណ្ដើមខ្សែក្រវាត់នាថ្ងៃមុខទៀតផង។