លោក Steven Gerrard អ្នកចាត់ការក្រុម Rangers ទទួលបានកាតក្រហមនៅយប់មិញនេះ ក្រោយពីលោកតវ៉ាខ្លាំងជាមួយអាជ្ញាកណ្ដាលក្នុងការប្រកួត។
ក្រុម Rangers បានយកឈ្នះលើក្រុម Livingston ក្នុងលទ្ធផល ១-០ សម្រាប់ការប្រកួតលីគកំពូលស្កុតឡែននៅយប់មិញនេះ។ យ៉ាងណាមិញក្នុងការប្រកួតនេះដែរ អ្នកចាត់ការ Gerrard របស់ក្រុម Rangers ទទួលបានកាតក្រហមនៅចប់តង់ទី១ ក្រោយពីលោកជជែកនិងតវ៉ាខ្លាំងពេកជាមួយអាជ្ញាកណ្ដាល។ ដំបូងឡើយលោកបានត្រឹមកាតលឿងមួយប៉ុណ្ណោះ ប៉ុន្តែក្រោយទទួលបានកាតនេះហើយ នៅតែបន្ដតវ៉ាទៀត ទើបអាជ្ញាកណ្ដាលសម្រេចដកកាតក្រហមឱ្យតែម្ដង។
កាតក្រហមនេះ នឹងធ្វើឱ្យអតីតកីឡាករ Liverpool ខកខានដឹកនាំក្រុមសម្រាប់ការប្រកួតនាចុងសប្ដាហ៍នេះ។ ដោយការប្រកួតនោះ បើ Rangers ឈ្នះទៀត នោះនឹងក្លាយជាម្ចាស់ជើងឯកតែម្ដង បើទោះជានៅសល់ការប្រកួត៧ប្រកួតទៀតក៏ដោយ ព្រោះពួកគេនាំមុខក្រុមលេខ២ Celtic ដល់ទៅ ១៨ពិន្ទុទៅហើយ៕ប្រភព Dailymail