តារាឆ្នើម Lionel Messi ត្រូវបានគេស្គាល់ថា ជាកីឡាករដែលមានឈ្មោះស្ថិតក្នុងកំណត់ត្រាជាច្រើន ហើយពាក់ព័ន្ធនឹងកំណត់ត្រាខ្លះមានការប្រកួតប្រជែងជាមួយ Cristiano Ronaldo ឥតឈប់។
ដោយឡែកនៅរដូវកាល ២០២០/២១ ក៏មានភាគរយខ្ពស់ ដែលអាចថានឹងក្លាយជារដូវកាលចុងក្រោយរបស់ខ្សែប្រយុទ្ធអាហ្សង់ទីនជាមួយក្លឹប Barcelona ព្រោះកុងត្រារបស់លោកត្រូវផុតនៅចុងខែ មិថុនា ខាងមុខ។
យ៉ាងណាសម្រាប់ M10 ក៏នៅសេសសល់ឱកាសបំបែកកំណត់ត្រាខ្នាតយក្សចំនួន ៦ កំឡុងពេលឈរជើងឲ្យ Barcelona ជាង ៣ ខែដែលសេសសល់នេះ។ ទំព័រ CTS Sports ធ្វើការបង្ហាញដូចតទៅ៖
៦) ក្លាយជាកីឡាករទីមួយដែលរកបាន ២០ គ្រាប់ក្នុងលីគ ចំនួន ១៣ រដូវកាល
Lionel Messi សព្វថ្ងៃជាកីឡាករមួយ ក្នុងចំណោម ២ រូបជាមួយនឹង Ronaldo ដែលអាចរកបានយ៉ាងតិច ២០ គ្រាប់ក្នុងលីគ ចំនួន ១២ រដូវកាល។ ប៉ុន្តែនៅពេលនេះ Messi ក៏កៀកនឹងឈានចូលរដូវកាលទី ១៣ ហើយ ព្រោះគ្រាប់បាល់នៅក្របខ័ណ្ឌ La Liga របស់លោកមានដល់ទៅ ១៩ គ្រាប់ ហើយរំពឹងអាចនឹងធ្វើបាននៅការប៉ះ Osasuna នាថ្ងៃអាទិត្យខាងមុខ។
បញ្ជាក់ថាកំណត់ត្រានេះ Messi បានចាប់ផ្តើមធ្វើបានតាំងពីរដូវកាល ២០០៨/០៩ ដែលកាលនោះរកបាន ២៣ គ្រាប់ ហើយនៅរដូវកាល ២០១០/១១ ជាពេលជោគជ័យយ៉ាងសម្បើមដោយរកបាន ៥០ គ្រាប់ឯណោះ។
៥) ក្លាយជាកីឡាករទី ២ ដែលរកបាន ៥០ គ្រាប់នៅវគ្គ Knockout-Stage UCL
វគ្គ Knockout-Stage ពានរង្វាន់ UEFA Champions Leagueគឺគេរាប់ចាប់ពីវគ្គ ១៦ ក្រុមឡើងទៅ ដោយសម្រាប់អ្នករកបានគ្រាប់បាល់ច្រើនបំផុតគឺ Cristiano Ronaldo ធ្វើបាន ៦៧ គ្រាប់ រីឯ Lionel Messi បាន ៤៨ គ្រាប់។
ប្រសិនណានៅជើងទី ២ ទល់ក្លឹប PSG តារាឆ្នើមអាហ្សង់ទីនអាចបង្កើតគ្រាប់បាល់ជួយ Barcelona តបតបាននោះ លោកនឹងអាចឈានមកដល់តួលេខគ្រាប់បាល់ទី ៥០ បន្ទាប់ពី Ronaldo បាន។ បញ្ជាក់ថានៅជើងទី ១ ក្រុមបារាំង PSG បានយកឈ្នះក្រុមអេស្ប៉ាញ Barcelona ៤-១ ក្នុងទឹកដី Camp Nou។
៤) ក្លាយជាកីឡាករទី ១ ក្នុងលោក ដែលរកបាន Hat-Trick ៩ លើកនៅ UCL
សព្វថ្ងៃទាំង Lionel Messi និង Cristiano Ronaldo គឺមានគ្រាប់បាល់ Hat-Trick ៨ លើក ដូចគ្នានៅ Champions League ហើយនៅវគ្គ ១៦ ក្រុមចុងក្រោយ ដែលជើងទី ២ ត្រូវលេងនៅសប្តាហ៍ក្រោយ ទាំង CR7 និង M10 គឺមានឱកាសដូចគ្នាក្នុងការបង្កើតគ្រាប់បាល់ Hat-Trick លើកទី ៩។
៣) ឈ្នះពានរង្វាន់ Pichichi ចំនួន ៨ លើក
កាលពីរដូវកាលមុន Messi បានបន្តឈ្នះពានរង្វាន់ Pichichi Award ឬយើងស្គាល់ថា ជាពានដែលប្រគល់ឲ្យកីឡាកររកបានគ្រាប់បាល់ច្រើនបំផុតនៅ LaLiga ហើយកាលនោះគឺជាលើកទី ៧ សម្រាប់ Messi។ លោកបានយកឈ្នះកំណត់ត្រាអ្នកចាស់ អតីតវីរបុរស Telmo Zarra ដែលឈ្នះបាន ៦ លើក។
ដោយឡែកនៅរដូវកាល ២០២០/២១ នេះ កីឡាករវ័យ ៣៣ ឆ្នាំក៏កំពុងនាំមុខនៅតំណែង Top Scorer ដែលមាន ១៩ គ្រាប់ ហើយគេនឹងប្រជែងជាមួយមិត្តចាស់ Luis Suarez នៅការទទួលពានលើកទី ៨។
២) ជាកីឡាករ Assist បានច្រើនបំផុតនៅ UCL
សព្វថ្ងៃកំណត់ត្រានេះគឺគ្រោងដោយឈ្មោះ Cristiano Ronaldo ដែលមានបាល់ Assist ៤១ លើក ហើយ Lionel Messi មាន ៣៦ លើក។ ប្រសិនណារដូវកាល ២០២០/២១ អ្នកមានបុណ្យអាចបន្តព្យុះភ្លៀងឆ្ពោះទៅកាន់វគ្គបន្ទាប់ នោះសម្រាប់ M10 ក៏អាចមានឱកាសបំបែកកំណត់ត្រានេះផងដែរ។
១) កីឡាករទីប្រាំដែលបង្ហាញខ្លួន ១៥០ ប្រកួតនៅ UCL
រាប់ទាំងកាលប៉ះ PSG នៅជើងទី ១ គឺ Messi បង្ហាញខ្លួន ១៤៨ ប្រកួតហើយនៅ Champions League ដោយគេអាចមានឱកាសឈានដល់តួលេខទី ១៥០ និងក្លាយជាកីឡាករទី ៥ ដែលឈោងបានកំណត់ត្រាមួយនេះ។
មិនខុសពីកំណត់ត្រាខាងលើគឺ Messi ទាមទារជ័យជម្នះជាចាំបាច់របស់ Barcelona ទៅលើ PSG ដែលចាញ់ ៤-១ នៅជើងទី ១។
បញ្ជាក់ថាការប្រកួតជើងទី ២ រវាង PSG និង Barcelona នៅឯទឹកដីទីក្រុងប៉ារីស នឹងធ្វើឡើងនៅវេលាម៉ោង ០៣:០០ នាទីរំលងអាធ្រាត្រ ឈានចូលថ្ងៃទី ១១ មិនា មានផ្សាយផ្ទាល់នៅលើទំព័រ CTS Sports៕
ប្រភព៖ Sportskeeda