វិលទៅកាន់អតីតកាលដែលមិនអាចភ្លេចបានក្នុងពិភពប្រដាល់មួយថៃ ជើងខ្លាំងចិន Han Zi Hao ដឹងថា គ្រប់ដៃគូទាំងអស់សុទ្ធតែខ្លាំងសម្រាប់រូបគេជួបកន្លងមកគឺផ្តល់ជាមេរៀនក្នុងគោលបំណងអភិវឌ្ឍខ្លួនឆ្ពោះទៅរកភាពជោគជ័យនៅ ONE Championship។
ការប្រកួតបន្ទាប់របស់អតីតអ្នកប្រជែងខ្សែក្រវាត់ពិភពលោកនឹងត្រូវតតាំងនឹងកីឡាករ Adam Noi ក្នុងទម្ងន់ bantamweight នៃព្រឹត្តិការណ៍ ONE: FISTS OF FURY II ដែលជាកម្មវិធីថតចាក់ផ្សាយនាថ្ងៃសុក្រ ទី៥ ខែមីនានេះ ។
ចាប់តាំងពីចាញ់ចាញ់ Nong-O Gaiyanghadao សម្រាប់ការប្រកួតដណ្តើមខ្សែក្រវាត់មួយថៃពិភពលោក ONE Bantamweight កាលពីខែកុម្ភៈ ឆ្នាំ២០១៩ Han បានវិលត្រឡប់មកវិញ ដោយទទួលបានជ័យជម្នះលើកីឡាករ “Jordan Boy” Mohammed Bin Mahmoud ក្នុងខែតុលា ឆ្នាំមុន។
កីឡាករអាយុ២៥ឆ្នាំរំលឹកពីការប្រកួតជាមួយ Noi នៅកីឡដ្ឋាន Singapore Indoor Stadiumនាពេលខាងមុខនេះថា ៖«បន្ទាប់ពីប្រកួតជាមួយ Nong-O ខ្ញុំបានត្រៀមខ្លួនច្រើនណាស់ដើម្បីជួបដៃគូផ្សេងទៀត»។
«ខ្ញុំបានរៀនពីរបៀបលុកដោយបិទភ្នែកមិនមែនជម្រើសដ៏ឆ្លាតនោះទេ។ យើងត្រូវប្រើយុទ្ធសាស្ត្រ និងជំនាញ។ បើពុំនោះទេ យើងគ្រាន់តែឡើងសង្វៀនកំដដៃគូតែប៉ុណ្ណោះ។ នោះមែនជាការប្រកួតទេ។ ចាប់ពីពេលនេះទៅ ខ្ញុំនឹងឲ្យអ្នករាល់គ្នាឃើញថា Han Zi Hao ឥឡូវនេះល្អ មិនមែនដូចពីមុនទេ»។
បុរសមកពីខេត្តហេណាន់ ប្រទេសចិនមិនត្រឹមតែបន្ថែមជំនាញមួយកំភ្លេដោយសារបទពិសោធជាមេរៀនកន្លងមកនោះទេ។ គាត់ថែមទាំងបានហាត់ពត់លត់ដំផ្លូវចិត្តក្នុងអន្តរកាលខូវិត-១៩ ទៀតផង។
Han និយាយថា ៖«ថ្នត់គំនិតរបស់ខ្ញុំគឺជាថាមពលខ្លាំងបំផុត។ គ្មានបញ្ហាទេថា តើដៃគូអស្ចារ្យ ខ្លាំងយ៉ាងណា ក៏ខ្ញុំស្វាគមន៍បាន ហើយអាចទប់ទល់ជាមួយជានិច្ច ដូច្នេះខ្ញុំអាចមានឱកាសបញ្ចប់ការប្រកួត និងទទូលបានជ័យជម្នះ»។
«ដោយសារខូវិត-១៩ ខ្ញុំអត់បានឡើងប្រកួតច្រើនដូចមុនទេ ដូច្នេះខ្ញុំបានហ្វឹកហាត់ផ្លូវចិត្តខ្លាំងណាស់ដើម្បីបង្កើតថាមពលល្អឥតខ្ចោះសម្រាប់ប្រកួតជាមួយដៃគូឆ្នើមៗ»។
សម្រាប់ដៃគូ Noi កីឡាករចិនត្រូវជូបនឹងម្ចាស់ជើងឯកមួយថៃពិភពលោកIFMA ពីរសម័យកាលដែលមកពីជំរំហ្វឹកហាត់ដ៏ល្បVenum Training Camp ក្នុងខេត្តបាទីយ៉ា ប្រទេសថៃ
កីឡាករបារាំង-អាហ្សេរីអាយុ២១ឆ្នាំបានធ្វើឲ្យមានការចាប់អារម្ម្មណ៍សម្រាប់ការប្រកួត ONE Super Series លើកដំបូងជាមួយកីឡាករ Leo Pinto ហើយ Hanពិតជាស្វែងយល់យ៉ាងច្បាស់ពីចំណុចខ្លាំងរបស់ដៃគូ។
Han បាននិយាយថា ៖«ខ្ញុំបានឃើញការប្រកួតរបស់គាត់់កន្លងមក។ ក្បាច់វ៉ៃរបស់គាត់ពិតល្អ។ គាត់មានជំនាញមួយថៃ។ ខ្ញុំជឿថា ការប្រកួតនេះនឹងតឹងតែងខ្លាំង»។
«ចំណុចខ្លាំងរបស់គាត់គឺក្បាច់វ៉ៃមានសន្ទុះ ហើយការទាត់របស់គាត់គ្រោះថ្នាក់ណាស់។ ខ្ញុំត្រូវតែប្រុងប្រយ័ត្នចំពោះការទាត់របស់គាត់។ ចំណុចខ្សោយរបស់គាត់គឺមើលទៅ កាយសម្បទារបស់គាត់មិនសូវរឹងមាំប៉ុន្មានទេ ជាពិសេសនៅពាក់កណ្តាលទឹកទី២ និងទឹកទី៣ កម្លាំងស៊ុហ្វរបស់គាត់ថយចុះច្រើន»។
Han បានប្រកួត៥ទឹកពេញជាមួយជើងខ្លាំង Nong-O ធ្លាប់វ៉ៃជាមួយKongsak P.K.Saenchaimuaythaigym និង Mehdi “Diamond Heart” Zatout នៅលើឆាកអន្តរជាតិ ដូច្នេះគាត់ដឹងថា គាត់អាចរក្សាជំហរឆ្ពោះទៅមុខជាមួយដៃគូខ្លាំងដល់ទីបញ្ចប់បានដោយគ្មានបារម្ភរឿងសន្លប់ឡើយ។
សម្រាប់ដៃគូ Noi ដែលមានបទពិសោធតិចគឺជាកត្តាមានប្រៀបរបស់តារាប្រដាល់ចិន។ គាត់បាននិយាយថា ៖«គាត់ជាប្រភេទកីឡាករវ៉ៃគឃ្លើន ហើយខ្ញុំចូលចិត្តរបៀបវ៉ៃស្ងប់ស្ងៀម។ ភាពខុសគ្នាធំបំផុតគឺគាត់អាចទាត់បានខ្លាំង ប៉ុន្តែកម្លាំងស៊ុហ្វរបស់គាត់មិនអាចពេញលេញគ្រប់ទឹកល្អ»។
«នៅពេលគាត់ហត់នឿយ ខ្ញុំអាចរកឱកាសផ្តួលគាត់តែម្តង។ ស្តាប់ទៅស្រួល តែខ្ញុំមិនគិតថា យុទ្ធសាស្ត្ររបស់ខ្ញុំប្រព្រឹត្តទៅដោយរលូនទេ។ យ៉ាងណា ខ្ញុំគិតថា ជាឱកាសល្អសម្រាប់ខ្ញុំផ្តួលគាត់»។
នៅថ្ងៃសុក្រ សប្តាហ៍នេះ កីឡាករមកពីខេត្តេហេហាន់ដាក់ផែនការផ្តួលដៃគូឲ្យលឿនបំផុតដើម្បីឡើងទៅកាន់កំពូលតារាងចំណាត់ថ្នាក់វិញ។
«ខ្ញុំអាចឡើងទៅចំណាត់ថ្នាក់កំពូលទាំង៥បាន បើខ្ញុំអាចយកឈ្នះគាត់។ និយាយរួម គាត់ជាកីឡាករប្រដាល់មួយថៃដ៏ឆ្នើមម្នាក់។ មិនថា ខ្ញុំផ្តួលគាត់ឲ្យសន្លប់ ឬខ្ញុំសន្លប់ តែខ្ញុំច្បាស់ណាស់ថា ខ្ញុំនឹងមិនសន្លប់ទេ»៕