អតីតអ្នកប្រដាល់មិនដែលចាញ់ Floyd Mayweather បានបំបែកនូវកំណត់ត្រាថ្មីមួយ នាមជាអ្នកដែលបានជាវនាឡិកាមានតម្លៃថ្លៃបំផុតសម្រាប់ក្មេងទើបតែចាប់កំណើត ហើយនោះគឺជាកាដូដ៏ពិសេសសម្រាប់ចៅប្រុសរបស់ខ្លួន។
ឈ្មោះជាជីតា ដែលមានអាយុទើបតែ ៤៤ ឆ្នាំ បានចាយលុយប្រមាណ ៤៥ ០០០ ដុល្លារ ទិញនូវនាឡិកាដាំពេជ្រម៉ាក Rolex Oyster Perpetual Datejust ដល់ចៅប្រុសដែលមានឈ្មោះ Kentrel Jr. មានអាយុទើបតែ ៥ សប្ដាហ៍។ ព័ត៌មាននេះបានធ្វើឲ្យមានការភ្ញាក់ផ្អើលជាខ្លាំងនៅលើបណ្ដាញសង្គម ក្រោយមានការចែករំលែកនៅវីដេអូនិងរូបភាពពីសំណាក់កូនស្រីបង្កើតរបស់ Floyd និងជាម្ដាយរបស់ទារក។
ម្តាយរបស់ Kentrel Jr. គឺមានឈ្មោះ Lyanna Mayweather ជាកូនស្រីបង្កើត ដែលត្រូវបាន Floyd ដាក់ឈ្មោះក្រៅឲ្យថា “Yaya” មានអាយុទើបតែ ២០ ឆ្នាំប៉ុណ្ណោះ។ នាងមានទំនាក់ទំនងស្នេហាជាមួយនឹង Rapper អាមេរិក អាយុ ២១ ឆ្នាំ មានឈ្មោះ Kentrell DeSean Gaulden ឬត្រូវបានគេស្គាល់ថាជា YoungBoy ដោយអ្នកទាំងពីរមានទំនាក់ទំនងជាមួយគ្នាតាំងពីឆ្នាំ ២០១៩ មកម្ល៉េះ។
Yaya មាន Follower លើ Instagram ជាង ១,៤ លាននាក់ ហើយជានិច្ចកាលនាងក៏រមែងទទួលបានកាដូដែលមានតម្លៃជាច្រើនពីឪពុករបស់នាង តួយ៉ាងដូចជាកាដូថ្ងៃបុណ្យណូអែលរថយន្ត Mercedes Benz តម្លៃជិត ៣០ មុឺនដុល្លារ និងកាបូបយួរដៃដែលមានតម្លៃរាប់មុឺនដុល្លារផ្សេងទៀត។ មិនចាំបាច់ទៅមើលអីច្រើន មើលតែឈ្មោះលើ Instagram របស់នាង ដាក់សុទ្ធតែ MoneyYaya ដែលតំណាងឲ្យលុយពេញធឹងតែម្តង។
ចំណុចគួរឲ្យចាប់អារម្មណ៍មួយរបស់ Yaya គឺត្រង់កម្ពស់របស់នាង ដែលនាងខុសពីបងប្អូននិងឪពុក ពោលគឺមានកម្ពស់ទាបត្រឹមតែ ១,៤៩ ម៉ែត្រប៉ុណ្ណោះ។
បង្វែរមកតម្លៃនាឡិកា ៤៥ ០០០ ដុល្លារដែល Floyd បានទិញសម្រាប់ចៅប្រុសទើបតែកើតនោះវិញ គឺមើលទៅវាពិតជាធំធេងណាស់ ប៉ុន្តែសម្រាប់លោកផ្ទាល់ដែលជាសេដ្ឋីលុយវាល់លាន គឺរាប់ថាជាបំណែកតូចមួយប៉ុណ្ណោះ ស្របពេលដែល Floyd មានបណ្តុំនាឡិកាដែលខ្លួនប្រើប្រាស់សរុបជិត ២០ លានដុល្លារ ខណៈដែលចំណូលរកបានសរុបមានច្រើនជាង ១ ពាន់លានដុល្លារពីវិស័យប្រដាល់។
ថ្មីៗនេះបុរសសញ្ជាតិអាមេរិក ក៏កំពុងប្រលូកក្នុងការដេញថ្លៃចង់ទិញយករថយន្ត Maybach 62S Landaulet សេរ៊ីឆ្នាំ ២០០៩ ទៅក្នុង Car Collection របស់ខ្លួនបន្ថែមទៀតផងដែរ ដោយវាមានតម្លៃជាង ២,៦៥ លានដុល្លារ ហើយអ្វីដែលពិសេសនោះវាជារថយន្តមានតែ ៨ គ្រឿងប៉ុណ្ណោះក្នុងលោក និងសព្វថ្ងៃមាន ២ គ្រឿងស្ថិតក្នុងដៃរបស់ Rapper ល្បីឈ្មោះ Drake និង DJ Khaled។
គួរបញ្ជាក់ដែរថា Floyd Mayweather បានចូលនិវត្តពីសង្វៀនប្រដាល់កាលពីថ្ងៃទី ២៦ សីហា ឆ្នាំ ២០១៧ ហើយឆ្លងកាត់ការប្រកួត ៥០ លើក គឺឈ្នះទាំង ៥០ និងធ្លាប់ផ្តួលគូប្រកួតឲ្យសន្លប់ចំនួន ២៧ លើក។ Floyd បានឡើងសង្វៀនលក្ខណៈអាជីពលើកចុងក្រោយទល់អ្នកប្រដាល់ MMA គឺ Conor McGregor ដែលកាលនោះផ្តួលគូប្រកួតឲ្យសន្លប់ត្រឹមតឹកទី ១០ និងធ្លាប់ប៉ះជើងខ្លាំងនៅតំបន់អាស៊ីគឺ Manny Pacquiao ហើយឈ្នះតាមរយៈលទ្ធផលកាត់សេចក្តី ១២ តឹក។
កន្លងទៅក៏លេចលឺថា បុរសជាប់រហស្សនាម “The Money Man” ត្រៀមបើកការប្រកួតទល់ YouTuber ល្បីឈ្មោះ Logan Paul ផងដែរ តែមិនទាន់លេចចេញកាលបរិច្ឆេទច្បាស់លាស់នៅឡើយ។ បើក្លាយជាការពិតនោះក្នុងប្រកួតទល់ Logan សម្រាប់ Floyd នឹងអាចកើបបានច្រើនជាង ១០ លានដុល្លារយ៉ាងធូរ៕



