ស្ថានភាពរបស់ Liverpool នៅពេលបច្ចុប្បន្ននេះហាក់មិនប្រាកដប្រជានោះទេ មិនថាតែអនាគតរបស់កីឡាករមួយចំនួនក្នុងក្លឹប និងសូម្បីតែគ្រូបង្វឹកផ្ទាល់។ គិតត្រឹមជុំទី ២៥ នៅ PL ក្រុមហង្សក្រហមមាន ៤០ ពិន្ទុឈរលេខ ៦ ឯណោះក្នុងតារាង។
ដោយមើលឃើញពីភាពមិនច្បាស់លាស់នេះហើយ ក៏នាំឲ្យក្លឹបបានគិតគូរដល់អនាគតជាបណ្តើរៗ ហើយបានសម្លឹងឃើញអ្នកចាត់ការថ្មីមួយរូប ត្រៀមនឹងមកជំនួស Jurgen Klopp នៅថ្ងៃខាងមុខ នោះគឺអតីតកីឡាករលោក Steven Gerrard។ នេះបើតាម The Mirror បានចុះផ្សាយ។
ក្លឹបមានមូលដ្ឋាននៅទីក្រុង Merseyside យល់ឃើញថា Gerrard គេមានសមត្ថភាពអាចដឹកនាំ Liverpool បាន បើទោះបីជាបទពិសោធន៍រាងខ្ចីបន្តិចក៏ដោយ។ ដោយឡែកការចាកចេញរបស់ Klopp ប្រភពក៏សង្កត់ធ្ងន់ថាលោកអាចនឹងទៅជំនួសលោក Joachim Low ជាអ្នកចាត់ការក្រុមជម្រើសជាតិអាល្លឺម៉ង់ទៀតផង។
គួររំឭកថាសព្វថ្ងៃ Gerrard កំពុងដឹកនាំក្លឹប Rangers នៅឯលីគកំពូលស្កុតឡែន ហើយរំពឹងនឹងអាចឈ្នះពានរង្វាន់នៅរដូវកាលនេះទៀត។ បុរសវ័យ ៤០ ឆ្នាំ ក៏ធ្លាប់ដឹកនាំទ្រនំថ្នាលយុវជន U18 និង Liverpool FC YL កាលពីប៉ុន្មានឆ្នាំមុនផងដែរ៕
ប្រភព៖ Goal