ក្រុមហ៊ុន Suning Group ប្រកាសថាគ្រប់ក្លិបបាល់ទាត់ទាំងអស់ជាកម្មសិទ្ធរបស់ខ្លួន ដែលមានវត្តមានក្នុងប្រទេសចិនដូចជា ក្រុមម្ចាស់ជើងឯក លីគកំពូលចិន Jiangsu FC(អតីត Jiangsu Suning) ក្លិបម្ចាស់ជើងឯកលីគនារីរបស់ចិន Jiangsu Suning Women ដែលឈ្នះពានកាលពីឆ្នាំ២០១៩ (2019 WCSL champion) និងសាលាយុវជនថ្នាលគ្រប់កម្រិត នឹងបិទសកម្មភាពត្រឹមនេះជាស្ថាពរ ដោយសារក្ស័យធន។
កាន់តែច្បាស់ជាងនេះទៅទៀត វាជាសេចក្តីប្រកាសមួយ (និងសេចក្តីប្រកាសចុងក្រោយ) ពីក្លឹបបាល់ទាត់ដែលគ្រប់គ្រងដោយម្ចាស់ក្រុមហ៊ុន Suning ជាជាងការប្រកាស (ផ្ទាល់) ពីក្រុមហ៊ុន Suning Group។ កាលពីប៉ុន្មានថ្ងៃមុន! ក្រុមហ៊ុន Suning Appliance Group ដែលម្ចាស់ក្លិប Jiangsu FC លេងក្នុងលីគកំពូលចិន Chinese Super League (CSL) ប្រកាសលក់ក្លិបត្រឹមតែតម្លៃ១សេនប៉ុណ្ណោះ ទៅឲ្យនរណាក៏បានដែលចង់ទិញដើម្បីទប់កុំឲ្យក្លិបមួយនេះរលាយបាត់រូបពីពិភពបាល់ទាត់។
តែយ៉ាងណា! បន្ទាប់ពីប្រកាសហើយនោះគ្មាននរណាម្នាក់ចាប់អារម្មណ៍ចង់ទិញនោះទេពីព្រោះបំណុលដែលក្លិបជំពាក់ប្រាក់ខែកីឡាករច្រើនលើសលបពេក។យោងតាមរបាយការណ៍ពីកាសែតអ៊ីតាលី football-italia ក្រុមហ៊ុន Suning Group កំពុងប្រឈមមុខនឹងបញ្ហាហិរញ្ញវត្ថុធ្ងន់ធ្ងរ ហើយពួកគេត្រូវលក់ទ្រព្យសម្បត្តិរបស់ពួកគេ ជាពិសេសក្លឹបបាល់ទាត់ដែលនៅតែបន្តខាតបង់ ដើម្បីជៀសវាងបញ្ហាធំៗមួយចំនួន។ ក្រុមហ៊ុន Suning មានឆន្ទៈក្នុងការលក់ក្លិបក្នុងតម្លៃទាបត្រឹមមួយសេន ដោយផ្តល់ឱ្យម្ចាស់ថ្មីយល់ព្រមទទួលយក ដើម្បីដោះស្រាយបំណុលរបស់ក្លឹបដែលមានចំនួន ៦៣,៧៧ លានអឺរ៉ូ ដែលភាគច្រើនទាក់ទងនឹងការជំពាក់ប្រាក់ខែរបស់កីឡាករ៕