“បើសិនឈប់ពីបាល់ទាត់ទៅ មានតែសម្រាកមួយរយៈឲ្យរបួសបានធូរស្បើយសិន ហើយចាំមកចូលរួមជាមួយគ្រូចាំទី ធ្វើជាគ្រូជំនួយ” នេះគឺជាសម្ដីរបស់អ្នកចាំទីក្លិប TIFFY ARMY FC កីឡាករ អ៊ុំ សេរីរ័ត្ននិយាយក្នុងវេបសាយរបស់គណៈកម្មការរៀបចំការប្រកួតបាល់ទាត់កម្ពុជា CNCC។
ក្នុងករណីបោះបង់អាជីពបាល់ទាត់ដោយសារបញ្ហារបួសជង្គង់អ្នកចាំទី អ៊ុំ សេរីរ័ត្ន បង្ហើបថា គេអាចនឹងចូលរួមជាក្រុមការងារគ្រូបង្វឹកផ្នែកចាំទី ក្នុងនាមជាគ្រូជំនួយ។ យ៉ាងណា គេថា គ្រាន់តែជាការគិតប៉ុណ្ណោះ អ្វីសំខាន់រង់ចាំមើលស្ថានភាពរបួសជាមុនសិន។ អតីតអ្នកចាំទីជម្រើសជាតិកម្ពុជារូបនេះបន្តថា៖
“ខ្ញុំពិតជាស្ដាយខ្លាំង ព្រោះវ័យយើងអ្នកចាំទីនៅលេងបាន តែដោយសាររបួសញាំញី អាចឲ្យយើងត្រូវបញ្ចប់។ ប៉ុន្តែបើការវះកាត់លើកទី២ជោគជ័យ ខ្ញុំអាចត្រលប់មកវិញ មិនទាន់បញ្ចប់ទេ គ្រាន់តែជាការគិតរបស់ខ្ញុំទេ។ បើជោគជ័យ ខ្ញុំនឹងបន្តលេងទៀត។”
អ៊ុំ សេរីរ័ត្ន បានរងរបួសជង្គង់ដល់ទៅ២លើកទៅហើយគិតចាប់តាំងពីឆ្នាំ២០១៨ មក និងបានឆ្លងកាត់ការវះកាត់ថែមទៀត។ ដោយឡែក កាលខែមករា ឆ្នាំ២០២១ ក្នុងការប្រកួតបាល់ទាត់ពានរង្វាន់មិត្តភាព នៅសៀមរាប គេមានបញ្ហាទាក់ទងនឹងទ្រនាប់ជង្គង់ ក៏ត្រូវឃ្លាតពីការហ្វឹកហាត់សាជាថ្មីដល់បច្ចុប្បន្ន៕
ប្រភព៖CNCC