Franco Jara អតីតខ្សែប្រយុទ្ធជម្រើសជាតិអាហ្សង់ទីន និងបច្ចុប្បន្នកំពុងលេងនៅ FC Dallas បាននិយាយថាបើសិនជា Lionel Messi មកលេងនៅអាមេរិកមែន នោះលោកនឹងទៅថើបជើងរបស់ខ្សែប្រយុទ្ធរូបនេះមិនខាន។
Messi នឹងអស់កុងត្រានៅក្រុម FC Barcelona ត្រឹមដាច់រដូវកាលនេះហើយ ដោយមិនមានការបន្ដកុងត្រាថ្មីណាមួយកើតឡើងទៀតនោះទេ។ ខណៈដែលពេលនេះក៏មានក្លឹបជាច្រើនចង់បានកីឡាករអាហ្សង់ទីនរូបនេះដែរ ព្រោះអស់កុងត្រាត្រូវ គឺភាគីដែលចង់បានគ្រាន់តែចរចាតម្លៃខ្លួនត្រូវ អាចយក Messi ទៅលេងឱ្យបានតែម្ដង។
ដោយក្នុងនោះក៏មានដំណឹងក្លឹបនៅលីគកំពូលអាមេរិក MLS ចាប់អារម្មណ៍ផងដែរ។ ចំពោះរឿងនេះដែរ ខ្សែប្រយុទ្ធ Jara របស់ក្រុម Dallas បាននិយាយថា៖ “បើសិនជាគាត់មកលេងនៅ MLS មែន ខ្ញុំនឹងថើបជើងរបស់គាត់។ ក្នុងអាជីពបាល់ទាត់របស់ខ្ញុំ ខ្ញុំបានធ្វើការហ្វឹកហាត់និងលេងជាមួយគាត់ ប៉ុន្តែមិនធ្លាប់លេងតទល់គ្នាលើទីលានម្ខាងម្នាក់នោះទេ។ MLS ធ្លាប់នាំយក Zlatan , Higuain មករួចហើយ ដូច្នេះសង្ឃឹមថានឹងមានវត្តមាន Messi មកទៀតជាក់ជាមិនខាន”៕ប្រភព Marca
