សត្វឆ្មាគ្មានរោមឈ្មោះ Pepe ដែលជាសត្វចិញ្ចឹមរបស់ Cristiano Ronaldo និងគូស្នេហ៍ Georgina Rodriguez បានរត់ចេញពីផ្ទះក្នុងទីក្រុង Turin កាលពីពេលកន្លងទៅនេះ ហើយបានជួបហេតុការណ៍អាក្រក់គឺត្រូវឡានបុក។
ក្រោយពីកើតហេតុ Georgina បានប្រញាប់យកសត្វឆ្មាដ៏គួរឲ្យស្រលាញ់របស់ខ្លួនទៅមន្ទីរពេទ្យប្រចាំតំបន់ ប៉ុន្តែស្ថានភាពរបស់វាហាក់មិនធូរស្បើយទាល់តែសោះ និងកាន់តែទ្រុឌទ្រោមទៅ ទើបថ្មីៗនេះនាងសម្រេចដឹកតាមយន្តហោះឯកជនដោយផ្ញើបងស្រីរបស់នាងឈ្មោះ Ivana ឲ្យយកទៅព្យាបាលនៅប្រទេសអេស្ប៉ាញ។
បញ្ជាក់ដែរថា សត្វឆ្មាមួយក្បាលនោះគឺមានតែ ៨ ក្បាលប៉ុណ្ណោះក្នុងលោក ហើយវាមានតម្លៃ ៣ ៦០០ ដុល្លារ និងត្រូវបាន Ronaldo ដាក់ឈ្មោះឲ្យថា “Pepe” ដែលជាឈ្មោះអតីតមិត្តរួមក្រុមនៅក្លឹប Real Madrid។
ពាក់ព័ន្ធនឹងហេតុការណ៍ខាងលើ តារាម៉ូដែលកូនកាត់អេស្ប៉ាញ-អាហ្សង់ទីនបានផ្តល់បទសម្ភាសន៍កាលពីពេលកន្លងទៅថា៖ “Pepe គេបានធ្វើឲ្យខ្ញុំមានការភ័យខ្លាចជាខ្លាំង ព្រោះគេបានរត់ចេញពីផ្ទះ ហើយប៊ិះតែនឹងបាត់បង់ជីវិត ទើបមកទល់ពេលនេះយើងសម្រេចឲ្យបងស្រីរបស់ខ្ញុំគឺ Ivana ជាអ្នកមើលថែវាជំនួស ខណៈដែលពេលនេះ Pepe គេកំពុងសម្រាកព្យាបាលនៅឯប្រទេសអេស្ប៉ាញ”។
Georgina ដែលមានកូនស្រីតូចអាយុ ៣ ឆ្នាំកន្លះឈ្មោះ Alana Martina និងកូន ៣ រូបផ្សេងទៀតបាននិយាយថា៖ “កូនពៅរបស់ខ្ញុំគេមិនយល់នោះទេថា Pepe កំពុងឈឺ ហើយគេតែងតែទារចង់លេងជាមួយវា”។
គួររំឭកថា សត្វឆ្មាមួយក្បាលនោះបានក្លាយជាសមាជិករបស់គ្រួសារ Ronaldo តាំងពីរយៈពេល ២ ឆ្នាំមុន ដោយកាលពីខែវិច្ឆិកា ឆ្នាំ ២០១៨ Georgina បានណែនាំ Pepe ទៅកាន់ Follower ទាំង ២៣ លាននាក់របស់នាងលើ Instagram ដោយសរសេរបែបនេះថា៖ “Pepe ជូនពរឲ្យអ្នករាល់គ្នាសំណាងល្អនៅថ្ងៃនេះ”។
ដោយឡែកជានិច្ចកាលក៏រមែងឃើញវាលេចមុខក្នុងរូបភាពស្និទ្ធស្នាលជាច្រើនសន្លឹកទាំងជាមួយ Ronaldo ផ្ទាល់ ក៏ដូចជាជាមួយគូស្នេហ៍ Georgina និងកូនតូចៗឯទៀត។ អ្វីដែលពិសេសនោះ វាមានសំណាងជាងយើងដែលជាអ្នកគាំទ្រ ដោយកន្លងទៅនៅថ្ងៃឈប់សម្រាកវាបានស្គាល់រសជាតិជិះយន្តហោះឯកជន Gulfstream G200 ដែលមានតម្លៃជាង ២០ លានដុល្លារ នៅដំណើរកម្សាន្តជាមួយតារាឆ្នើមក្លឹប Juventus។
ផ្សាភ្ជាប់គ្នានឹងរឿងសត្វចិញ្ចឹមនេះ សម្រាប់គូប្រជែងរបស់ Ronaldo គឺ Lionel Messi ក៏មានឆ្កែសំណព្វមួយក្បាលផងដែរ ដែលវាមានឈ្មោះថា “Hulk” ហើយជាប្រភេទឆ្កែ Dogue de Bordeaux ត្រូវបានគេស្គាល់ថាជាពូជឆ្កែធំរបស់បារាំង។ វាបាននៅជាមួយ Messi តាំងពីខែមករា ឆ្នាំ ២០១៦ ពោលគិតមកទល់ពេលនេះមានឈ្មោះជាសមាជិកក្នុងគ្រួសាររបស់ M10 រយៈពេលជាង ៥ ឆ្នាំមកហើយ រីឯតម្លៃរបស់វាអាចថ្លៃចន្លោះពី ១ ៥០០ ទៅ ៧ ០០០ ដុល្លារ៕
ប្រភព៖ TheSun