Anthony Nwakaeme បដិសេធទៅលេងនៅលីគកំពូលចិន ដោយសារតែខ្លួនគិតថាលុយមិនមែនសំខាន់ សម្រាប់ការលេងបាល់ទាត់ឡើយ។
Nwakaeme ត្រូវបានក្លឹបចិនមួយផ្ដល់តម្លៃខ្លួនខ្ពស់មែនទែន ប៉ុន្តែរូបគេមិនព្រមទៅលេងនោះទេ ដោយបានសម្រេចចិត្តចុះកុងត្រា៣ឆ្នាំលេងឱ្យក្លឹប Trabzonspor របស់ទួរគីទៅវិញ។ ចំពោះហេតុផលដែលបដិសេធកើបលុយនៅចិននេះ បុរសវ័យ២៩ឆ្នាំបាននិយាយថា៖ “គ្រប់យ៉ាងមិនមែនសម្រាប់តែលុយមួយមុខទេ។ ខ្ញុំជាមនុស្សដែលចូលចិត្តប្រកួតប្រជែង ហើយខ្ញុំពេញចិត្តចំពោះការប្រជែងជាមួយខ្លួនឯង។ Trabzonspor មានមហិច្ឆតាធំ ហើយក្នុងនាមជាកីឡាករអាជីព ខ្ញុំពេញចិត្តនឹងចូលរួមជាមួយពួកគេ”។
Nwakaeme ចាប់អាជីពបាល់ទាត់ដំបូងជាមួយក្លឹបនៅប្រទេសរូម៉ានីនៅឆ្នាំ២០១០។ អ្វីដែលជោគជ័យបំផុតសម្រាប់រូបគេនោះ គឺការលេងនៅក្លឹប Hapoel Be’er Sheva របស់អ៊ីស្រាអែល នៅឆ្នាំ២០១៥កន្លងទៅ ដោយឈ្នះទាំងពានលីគ និងខាប់នៅទីនោះ។ ការលេងបានល្អនៅក្លឹបនេះហើយ ទើបបានជារូបគេមានឱកាសបានចូលលេងឱ្យជម្រើសជាតិនីហ្សេរីយ៉ា នៅឆ្នាំ២០១៧កន្លងទៅ៕ប្រភព៖ BBC