អ្នកចាត់ការក្លឹបតោខៀវ Chelsea បានបង្ហើបថា កាលខ្លួននៅដឹកនាំ PSG គឺក្លឹបមានបំណងចង់បាន Luis Suarez របស់ Barcelona ពិតមែន តែចុងក្រោយការចរចាមិនសម្រេច ហើយកីឡាករគេជ្រើសរើសការផ្ទេរទៅក្លឹប Atletico Madrid។
ប្រាប់មុនការប្រកួតរបស់ Chelsea ទល់ Atletico Madrid នៅ UCL លោក Tuchel និយាយថា៖ “គឺយើងមានលទ្ធភាពនៅពេលដែលគេ [Suarez] ចាកចេញពី Barcelona ដោយយើងព្យាយាមហើយ តែគេជ្រើសរើសការនៅប្រទេសអេស្ប៉ាញ ហើយចុះហត្ថលេខាឲ្យ Atletico”។
លោកបន្ថែមទៀតថា៖ “យើងចាប់អារម្មណ៍ការចុះហត្ថលេខាខ្សែប្រយុទ្ធដ៏ល្អបំផុតមួយក្នុងលោក ហើយខ្ញុំគិតថាគេជាខ្សែប្រយុទ្ធបែបធម្មជាតិ ដែលមានគុណភាពល្អនៅតំបន់ប្រយុទ្ធ ហើយជានិច្ចកាលគេតែងតែចង់បង្ហាញអំពីចំណង់នៃការរកគ្រាប់បាល់របស់គេជាបន្តបន្ទាប់ ដោយយើងដឹងពីគុណភាពរបស់គេរួចរាល់ហើយ យប់នេះយើងនឹងព្យាយាមតាមបញ្ឈប់គេ”។
ដូចបានលើកឡើងខាងលើ ក្រុមតោខៀវ Chelsea នឹងត្រូវជួបក្រុមខ្លាំង Atletico Madrid ដែលកំពុងឈរលេខ ១ នៅអេស្ប៉ាញនារាត្រីនេះ វេលាម៉ោង ០៣:០០ នាទីព្រឹក មានផ្សាយផ្ទាល់លើទំព័រ CTS Sports៕