អ្នកប្រដាល់ល្បីឈ្មោះនៅតំបន់អាស៊ី និងជាស្តេចប្រដាល់ប្រចាំប្រទេសហ្វីលីពីនគឺ ម៉ានី ប៉ាគីអៅ បានបង្ហើបកាលពីពេលថ្មីៗនេះថា ខ្លួនចង់ឡើងសង្វៀនសារជាថ្មីទល់អ្នកប្រដាល់ Terence Crawford ប៉ុន្តែសុំទាមទារទំហំទឹកប្រាក់នៅកម្រិតដ៏ច្រើនមួយ។
អ្នកប្រដាល់មានរហស្សនាម PacMan បានខកខានឡើងសង្វៀនប្រកួត តាំងពីថ្ងៃទី ២០ កក្កដា ឆ្នាំ ២០១៩ ដែលប្រកួតកាលនោះលោកបានយកឈ្នះអ្នកប្រដាល់អាមេរិក Keith Thurman តាមរយៈលទ្ធផលកាត់សេចក្ដីនៅការប្រកួត ១២ វគ្គ។
យ៉ាងណាមិញជាមួយការវិលត្រលប់មកសារនេះ បុរសវ័យ ៤២ ឆ្នាំនឹងមិនខ្ជះខ្ជាយពេលវេលាជាមួយការប្រកួតខ្នាតតូចនោះទេ ផ្ទុយទៅវិញលោកចង់ប្រជែងជាមួយម្ចាស់ខ្សែក្រវាត់ WBO និងជាអ្នកប្រដាល់មិនទាន់ស្គាល់ពាក្យថាចាញ់គឺ Crawford ហើយទាមទារចង់បានទឹកប្រាក់យ៉ាងហោចណាស់ ៤០ លានដុល្លារ។
ប៉ាគីអៅបានបញ្ជូនសំណើខាងលើ រួចរាល់ហើយទៅកាន់អតីត Promoter របស់ខ្លួនគឺលោក Bob Arum ហើយបានបញ្ជាក់ប្រាប់សារព័ត៌មាន Daily Tribune បែបនេះថា៖ “ខ្ញុំចង់វ៉ៃជាមួយនរណាម្នាក់ដែលមានខ្សែក្រវាត់ ហើយពួកយើងបានប្រាប់ទៅកាន់ Bob ដោយខ្ញុំត្រូវការ ៤០ លានដុល្លារ ហើយ Crawford ត្រូវការ ១០ លានដុល្លារ ដោយខ្ញុំនឹងវ៉ៃជាមួយនរណាទាំងអស់ ដូចអ្នកស្គាល់ខ្ញុំស្រាប់ហើយ ខ្ញុំនឹងមិនរុញរាជាមួយការប្រកួតប្រជែងទេ មោះចូលមក”។
ការប្រកួតនេះអាចនឹងធ្វើឡើងនៅប្រទេសកាតា ក្នុងឆ្នាំ ២០២១ ប៉ុន្តែចំពោះកាលបរិច្ឆេទច្បាស់ការ មិនទាន់មានប្រភពណាបង្ហើបប្រាប់នៅឡើយ។
រំឭកបន្តិចសម្រាប់ Crawford គឺជាម្ចាស់ខ្សែក្រវាត់ WBO ដែលលោកបានឈ្នះនៅការប្រកួតកាលពីឆ្នាំ ២០១៨ ហើយឆ្លងកាត់ការឡើងសង្វៀន ៤ លើកកន្លងមក នៅតែបន្តការពារខ្សែក្រវាត់បានជាបន្តបន្ទាប់ តាមរយៈការផ្តួលគូបដិបក្ខឲ្យសន្លប់មិនផុតពីតឹកទី ១០ ឡើយ។ ក្នុងអាជីពរបស់បុរសវ័យ ៣៣ ឆ្នាំ សរុប ៣៧ ប្រកួត ឈ្នះ ៣៧ ធ្លាប់ផ្តួលគូប្រកួតឲ្យសន្លប់ ២៨ លើក។
បញ្ជាក់ដែរថា គ្រូបង្វឹករបស់ប៉ាគីអៅលោក Freddie Roach ធ្លាប់បានបង្ហើបដែរថា ប៉ាគីអៅ ទំនងជានឹងឡើងសង្វៀនតែ ១ ឬ ២ លើកទៀតប៉ុណ្ណោះ មុននឹងប្រកាសចូលនិវត្ត។ ក្រៅពីប្រកួតទល់ Crawford សម្រាប់អ្នកប្រដាល់ហ្វីលីពីនក៏មានបំណងចង់សាកថ្វីដៃជាមួយអ្នកលេងក្បាច់គុណចម្រុះ Conor McGregor មួយរូបទៀត តែវាមានភាគរយតិចណាស់ដែលនឹងអាចកើតឡើង។
ក្នុងអាជីពជាអ្នកប្រដាល់របស់ ប៉ាគីអៅ លោកធ្លាប់ហែលកាត់ការប្រកួត ៧១ លើក ឈ្នះ ៦២ លើក ស្មើ ២ លើក ចាញ់ ៧ និងធ្លាប់ផ្តួលគូប្រកួតឲ្យសន្លប់ ៣៩ លើក។ បច្ចុប្បន្នក្រៅពីអាជីពប្រដាល់ លោកក៏មានមុខតំណែងនៅជួរនយោបាយ ដោយជាប្រធានកិច្ចការសាធារណៈនៅក្នុងព្រឹទ្ធសភា និងជាកងយោធាមានឋានៈខ្ពង់ខ្ពស់មួយរូបប្រចាំផ្ទៃប្រទេសហ្វីលីពីន៕
ប្រភព៖ TheSun