តាមរបាយការណ៍ចុងក្រោយបានចុះផ្សាយថា ក្លឹបបិសាចក្រហម Manchester United បានគ្រោងទុករួចជាស្រេចហើយ ថានឹងលក់ចេញរវាង David de Gea ឬ Dean Henderson ពោលគឺមានមួយនឹងត្រូវចាកចេញនៅបញ្ចប់រដូវកាល ២០២០/២១។
អ្នកចាំទីទាំងពីរកំពុងប្រជែងគ្នាជាខ្លាំងនៅរដូវកាលនេះ ដើម្បីដណ្តើមយកតំណែងដៃទីមួយ ក្រោមការដឹកនាំរបស់លោក Ole Gunnar Solskjaer។ សម្រាប់ De Gea គេបង្ហាញខ្លួនបាន ២២ ប្រកួត រីឯ Henderson ទើបបាន ៣ ប្រកួតប៉ុណ្ណោះ។
ប្រភពពី TheSun ចុះផ្សាយថា ដោយសារតែតំណែងអ្នកចាំទីហាក់មិនទាន់ផ្លែផ្កាល្អនៅឡើយ ក៏សម្រេចឲ្យលោក Ole មានចិត្តចង់លក់ចេញមួយរវាងអ្នកទាំងពីរ ហើយនឹងអាចយកអ្នកថ្មីណាម្នាក់មកចូលរួម។
បញ្ជាក់ថាកុងត្រារបស់ De Gea មានសុពលភាពដល់ឆ្នាំ ២០២៣ ប៉ុន្តែនៅរយៈពេលចុងក្រោយគេរមែងបង្កកំហុសជារឿយៗ ដោយរាប់ទាំងគ្រាពេលប៉ះ Everton ថ្ងៃមុនផង។ រីឯ Henderson ជានិច្ចកាលឲ្យតែមានឱកាស គេហាក់ធ្វើបានល្អច្រើន ដោយកន្លងទៅនេះពេលប៉ះ Real Sociedad គេក៏ជាចំណែកក្នុងជ័យជម្នះ ៤-០ ផងដែរ៕
ប្រភព៖ AF